Malakia 1 - Tosi Tapu

Titua o Iselaele ki le alofa o lona Atua

¹ Folafola a le Eteleno ki Iselaele ia Malakia.

² Na kau alofa kia koutou, e pati le Eteleno. Kae e kotou pati : Kolea le nea leia na ke alofa ai kia matou ? Pe leaise ko le taina o Esau ko Sakopo ? e pati le Eteleno. Kae na kau alofa kia Sakopo,

³ Ti na kau maua se vesia kia Esau, Na kau fakaliliu ona mauga ko se potu lavaki, Na kau tuku lona tofiga ki kuli vao o le toafa.

⁴ Kapau e pati Etome : Kua motou maumau, E motou toe laga loa a maumau ! Koia e folafola ai le Eteleno o kau tau : Ke lotou fakatuu ! e kau soloi loa, Ti e fakaigoa loa latou fenua o le agaveli, Kakai leia e itaita ki ai le Eteleno o lee gato.

⁵ E tio loa ki ai okoutou mata, Ti e kotou pati loa : E lasi le Eteleno O fakalaka i koiga o Iselaele !

Agasala a le kau faisakilifisio

⁶ E fakaapaapa se vosa ki lona tamana, ti mo se tagata fakasausau ki lona pule. Kapau e kau tamana, kofea le fakaapaapa leia e tonu ke fai mai kiate au ? Kapau e kau pule, kofea le i leia e tonu ke maua kiate au ? E pati le Eteleno o kau tau kia koutou, kau faisakilifisio, Ala e fakanoai ia loku suafa, Ti e pati : Kolea le nea leia na motou fakanoai ai lou suafa ?

⁷ E kotou momoli i loku aletale ni nea kai kelekele, Ti e kotou pati : Kolea le nea leia na motou fakanoai ai a koe ? Se tupu na kotou pati : E noa le laupapa o le Eteleno !

⁸ Ka kotou momoli se failaulau ki se manu kivi, pe leaise veli ? Ka kotou momoli se manu kito pe maimoa, pe leaise veli ? Ke ke momoli a ia ki lou kovana ! Pe tali malie loa e ia a koe, pe tuku atu loa e ia kiate koe se nea malie ? E pati le Eteleno.

⁹ Kotou faikole ki le Atua i le temi nei, ke alofa atu a ia kia koutou ! Se ko koutou ala e au mei ai le nea lena : Pe tali malie loa e ia koutou ? E pati le Eteleno o kau tau.

¹⁰ Ko ai leia ia koutou e tapono ia loa a matapa, Ke aua na kotou tutu noa le afi i aluga o loku aletale ? E leaise kau maua fua se fiafia e tasi ia koutou, e pati le Eteleno o kau tau, Ti e leaise malie kiate au a moliga o okoutou lima.

¹¹ Talie mei le sopo o le laa o kaku ki lona galo, E lasi loku suafa i lotolotoga o atu puleaga, Ti e tutu i ganea fuli le iseso ki loku suafa, Ti e fai mai kiate au ni failaulau mea ; Talie e lasi loku suafa i lotolotoga o atu puleaga, E pati le Eteleno o kau tau.

¹² Kae ko koutou, e kotou fakakelekele loku suafa, O kotou pati : E kelekele le laupapa o le Eteleno, Ti ko le nea leia e maua i ai ko se nea kai veli.

¹³ E kotou pati : kau fai nei le pakia ! ti e kotou vesia kiate au, E pati le Eteleno o kau tau. Koia e kotou aumai ai kiate au ni manu kaia, mo kito ti mo maimoa ! Ti ko na moliga e kotou fai mai kiate au ! Pe feala ke kau tali malie latou mei okoutou lima ? e pati le Eteleno.

¹⁴ Malaia le tagata kaka leia e maua ia i lana kau manu se manu tagata, Kae e soli e ia ke momoli ki le Aliki se manu kala ! Talie ko au ko se sau lasi, e pati le Eteleno o kau tau, Ti e fakaii loku suafa i lotolotoga o atu puleaga.