Lute 2 - Tosi Tapu

Lute i faisaga a Poase

¹ Na i ai loa se kaiga o le avaga o Naomi. Ko se tagata mauiga mo mou koloa, mei le famili o Elimeleke, ti na igoa a ia ko Poase.

² Na pati loa a Lute, le fafine Moape, kia Naomi : E kau kole atu kiate koe, ke ke tuku au ke kau ano o taetae ni taulu fulumeto i le faisaga o leia e alofa loa kiate au. Na tali loa Naomi kiate ia : Ano, ei loku taine.

³ Na ano loa a ia o tae fulumeto i se faisaga, i muli o le kau tuuti fulumeto. Ti na to manuia loa na maua le faisaga lena e Poase, leia mei le famili o Elimeleke.

⁴ Ti ko leinei, na au loa Poase mei Peteleemi, ti na pati loa a ia ki le kau gaoi : Ke nofo le Eteleno mo koutou ! Na lotou tali loa kiate ia : Ke tapuaki le Eteleno kiate koe !

⁵ Ti na pati loa Poase ki lana tagata fakasausau leia na leoleo ki le kau tuuti fulumeto : Ko ai le fafine lena ?

⁶ Na tali loa le tagata fakasausau leia na leoleo ki le kau tuuti fulumeto : Ko se fafine Moape leia na au mo Naomi mei le fenua o Moape.

⁷ Na pati mai a ia kiate au : Fakataga mai kiate au ke kau taetae fulumeto i muli o le kau tuuti fulumeto, i vasa o fui fulumeto. Ti e talu mei le usu, mei lana kaku mai, mo lana tuu i aluga o kaku mai ki le lakaga nei, ti na ano tua tasi a ia ki fale, o manavanava i se ga temi ikiiki.

⁸ Na pati loa Poase kia Lute : Fakalogo mai, ei loku taine, aua na ke ano loa o tae fulumeto i se tasi ake faisaga ; aua na ke fakamamao loa i leinei, kae ke ke nofo mau loa mo aku fafine fakasausau.

⁹ Tio ki le ganea leia e tuuti ai le fulumeto i le faisaga, ti ke ano i muli o fafine tanaki fulumeto. Kua kau fakatotonu ki aku tagata fakasausau ke aua na lotou fafa loa kiate koe. Ti ka ke fia inu loa, ti ke ano loa o inu i fa vai ala kua asu e le kau tagata fakasausau.

¹⁰ Ti na fakamapee loa a ia ki ona mata, ti na punou loa a ia ki le kele, o pati kiate ia : Kolea kua kau maua ai le alofa i ou mua, talie kua ke fia tokaga kiate au, leia ko se fafine matapule ?

¹¹ Na tali loa Poase kiate ia : Kua fakasa mai kiate au a nea fuli ala na ke fai ki lou tinana, talu mei le mate o lou avaga, ti mo lau tiaki lou tamana mo lou tinana, ti mo le fenua leia na ke tupu ai, kae ke au ki se kakai leia na leaise ke iloa i mua.

¹² Ke totogi e le Eteleno au gaoi kiate koe, ti ke soli atu se totogi lasi kiate koe e le Eteleno, le Atua o Iselaele, leia kua ke au o mumuni i lalo o ona kapakau !

¹³ Ti na pati loa a Lute : Oi, ke kau maua se kalasia i ou mata, ei loku aliki ! Talie kua ke fakapelepelei loku loto, ti kua ke masau ki le loto o lau fafine fakasausau ; logo ai e leaise kau faipe se tasi o au fafine fakasausau.

¹⁴ I le temi o le kai, na pati loa Poase kia Lute : Au ki leinei, kai le pane, ti ke peke lau koga pane ki le sosa. Na tonatona loa a ia i tafa o le kau tuuti fulumeto. Na soli loa kiate ia ni fuai fulumeto tunu ; ti na kai loa a Lute o makona, ti na taupau loa e ia le nea leia na toe.

¹⁵ Ti na tuu ake loa a ia o tae fulumeto. Na tuku loa e Poase le fakatotonu leinei ki ana tagata fakasausau : Ke toe tae fulumeto foki a ia i vasa o fui fulumeto, ti ke aua na kotou fakavisi loa kiate ia ;

¹⁶ ti ke kotou too foki ni taulu fulumeto i fui fulumeto, ke tae e ia, ti ke aua na kotou ita loa kiate ia.

¹⁷ Na tae fulumeto loa a Lute i le faisaga o kaku ki le afiafi, ti na sasa loa e ia le fulumeto leia na tae e ia. Na maua loa e ia ni kilo fuai fulumeto e kau tolu.

¹⁸ Na ave loa e ia lana taga fulumeto ki le kolo, ti na fakasa loa e ia ki lona tinana le nea leia na tae e ia. Na toe avake foki e ia le toe o lana nea kai kia Naomi.

¹⁹ Na pati loa lona tinana kiate ia : Na ke tae fulumeto ifea i le aso nei, ti na ke gaoi ifea ? Ke manuia leia na tokaga atu kiate koe ! Ti na fakasa loa e Lute kia Naomi le faisaga leia na gaoi ai a ia, o pati : Ko le tagata leia na kau gaoi ai i le aso nei e igoa ko Poase.

²⁰ Na pati loa Naomi ki lona fugao : Ke tapuakina a ia e le Eteleno, leia e manavaalofa kia latou ala e mauuli ofaipe lona manavaalofa kia latou kua mamate ! Ti na toe pati loa Naomi kiate ia : Ko le tagata lena ko lota kaiga totonu, e kau a ia kia latou ala e ofi kia taua.

²¹ Ti na pati loa a Lute, le fafine Moape : Na pati mai foki a ia : Nofo mo aku tagata fakasausau, o kaku ki le oki o le tuuti o laku fulumeto.

²² Ti na pati loa Naomi kia Lute, lona fugao : E malie, ei loku fugao, ke ke ano fakatasi mo ana fafine fakasausau, ti ke aua na maua loa a koe i se tasi ake faisaga.

²³ Ti na nofo loa a Lute mo fafine fakasausau a Poase, o tae fulumeto, o kaku ki le oki o le tuuti o le olese mo le fulumeto. Ti na nofo a ia mo lona tinana.