Luka 9 - Tosi Tapu

Gaoi a le tino agafulu tupu lua

¹ Na fakatasi loa e Sesu le tino agafulu tupu lua, ti na soli loa e ia kia latou le makeke mo le pule ki temonio fuli, ti mo le makeke ke fakamauli ai a masaki.

² Ti na kakau loa e ia latou ke ano o fakamafola le Puleaga o le Atua, ti mo fakamauli a masaki.

³ Na pati loa Sesu kia latou : Aua na kotou too ki le fanoga se tokotoko, pe ko se taga, pe ko se pane, pe ko se paaga, ti aua na kotou ave ni kofu e lua.

⁴ I fale ala e kotou ulu ai, kotou nonofo i ai o kaku ki lakotou mavae.

⁵ Ti kapau e leaise tali koutou e le kakai, kotou mavae mei le kolo lena, ti kotou tutui le efu i okoutou vae, ko se fakamaoki a ia kia latou.

⁶ Na ano loa le kau tisipulo, ti na lotou fakalaka loa i kolo liliki fuli, o fakasa le logo malie, ti mo fakamauli a masaki i ganea fuli.

Elote

⁷ Na logo loa le sau ko Elote ki nea fuli kua soko, ti na leaise iloa e ia sana manatu. Talie na pati a iki ko Soane-Patita kua toe tuuake mei le kau mate ;

⁸ Ti ko iki ko Elia kua sa ; ti ko iki ake ko se tasi o le kau polofeta afea leia kua toe tuuake mei le kau mate.

⁹ Kae na pati loa Elote : Kua kau fakatotonu ke tuuti le ua o Soane ; ti ko ai leinei e kau logo e masaui ki ai a nea anei ? Ti na faiga loa a ia ke tio kia Sesu.

Fagai o tagata e tino afe lima i le toafa

¹⁰ Na toe liliu mai loa le kau apositolo, o fakamatala kia Sesu a nea fuli ala na lotou fai. Ti na taki loa e ia latou, ke ano ki se ganea lavaki, i le fetuu o se kolo na igoa ko Petesaita.

¹¹ Kae na iloa loa a ia e le kakai, ti na lotou muli loa iate ia. Na fakatalitali loa latou e Sesu, ti na folafola loa a ia kia latou ki le Puleaga o le Atua ; na fakamauli foki e ia latou ala na aoga ke fakamauli.

¹² I le malu o le afiafi, na fakafeofi ake loa le tino agafulu tupu lua kia Sesu, o pati kiate ia : Kakau le kakai ke ano ki kolo liliki ti mo kolo uta ala e feofi mai, o moe ai ti mo afa ai ni nea kai, talie e tou nonofo i se ganea lavaki.

¹³ Na pati loa Sesu kia latou : Soli e koutou totonu kia latou se nea ke kai. Kae na lotou tali loa : E motou maua fai ni fa pane e lima mo ni ga ika e lua. Pe ke loto ke motou ano o totogi mai ni nea kai ki le kakai fuli leinei !

¹⁴ Ko leinei, na i ai se kakai leia na fakaano ki tino afe e lima tagata. Na pati loa Sesu ki ana tisipulo : Kotou fakanofo ki lalo le kakai, o fakaatu latou ke taki tino lima le atu.

¹⁵ Na lotou fai loa a ia, na lotou fakanofo loa latou fuli ki lalo.

¹⁶ Na too loa e Sesu a fa pane e lima mo ga ika e lua, ti na tagaki loa ona mata ki le lagi o fakafetai ki le Atua. Ti na tofitofi loa e ia a fa pane mo ga ika, o soli ki ana tisipulo ke lotou tufa latou ki le kakai.

¹⁷ Na lotou kai fuli loa o makokona, ti na ave loa ni kete e kau agafulu tupu lua kua apelepele i toei kaiga.

Fakasa e Petelo ko Sesu ko le Kilisito

¹⁸ I se aso leia na faikole ai loa Sesu toka tasi, ti na nake loa ana tisipulo kiate ia, ti na fai loa e ia kia latou le vesili leinei : E pati le kakai ko ai au ?

¹⁹ Na lotou tali loa : E pati a iki ko Soane-Patita ; ti e pati a iki ko Elia ; ti e pati a iki ko se tasi o le kau polofeta afea leia kua toe tuuake.

²⁰ Na toe vesili loa a ia kia latou : Kae kia koutou, e kotou pati ko ai au ? Na tali loa Petelo : Ko le Kilisito o le Atua.

²¹ Na fakatotonu fakamakeke loa e Sesu kia latou ke aua na masaui a ia ki se tasi.

Fakasa e Sesu o lona mate mo lona toe tuuake

²² Ti na toe pati loa Sesu : e tonu ke mamae lasi ai le Vosa o le tagata, ti ke tiaki a ia e le kau fakamatuatua, mo le kau pule faisakilifisio, mo le kau sekelipa, ti ke tamate a ia, ti ke toe tuuake loa a ia i le tolu o aso.

Mulimuli ia Kilisito

²³ Ti na pati loa a ia ki le kau tisipulo fuli : Kapau e loto se tasi ke muli mai iate au, ke fakafiti a ia kiate ia totonu, ke amo e ia lona koluse i le aso taki tasi, ti ke muli mai a ia iate au.

²⁴ Ko leia e loto ke saofaki ia lona mauli e fakapuli noa loa a ia, kae ko leia e fakapuli noa loa lona mauli o tupu ko au e saofaki ia loa a ia.

²⁵ Ti kolea le aoga ki se tagata lana maua le malama nei katoa mo kapau e puli noa a ia pe maumau a ia totonu ?

²⁶ Kapau e luma loa se tasi kiate au ti mo aku folafola, e toe luma loa le Vosa o le tagata kiate ia, mo ka au loa a ia i lona kololia ti mo leia o le Tamana mo le kau aselo maokioki.

²⁷ E kau fakasa maoki atu kia koutou, ko ni iki ia latou ala e nonofo i leinei e leaise mamate loa kae e leaise lotou tio i mua ki le Puleaga o le Atua.

Sa o le kololia o Sesu i le mauga

²⁸ Na sili loa ni aso e valu ki le fakasa e Sesu o folafola ana, ti na too loa e ia Petelo, mo Soane, mo Sakopo, ti na pale loa a ia ki se mauga, o faikole i ai.

²⁹ I le lolotoga o lana faikole, na fetogi loa ona mana, ti na liliu loa ona teu o tea gigila.

³⁰ Ti ko leinei, na masau ni tagata e toka lua mo ia : Ko Moisese mo Elia,

³¹ ala kua sa mai i le kololia, o masau mo ia ki lana pale ki Selusalemi leia e tonu ke fai loa e ia.

³² Na mamafa ai a mata o Petelo mo ona kaukau nea i le fia momoe ; kae i lalatou alaala, na lotou tio loa ki le kololia o Sesu mo tagata e toka lua ala na tutuu mo ia.

³³ I le mavae a tagata ana ia Sesu, na pati loa Petelo kiate ia : Pule, e malie ke tou nonofo i leinei ; tou fakatuu ni falela e tolu, se tasi kiate koe, mo se tasi kia Moisese, ti mo se tasi kia Elia. Na leaise iloa e ia le nea leia na masau a ia ki ai.

³⁴ I le lolotoga o lana masau, na au loa se ao o kofu latou ; ti na i lasi ai le kau tisipulo i le tio kua takatakai latou e le ao.

³⁵ Ti na logo mai loa se leo mei le ao, o pati : Ko ia leinei ko loku Alo filifiliia, kotou fakalogo kiate ia !

³⁶ I le oki o le masau a le leo, na lotou tio loa kia Sesu toka tasi. Na lotou fakalologo loa, ti na leaise lotou fakamatala fua ki se tasi, i le temi lena, le nea leia na lotou tio ki ai.

Fakamauli o se toe na fakamamae e se laumalie veli

³⁷ I leia ake a aso, na lotou ifo loa mei le mauga, ti na au loa se kakai toka api o fakafelavei kia Sesu.

³⁸ Ti na kalaga loa se tagata mei loto malie o le kakai : Pule, e kau kole atu kiate koe ke ke tio mai ki loku vosa, talie ko loku vosa fuatasi.

³⁹ E too a ia e se laumalie veli, ti fokifa e kalaga a ia ; ti e lu fakamakeke a ia e le laumalie veli, o fakapiau ona gutu, ti mo lomi fakaveliveli a ia i mua o lana mavae iate ia.

⁴⁰ Na kau kole ki au tisipulo ke lotou kapu le laumalie veli, ti na leaise lotou mafai a ia.

⁴¹ Na tali loa Sesu : Lanu tui gataa mo agaveli, e kaku loa ki afea laku nofo mo koutou, mo laku kataki koutou ? Aumai ki leinei lou vosa.

⁴² I lana fakafeofi ake, na ti loa a ia e le temonio ki le kele, ti na lu fakaveliveli loa e ia a ia. Kae na valoki loa e Sesu le laumalie veli, ti na fakamauli loa e ia le toe, o tuku a ia ki lona tamana.

⁴³ Ti na lotou punamauli loa i le mafimafi o le Atua. Kae i lalatou punamauli ki nea fuli na fai e Sesu, na pati loa a ia ki ana tisipulo :

Fakasa o lona mate mo lona toe tuuake

⁴⁴ Kia koutou, kotou fakalogo malie mai ki le nea leinei : E tuku loa le Vosa o le tagata ki lima o tagata.

⁴⁵ Kae na leaise matala le kau tisipulo ki le folafola lena, talie na fufu a ia kia latou, o tupu ke aua na lotou matala ki lona uiga ; ti na lotou i i le vesili kiate ia ki le nea lena.

Visi a tisipulo : leia e lasi ia latou

⁴⁶ Kae, na tupu loa se manatu i olatou loto ke iloa pe ko ai e lasi ia latou.

⁴⁷ I le iloa e Sesu le manatu lena i olatou loto, na too loa e ia se ga toe, o fakatuu i ona tafa,

⁴⁸ ti na pati loa a ia kia latou : Ko leia e tali ia i loku suafa le ga toe leinei e tali e ia a au totonu ; ti ko leia e tali ia a au e tali ia leia na kakau ia mai au. Talie ko leia e ikiiki ia koutou fuli, ko ia leia e lasi.

Fia nealasi fakalotu

⁴⁹ Na masau loa Soane, o pati : Pule, na motou tio ki se tagata e kapu ia ni temonio i lou suafa ; ti na motou taofi a ia, talie e leaise muli mai a ia ia tatou.

⁵⁰ Na tali loa Sesu kiate ia : Aua na kotou taofi a ia ; talie ko leia e leaise agatuu mai kia koutou e kau mo koutou.

Fakapapau a Sesu ke pale ki Selusalemi

⁵¹ Kua ofi loa le temi leia na tonu ai ke too a ia i le malama nei, na fakatotonu loa e Sesu ke pale ki Selusalemi.

⁵² Ti na kakau loa e ia i ona mua ni tagata avelogo, ke muamua iate ia, o ulu ki se kolo o le kau Samalitana, o teuteui se nofoaga kiate ia.

⁵³ Kae na leaise tali loa a ia e le kakai, talie na ano a ia ki Selusalemi.

⁵⁴ I le tio a tisipulo ki le nea lena, na pati loa Sakopo mo Soane : Aliki, pe ke loto ke ma lagiaki ke vilo mai se afi mei le lagi o tutu latou ?

⁵⁵ Na mafuli loa Sesu o valoki laua, o pati : E leaise kolua iloa le laumalie leia e taki ia koulua.

⁵⁶ Talie na leaise au le Vosa o le tagata ke fakapuli a mauli o tagata, kae ke fakamauli latou. Ti na lotou ano loa ki se tasi ake kolo.

Le mulimuli ia Sesu

⁵⁷ I lalatou ano i le ala, na pati loa se tagata kia Sesu : Aliki, e kau muli loa iate koe, i ganea fuli ala e ke ano loa ki ai.

⁵⁸ Na tali loa Sesu kiate ia : E maua e lenato ni nofoaga i le kele, ti e maua e manu lele o le lagi ni ofaga, kae e leaise maua e le Vosa o le tagata se ganea leia ke teki ai lona ulu.

⁵⁹ Ti na pati loa a ia ki le tasi : Muli mai iate au. Ti na tali loa le tagata lena : Aliki, fakataga mai ke kau ano mua o tanu loku tamana.

⁶⁰ Kae na pati loa Sesu kiate ia : Tuku le kau mate ke tanu ia olatou mate ; kae ko koe, ano o fakasa le puleaga o le Atua.

⁶¹ Na pati loa le tasi : E kau muli loa iate koe, Aliki, kae fakataga mai ke kau ano mua o poloaki mo loku famili.

⁶² Na tali loa Sesu kiate ia : Ko leia e teki lona lima ki le saliote, ti toe tio ki muli, e leaise aoga a ia ki le puleaga o le Atua.