Lute 3 - Tosi Tapu

Lute i le sasaaga fulumeto o Poase

¹ Na pati loa Naomi, lona tinana, kiate ia : Ei loku fugao, e kau loto loa ke afa lou fimalie ki muli, o tupu ke ke manuia.

² Ko leinei, pe leaise ko lota kaiga feofi a Poase leia na ke gaoi ai mo ana fafine fakasausau ? I le afiafi leinei, e tonu loa ke ano a ia o sasa le fulumeto i lana sasaaga fulumeto.

³ Maanu ti ke fakamanogi, ti ke toe tui loa ou kofu, ti ke ifo loa ki le sasaaga fulumeto. Ke aua na ke fakasa loa a koe kiate ia, o kaku ki le oki o lana kai mo lana inu.

⁴ Ti ka ano loa a ia o moe, tio ki le ganea leia e moe ai loa a ia. Ti ke ano loa, o sufegi ona vae, ti ke moe loa i ai. E fakasa atu loa e ia totonu le nea leia e tonu ke ke fai.

⁵ Na tali loa a Lute kiate ia : E kau fai loa a nea fuli ala kua ke pati ki ai.

⁶ Na ifo loa a Lute ki le sasaaga fulumeto ti na fai loa e ia a nea fuli ala na fakatotonu e lona tinana.

⁷ Na kai loa Poase mo inu, ti na fiafia loa lona loto. Na ano loa a ia o moe i le potupotu o se tuuga fui fulumeto. Ti na ano fakaeteete loa a Lute, o sufegi ona vae, ti na moe loa a ia.

⁸ I le loto malie o le pouli, na oso loa le tagata lena i lona i ; ti na mafuli ake loa a ia, o tio ki se fafine kua moe i ona vae.

⁹ Na pati loa a ia : Ko ai a koe ? Na tali loa le fafine : Ko au Lute, lau fafine fakasausau ; folasi mai lou lima ki lau fafine fakasausau, talie e ke kau ia latou ala e ofi kiate au.

¹⁰ Ti na pati loa Poase : Ke tapuaki le Eteleno kiate koe, ei loku taine ! Ko le nea leinei kua ke fai e fakamaoki ki lou agatonu ki le famili o lou avaga, ti e toe lasi ake a ia i nea fuli ala na ke fai. Talie na leaise ke afa ia le alofa o ni tagata koi muli, pe mou koloa pe mativa.

¹¹ I le lakaga nei, ei loku taine, aua na ke i ; e kau fai loa kiate koe a nea fuli ala e ke pati loa ki ai, talie kua iloa e le kolo katoa ko se fafine mafi a koe.

¹² E maoki ko au ko lou kaiga feofi, kae e i ai le tasi leia e feofi ake iate au.

¹³ Nofo i leinei i le pouli. I apogipogi, kapau e loto loa a ia ke fai lona maua fakakaiga kiate koe, ti ke fai vave loa e ia ; kae kapau e leaise loto loa a ia ke fai e ia kiate koe lona maua fakakaiga, ti ko au, e kau fai loa a ia, e mauli le Eteleno ! Moe i lena o kaku ki le usu.

¹⁴ Na moe loa a Lute i vae o Poase o kaku ki le usu, ti na ala loa a Lute i le mafoata, i le temi leia e leikiaise mafai ai ke iloa mai e se tasi se tasi. Na pati loa Poase kiate ia : Ke aua na iloa na ulu se fafine ki le sasaaga fulumeto.

¹⁵ Ti na toe pati loa a ia : Aumai le taupulupulu leia iate koe, ti ke fakatali a ia. Na fakatali loa e Lute le taupulupulu, ti na liligi loa ki ai e Poase ni kilo olese e kau agafulu tupu lima, o fakaamo kiate ia. Ti na ulu loa Poase ki le kolo.

¹⁶ Na toe liliu loa a Lute ki lona tinana, ti na pati loa Naomi : Pe ko koe, ei loku fugao ? Na fakamatala loa e Lute kia Naomi a nea fuli ala na fai e Poase kiate ia.

¹⁷ Na pati loa a Lute : Na soli mai e ia kiate au a kilo olese anei e kau agafulu tupu lima ti na pati mai a ia : E leaise ke liliu ata loa ki lou tinana.

¹⁸ Ti na pati loa Naomi : Ke ke fimalie, ei loku fugao, o kaku ki lau iloa pe feaki loa le fakaoki o le nea leinei, talie e leaise malolo loa le tagata lena kae e leikiaise fakaoki e ia le nea leinei i le aso nei.