Lute 4 - Tosi Tapu

Avaga o Poase mo Lute

¹ Na pale loa Poase ki le matapa o le kolo, ti na tuu loa a ia i ai. Ti ko leinei, na nake loa ki ai leia na kaiga feofi, ti na masau loa Poase kiate ia. Na pati loa Poase kiate ia : A koe leia, au, o nofo i leinei. Ti na ano loa a ia, o nofo ki lalo.

² Na too loa e Poase ni tagata e tino agafulu i le kau fakamatuatua o le kolo, ti na pati loa a ia : Kotou nonofo ki lalo i leinei. Ti na lotou nonofo loa ki lalo.

³ Ti na pati loa a ia ki leia na kaiga feofi : Kua toe liliu mai loa Naomi mei le fenua o Moape, ti kua fakatau e ia le kele leia na maua e lota taina ko Elimeleke.

⁴ Na kau manatu loa e tonu ke kau fakasa atu a ia kiate koe, ti mo pati atu kiate koe : Ke ke totogi le kele, i mua o le kakai mo le kau matua o loku kakai. Kapau e ke loto ke ke totogi a ia, ti ke totogi a ia ; kae kapau e leaise ke loto ki ai, fakasa mai a ia kiate au ke kau iloa. Talie e leaise tasi leia e kaiga feofi i ou mua, ti ko au e kau olo atu kiate koe. Na tali loa le tagata : E kau totogi loa a ia.

⁵ Na pati loa Poase : Ko le aso leia e ke totogi ai loa le kele ia Naomi, e ke toe too ai loa mo Lute, le fafine Moape, avaga o leia kua mate, ke toe lagai ai loa le igoa o leia kua mate i lona tofiga.

⁶ Ti na tali loa le tagata : Kapau ko lena, ti e leaise mafai loa ke kau totogi a ia, talie e kau i na pulinoa loa loku tofiga ; too e koe mo ou le kaiga feofi, talie e leaise mafai ke kau too a ia.

⁷ I le temi mua i Iselaele, ka fakamaoki loa se nea leia na totogi pe na fetogi e ni tagata e toka lua, e tonu ke tatala loa e le tasi lona fa taka o soli ki leia.

⁸ Ti na pati loa leia na maua ia le kaiga feofi kia Poase : Totogi le kele mo ou ! Ti na tatala loa e ia lona fa taka.

⁹ Ti na pati loa Poase ki le kau fakamatuatua mo le kakai katoa : E kotou fakamaoki loa i le aso nei, kua kau totogi mei le lima o Naomi a nea fuli a Elimeleke, mo Kilisone, ti mo Makelone,

¹⁰ ti kua kau toe totogi foki ke liliu ko loku avaga a Lute le fafine Moape, avaga o Makelone, o tupu ke toe lagai ai le igoa o leia kua mate i lona tofiga, ti ke aua na puli loa le igoa o Makelone i ona fetaina, mo le matapa o lona kolo. E kotou fakamaoki ki ai i le aso nei !

¹¹ Na pati loa le kakai katoa leia na nonofo i le matapa mo le kau fakamatuatua : E motou fakamaoki ki ai ! Ke fakaliliu e le Eteleno le fafine leia kua ulu ki lou fale o tatau mo Lasele mo Lea, ala na tupu mei ai le kakai o Iselaele ! Ke fakasa lou makeke i Efalata, ti ke logologona lou igoa i Peteleemi !

¹² Ke feala loa ki le sakoga leia e soli atu loa kiate koe e le Eteleno i le fafine lena, ke fakaliliu ia lou fale o tatau mo le fale o Pelesi, leia na fanaui e Tamale kia Suta !

¹³ Na too loa e Poase a Lute, leia na liliu loa ko lana avaga, ti na ano loa a ia kiate ia. Na fakataga loa e le Eteleno ke faitoe a Lute, ti na fanaui loa e ia se tama.

¹⁴ Na pati loa a fafine kia Naomi : Ke tapuaki le Eteleno, leia na leaise tiaki ia a koe ke ke sala tagata leia e kaiga feofi mo koe i le aso nei, ti e mauiga loa lona igoa i Iselaele !

¹⁵ E fakafiafiai loa e le fanau leinei lou loto, ti e liliu loa a ia ko le tokoi o lou temi matua ; talie na fanaui a ia e lou fugao, leia e alofa kiate koe, ti e mauiga ake kiate koe i ni vosa e toka fitu.

¹⁶ Na too loa e Naomi le toe, o tuku ki lona fatafata, ti na liliu loa a ia ko lona fafine taupau.

Tupu o Opeto, tupuna o Tavite

¹⁷ Na tuku loa kiate ia e fafine o lona fale se igoa, o pati : Kua tupu loa se vosa kia Naomi ! Ti na lotou fakaigoa loa a ia ko Opeto. Ko le tamana a ia o Isaia, tamana o Tavite.

¹⁸ Ko leinei le sakoga o Pelesi.

¹⁹ Na fakatupu e Pelesi a Eselone ; na fakatupu e Eselone a Lame ; na fakatupu e Lame a Aminatape ;

²⁰ na fakatupu e Aminatape a Naasone ; na fakatupu e Naasone a Salamone ;

²¹ na fakatupu e Salamone a Poase ; na fakatupu e Poase a Opeto ;

²² na fakatupu e Opeto a Isaia ; ti na fakatupu e Isaia a Tavite.