Malakia 2 - Tosi Tapu

Tautea o kau faisakilifisio ; valoki o le kakai

¹ I le temi nei, kia koutou le fakatotonu leinei, kau pelepitelo !

² Kapau e leaise kotou fakalogo, kapau e leaise kotou tokaga i lokoutou loto katoa O tuku le kololia ki loku suafa, e pati le Eteleno o kau tau, E kau kakau loa kia koutou le malaia, Ti e kau fakaliliu loa a tapuakina ala na kau fakapapau atu kia koutou ko ni malaia ; Io, e kau fakaliliu loa latou ko ni malaia, talie e leaise kotou tokaga ki ai i lokoutou loto katoa.

³ Ko leinei, e kau maumaui loa akoutou pulapula, Ti e kau laku loa ki okoutou mata ni faikauga, A faikauga o manu ala e kotou momoli i akoutou sakilifisio, Ti e ave loa koutou mo latou.

⁴ E kotou iloa ai loa na kau tuku atu kia koutou le fakatotonu lena, O tupu ke mauli laku sai mo Levi, E pati le Eteleno o kau tau.

⁵ Ko laku sai mo ia ko se sai o le mauli mo le tokamalie, Ko lena le nea leia na kau tuku kiate ia o tupu ke i ai kiate au ; Ti na maua e ia se i kiate au, Na lulu a ia i mua o loku suafa.

⁶ Na nofo le lao o le maoki i lona loto, Ti na leaise maua le agaveli i ona laugutu ; Na saele a ia mo au i le tokamalie mo le maoki, Ti na fakamaliu e ia mei le veli ni tagata toka api.

⁷ Talie e tonu ke taupau e laugutu o le tagata faisakilifisio le poto, Ti e tonu ke afa i lona gutu le lao, O tupu ko se tagata a ia na kakau mai e le Eteleno o kau tau.

⁸ Kae ko koutou, kua kotou mavae i le ala, Kua kotou fakaliliu le lao ko se nea fakatupu siga ki se toka api, Ti kua kotou maumaui le sai mo Levi, E pati le Eteleno o kau tau.

⁹ Ti ko au, e kau fakaliliu loa koutou ko ni nea noa mo fakalialia Ki mata o le kakai katoa, Talie na leaise kotou taupau oku ala, Ti na kotou tio ki mata o tagata Mo ka kotou too le lao.

¹⁰ Pe leaise tou maua fuli se tamana e tasi ? Pe leaise ko se Atua e tasi leia na fakatupu ia tatou ? Kolea e leaise tou agatonu ai i otou vasaa, Ti e tou maumaui ai le sai o otou tamana ?

¹¹ Na leaise agatonu a Suta, Ti na fai se nea fakalialia i Iselaele mo Selusalemi ; Talie na fakakelekele e Suta le nea leia na fakatapu ki le Eteleno, le nea leia e fiafia ai le Eteleno : Na avaga a ia mo le taine o se atua kese.

¹² E motusi loa e le Eteleno le tagata leia e fai ia le nea lena, leia e alaala mo leia e tali, E motusi loa e ia a ia i falela o Sakopo, Ti motusi loa e ia leia e fai ia se moliga Ki le Eteleno o kau tau.

¹³ Ko leinei foki le tasi a nea leia e kotou fai : E kotou ufiufi le aletale o le Eteleno ki loimata, Ki tagi mo lauga, O tupu e leaise koi tokaga a ia ki moliga, Ti e leaise koi tali e ia se nea mei okoutou lima.

¹⁴ Ti e kotou pati : Kolea lona tupuaga ?… Se tupu na ke fakapapau i mua o le Eteleno ke ke agatonu ki le fafine leia na avaga mo koe i lou temi tupulaga. Ko lou soa a ia, leia na ke filifili totonu, Kae ko leinei kua ke tiaki a ia.

¹⁵ Na leaise fai le nea lena e se tasi, mo ka na i ai sona ga poto. Ko le toka tasi na fai ia a ia, ti kolea lona tupuaga ? Talie na afa e ia le sakoga leia na fakapapau e le Atua kiate ia. Koia kotou tokaga ai kia koutou totonu, Ti ke aua na agatuu se tasi ki le avaga o lona temi tupulaga !

¹⁶ Talie e kau vesia ki le kapu o le avaga, E pati le Eteleno, le Atua o Iselaele, Ti mo leia e uufi ia le agamakeke ki lona kofu, E pati le Eteleno o kau tau : Kotou tokaga ki okoutou laumalie, Ti ke aua na kotou agatuu !

Fakamea o Suta i le aso o le fakamaau

¹⁷ E kotou fakapakia le Eteleno ki akoutou masau, Ti e kotou pati : kolea le nea na motou fakapakia ai a ia ? Se tupu na kotou pati : Ko leia e fai ia le veli e malie ki mata o le Eteleno, Ti e fiafia a ia i le tagata lena ! Pe kotou pati : Kofea le Atua o le faitotonu ?