Luka 8 - Tosi Tapu

Fafine ala na muli ia Sesu

¹ Ti na sili a ia, na ano loa Sesu ki kolo lalasi mo kolo liliki, o akonaki le folafola ti mo fakasa le logo malie o le Puleaga o le Atua.

² Ti na ano mo ia le tino agafulu tupu lua ti mo ni fafine ala na fakamauli mei ni laumalie veli mo ni masaki : Ko Malia, na fakaigoa ko Malia mei Maketala, leia na mavae mei ai ni temonio e fitu,

³ mo Soana, avaga o Kusa ko le pule koloa a Elote, mo Susana, ti mo ni iki ake fafine e toka api, ti na lotou tausi a ia ki olatou koloa.

Le tagata muluki fakaili mo kele

⁴ Ti na fakatasi ake loa se kakai toka api kiate ia, leia na au mei kolo lalasi kesekese, ti na fai loa e ia le folafola fakatata leinei :

⁵ Na ano loa se tagata muluki fakaili o muluki lana fakaili. I lana muluki, na maluku loa se koga o le fakaili i tafatafa o le ala ; ti na takatakafi loa a ia, ti na kai loa a ia e manu lele o le lagi.

⁶ Na maluku loa se tasi a koga ki se ganea fatufatua ; i lana mafiti ake, na malo loa a ia, talie na leaise maua e ia se vai mokomoko.

⁷ Na maluku loa se tasi a koga ki loto malie o ni vao talatala ; na sosomo ake loa a vao talatala mo le fakaili, o taotao a ia o mate.

⁸ Na maluku loa se tasi a koga ki le kele malie ; i lana somo ake, na fua loa a ia o liuga kau lelau. I le oki o lana masau, na kalaga loa Sesu o leo lasi : Ko leia e i ai ni ona taliga ke fakalogo, ke logo.

⁹ Na vesili loa ana tisipulo kiate ia pe kolea le uiga o le folafola fakatata lena.

¹⁰ Na tali loa Sesu : Kua tuku atu kia koutou ke kotou iloa a misitelio o le Puleaga o le Atua ; kae kia latou ake ala, kua fakasa a ia i ni folafola fakatata, o tupu ke lotou tio mata kae aua na lotou tio fua, ti ke lotou logo taliga kae aua na lotou matala fua.

¹¹ Ko leinei le uiga o le folafola fakatata lena : Ko le fakaili, ko le folafola a le Atua.

¹² Ko latou ala i tafatafa o le ala, ko latou ala e logo, ti au le Tiapolo o too le folafola i olatou loto, o tupu ke aua na lotou tui ti ke fakamauli latou.

¹³ Ko latou ala na maluku i le ganea fatufatua, ko latou ala, i lalatou logo ki le folafola, na tali ia a ia i le fiafia ; kae e leaise lotou maua ia se aka, ti e lotou tui fua i se ga temi, ti e lotou siga i le lakaga o le fakasala.

¹⁴ Ko leia e vilo ki loto o le vao talatala, ko latou ala, i le logo ki le folafola, na ano, o tuku a ia ke taotao e tuania, mo koloa, mo fiafia o le mauli, ti e leaise lotou maua se fua leia e kaku o matua.

¹⁵ Ko leia e maluku ki le kele malie, ko latou ala e logo ki le folafola i se loto agatonu mo malie, ti e taofi ia a ia, ti e fua o tupu ko le kataki fualoa.

Le fa malama i le tekiaga malama

¹⁶ E leaise tutu e se tasi se malama ke fakapulou ki se kisi, pe ke velo i lalo o se palepale ; kae e teki e ia a ia ki aluga o le tekiaga malama, o tupu ke tio ki ai latou ala e ulu mai ki loto fale.

¹⁷ Talie e leaise nea munia, e leaise fakasa loa ; ti e leaise nea fufu, e leaise iloa loa ti e leaise tuku loa ki le malama.

¹⁸ Kotou tokaga ki lakoutou fakalogo ; talie e soli loa ki leia e maua, kae ki leia e nofo noa e toe too loa mo le nea foki leia e pati a ia e maua e ia.

Le tinana mo fetaina o Sesu

¹⁹ Na au loa kiate ia lona tinana mo ona fetaina ; kae na leaise mafai ke lotou masau kiate ia o tupu ko le kakai.

²⁰ Na pati loa se tasi kiate ia : Ko lou tinana mo ou fetaina e tutuu i fafo, ti e lotou fia felavei mo koe.

²¹ Kae na tali loa a ia : Ko loku tinana mo oku fetaina, ko latou ala e fakalogo ki le folafola a le Atua ti mo fai a ia.

Taofi e Sesu o le afaa

²² I se aso, na eke loa Sesu ki se vaka mo ana tisipulo. Na pati loa a ia kia latou : Tou fakalaka ki leia ake kauvai. Ti na lotou ano loa.

²³ I le lolotoga o le folau, na moe mate loa Sesu. Na to loa se sasataki ki le tai, ti kua apele le vaka i le vai, ti kua lotou teiteiki ai.

²⁴ Na lotou soso ake loa kia Sesu, o fafagu a ia o pati : Pule, pule, ka tou mamate ! I lana ala ake, na valoki loa e ia le matagi mo le galu, ti na la malu loa, ti na toe au loa le tokamalie.

²⁵ Ti na pati loa Sesu kia latou : Kofea lakotou tui ? Kae na lotou i lasi ai mo ofolele, o pati : Ko ai le tagata leinei, e lagiaki foki a ia ki le matagi mo le vai, ti e la fakalogo kiate ia ?

Kapu e Sesu o temonio i Katala

²⁶ Na lotou kaku loa ki le fenua o le kau Katala, leia e agaaga ki Kalilea.

²⁷ I le sopo a Sesu ki uta, na au loa ki ona mua se tagata o le kolo lena, leia na ulu tino ai se kau temonio. Talu mei fualoa na leai se toe tui e ia se kofu, ti na leaise nofo a ia i se fale, kae i ni tanuma.

²⁸ I lana tio kia Sesu, na kalaga loa a ia, ti na fakapulou loa a ia ki ona vae, o tagi leo lasi : Sesu, Alo o le Atua Taualuga, kolea iate au mo koe ? E kau kole atu kiate koe ke aua na ke fakamamae au.

²⁹ Talie kua fakatotonu e Sesu ki le laumalie veli ke mavae mei le tagata lena, leia kua fualoa lona too e le laumalie veli : Ti kua tua lasi le saisai o ona lima ki ni tini, mo ona vae ki ni kaui ukamea, kae na motumotusi e ia a sai, ti na ave a ia e le laumalie veli ki ganea lavaki.

³⁰ Na vesili loa Sesu kiate ia : Ko ai lou igoa ? Na tali loa a ia : Ko Lesio. Talie na toka api ai le kau temonio leia kua ulu tino iate ia.

³¹ Ti na lotou kolekole loa kia Sesu ke aua na fakatotonu ake e ia ke lotou ano ki le vanu.

³² Na i ai i le ganea lena se kau puaka lasi ai leia na fagai i le mauga. Ti na kolekole loa le kau temonio kia Sesu ke fakataga ake ke lotou ulu ki puaka ana, ti na fakataga loa e ia kia latou.

³³ Na mavae loa le kau temonio mei le tagata o ulu ki puaka, ti na maluluku loa le kau puaka i ni fakamakilakila ki le tai, o malemo i ai.

³⁴ Ko latou ala na fagai ia le kau puaka, i lalatou tio ki le nea leia na soko, na fesolaki loa o fakamafola le logo i le kolo lasi mo kolo uta.

³⁵ Ti na ano loa a kakai o tio ki le nea leia na soko. Na lotou kaku loa kia Sesu, ti na lotou maua loa le tagata leia na mavae ai le kau temonio, kua tonatona i ona vae, kua kofu, ti kua toe malama foki lona fakakaukau. Ti na lotou i lasi loa.

³⁶ Ko latou ala na tio mata ki le nea katoa na soko, na fakamatala ia loa ki le kakai le fakamauli o le tagata avagaia.

³⁷ Ti na kole loa e le kakai katoa o le fenua o le kau Katala kia Sesu ke fakamamao a ia meia latou, talie na lasi ai lolatou i. Ti na sopo loa Sesu ki le vaka, o toe liliu.

³⁸ Ko le tagata leia na mavae ai le kau temonio, na kole ake loa kia Sesu ke fakataga ake ke nofo a ia mo ia. Kae na kakau loa a ia e Sesu, o pati :

³⁹ Toe liliu ki lou fale, o fakamatala a nea fuli ala na fai e le Atua kiate koe. Ti na ano loa le tagata o fakasa i le kolo katoa a nea fuli ala na fai e Sesu kiate ia.

Le taine o Sailusi mo le fafine pupuke

⁴⁰ I lana toe liliu mai, na fakatalitali loa Sesu e le kakai, talie na talitali le kakai katoa kiate ia.

⁴¹ Ti ko leinei, na kaku ake loa kiate ia se tagata na igoa ko Sailusi. Ko le pule a ia o le sinakoka. Na punou loa a ia ki vae o Sesu o kolekole kiate ia ke ulu ake mua ki lona fale,

⁴² talie ko lona taine fuatasi, leia na fetuu kau agafulu tupu lua, kua vave mate fua. Na lolotoga ano loa Sesu ki ai, ti na fetekeaki a ia e le kakai.

⁴³ Kae na i ai se fafine leia na pupuke talu mei ni fetuu e kau agafulu tupu lua, ti kua oki ona koloa ki le totogi o le kau toketa, kae na leaise fakamauli a ia e se tasi o latou.

⁴⁴ Na fakafeofi ake loa le fafine i muli o Sesu, o fafa ki le tapatapa o lona taupulupulu. I le lakaga fai lena na gato loa lona pupuke.

⁴⁵ Ti na pati loa Sesu : Ko ai leia na fafa mai kiate au ? I le fakafitifiti fuli a le kakai, na pati loa Petelo mo latou ala na tuu mo ia : Pule, e takatakai a koe ti mo fetekeaki a koe e le kakai, kae e ke pati : pe ko ai leia na fafa mai kiate au ?

⁴⁶ Kae na tali loa Sesu : Na i ai se tasi leia na fafa mai kiate au, talie na kau logoi kua mavae atu se makeke iate au.

⁴⁷ Ko le fafine, i lana tio kua iloa a ia, na au loa kua lulu o punou ki vae o Sesu, ti na fakasa loa e ia i mua o le kakai katoa le tupuaga o lana fafa kia Sesu, ti mo le nea leia kua soko kiate ia o tupu ai lona mauli fakapunamauli.

⁴⁸ Na pati loa Sesu kiate ia : Ei loku taine, kua fakamauli a koe e lau tui ; ano i le tokamalie.

⁴⁹ Koi lolotoga lana masau, kae oso mai loa se tasi mei le fale o le pule o le sinakoka, o pati : Kua mate lou taine ; aua na ke toe fakapakia ki le pule.

⁵⁰ Kae i le logo a Sesu ki le nea lena, na pati loa a ia ki le pule o le sinakoka : Aua na ke tuania, tui fua ti e mauli loa a ia.

⁵¹ I le kaku a Sesu ki le fale, na leaise fakataga loa e ia ke ulu se tasi mo ia, gato kia Petelo, mo Soane, mo Sakopo, ti mo le tamana mo le tinana o le toe.

⁵² Na fetagisi fuli le kakai mo lauga ki le taine. Na pati loa Sesu : Aua na kotou fetagisi ; e leaise mate a ia, kae e moe a ia.

⁵³ Ti na lotou gologolo loa kia Sesu, talie kua lotou iloa kua mate le taine.

⁵⁴ Kae na too loa e Sesu le lima o le taine, o pati leo lasi kiate ia : Fanau, tuu ki aluga.

⁵⁵ Ti na toe au loa lona laumalie kiate ia, ti na tuu loa a ia ki aluga i le lakaga fai lena ; ti na fakatotonu loa e Sesu ke soli kiate ia se nea ke kai.

⁵⁶ Na punamauli ai a matua o le taine, kae na fakatotonu loa e Sesu kia laua ke aua na la masau fua ki se tasi ki le nea leia kua soko.