Lute 1 - Tosi Tapu

Pipiki o Lute kia Naomi

¹ I le temi o le kau tui fakamaau, na to loa se oge i le fenua. Na ano loa se tagata o Peteleemi i Suta mo lana avaga, mo ona vosa e toka lua, o nofo i le fenua o Moape.

² Ko le igoa o le tagata lena ko Elimeleke, ko lana avaga ko Naomi, ti ko ona vosa ko le tasi ko Makelone ti ko le tasi ko Kilisone ; na lotou au mei Efalata, mei Peteleemi i Suta. I lalatou kaku ki le fenua o Moape, na lotou fakatuu loa i ai lolatou nofoaga.

³ Na mate loa Elimeleke, avaga o Naomi, ti na nofo loa Naomi mo ona tamaliki e toka lua.

⁴ Na la avaga loa mo ni fafine Moape, na igoa le tasi ko Olipa, ti na igoa le tasi ko Lute, ti na lotou nonofo loa i Moape o fakaano ki fetuu e kau agafulu.

⁵ Na toe mamate loa Makelone mo Kilisone, ti na nofo toka tasi loa Naomi, kua pupuli ona tama e toka lua mo lona avaga.

Toe liliu o Naomi ki Suta

⁶ Ti na tuu ake loa Naomi, a ia mo ona fugao, ke lotou mavae i le fenua o Moape, talie na logo loa a ia i le fenua o Moape kua asiasi le Eteleno ki lona kakai ti kua soli e ia se pane kiate ia.

⁷ Na mavae loa a ia i le ganea leia na nofo ai, mo ona fugao, ti na lotou kamata saele loa i le ala ke toe liliu ki le fenua o Suta.

⁸ Ti na pati loa Naomi ki ona fugao : Kolua ano, kolua tasi toe liliu ki le fale o lona tinana ! Ke tuku e le Eteleno lona agamalie kia koulua ofaipe lokoulua agamalie kia latou ala kua mamate ti mo au foki !

⁹ Ke fai e le Eteleno ke kolua maua taki toka tasi se malolo i le fale o se tagata ! Ti na sogi loa a ia kia laua. Na la siki loa ki aluga ola leo, ti na la fetagisi loa o leo lasi ;

¹⁰ ti na la pati loa kia Naomi : E leai, e ma ano loa mo koe ki lou kakai.

¹¹ Na pati loa Naomi : Kolua toe liliu, ei oku fugao ! Kolea e kolua au ai loa mo au ? Pe koi kau maua loa ni tamaliki i loku manava, ke liliu ko ni okoulua avaga ?

¹² Ke kolua toe liliu, ei oku fugao, ke kolua ano ! E leaise koi mafai ke kau avaga talie kua kau matua. Ti kapau e kau pati loa : E kau maua se amanaki malie ; kapau i le po fai leinei e kau momoe loa mo soku avaga ti e kau fanaui loa ni vosa,

¹³ pe kolua talitali loa ke la lalasi, pe kolua fakafiti loa ke kolua toe avaga mo ni iki ake ? E leai, ei oku fugao ! O tupu ko koulua, kua kau nofo i se mamae lasi talie kua siki le lima o le Eteleno kiate au.

¹⁴ Ti na la siki ake loa ki aluga ola leo, o la toe fetagisi leo lasi loa. Na sogi loa Olipa ki lona tinana o poloaki kiate ia, kae na pipiki loa a Lute kia Naomi.

¹⁵ Na pati loa Naomi kia Lute : Ko leinei, kua toe liliu loa lou taina ki lona kakai mo ona atua ; ke ke toe liliu, ofaipe lou taina.

¹⁶ Na tali loa a Lute : Aua na ke fakamakeke au ke kau tiaki a koe, ti ke kau toe liliu o mamao mo koe ! Ko le ganea leia e ke ano loa ki ai, e kau ano loa ki ai ; ko le ganea leia e ke nofo loa i ai, e kau nofo loa i ai ; e liliu loa lou kakai ko loku kakai, ti e liliu loa lou Atua ko loku Atua ;

¹⁷ Ko le ganea leia e ke mate ai loa, e kau mate ai loa ti e kau tanu ai loa. Ke tautea au e le Eteleno i lona makeke katoa, mo kapau e i ai se tasi ake a nea i le mate e vaei ia loa au meiate koe !

¹⁸ I lana tio kua tuu makeke le loto o Lute ke ano mo ia, na tuku loa e Naomi lana fakamakeke kiate ia ke nofo.

¹⁹ Na la fanoga fakatasi loa o kaku ki Peteleemi. I lala ulu ki Peteleemi, na gatuu loa le kolo katoa, o tupu ko laua, ti na pati loa a fafine : Pe ko Naomi koia leinei ?

²⁰ Na pati loa Naomi kia latou : Aua se kotou fakaigoa au ko Naomi, kotou fakaigoa au ko Mala, talie kua fakaapele au e le Mafimafi ki le kona.

²¹ Na kau mou koloa i laku mavae i leinei, ti kua fakaliliu mai au e le Eteleno mo lima ata. Kolea e kotou fakaigoa ai loa au ko Naomi, kae kua tiaki au e le Eteleno, ti kua fakamamaei au e le Mafimafi ?

²² Ko lena loa le toe liliu a Naomi mei Moape mo lona fugao ko Lute, le fafine Moape. Na la kaku loa ki Peteleemi i le kamataaga o le temi tuuti o le olese.