Luka 5 - Tosi Tapu

Kalagai o uluaki tisipulo

¹ I le tuu a Sesu i le mata tai o Senesaleti, ti na fakatasi ake loa le kakai kiate ia ke fakalogo ki le folafola a le Atua.

² Na tio loa a ia ki ni vaka e lua i le mata tai, ala kua ifo mei ai a tagata tautai o fufulu olatou kupega.

³ Na sopo loa a ia ki se tasi o vaka ana, ko le vaka o Simone, ti na kole loa e ia kia Simone ke fakamamao fakaikiiki mei le kele, ti na tonatona loa a ia ki lalo o akonaki ki le kakai mei le loto vaka.

⁴ I le oki o lana masau, na pati loa a ia kia Simone : Soso atu ki le loloto, ti kotou fola okoutou kupega o fagota.

⁵ Na pati loa Simone kiate ia : Pule, na motou gaoi i le po katoa, o noa ; kae, i lau folafola, e kau fola loa a kupega.

⁶ Na latou fola loa a kupega, ti na lotou maua loa ni ika mauke ai, ti na kamata motumotu olatou kupega.

⁷ Na lotou taukalo loa ki olatou kau tautai i leia ake a vaka ke au o tokoi mai kia latou. Na lotou au loa, ti na lotou fafao loa a vaka lualua o apelepele, ti kua la vave goto foki.

⁸ I le tio a Simone Petelo ki le nea lena, na tutuli loa a ia o punou ki le kele i mua o Sesu, o pati : Aliki, fakamamao atu iate au, talie ko au ko se tagata agasala,

⁹ talie na ofolele a ia, mo latou fuli ala na nonofo mo ia, o tupu ko le lasi o ika kua lotou maua.

¹⁰ Na tatau foki mo Sakopo, mo Soane, vosa o Sepeteo, ko kau fai feua o Simone. Na pati loa Sesu kia Simone : Aua na ke i, e ke liliu maoki loa ko se tagata tautai tagata.

¹¹ Ti na lotou toso loa a vaka ki uta, ti na lotou tuku loa a nea fuli, kae lotou muli loa iate ia.

Fakamauli o se tagata kilia

¹² Na nofo Sesu i se tasi a kolo, ti ko leinei, ko se tagata kua apele i le kilia, i lana tio kia Sesu, na fakapulou loa a ia ki le kele, o fai kiate ia le kole leinei : Aliki, kapau e ke loto ki ai, e feala ke ke fakamea au.

¹³ Na falo loa e Sesu lona lima o fafa kiate ia, o pati : E kau loto ki ai, ke ke mea. I le temi fai lena, na mavae loa le kilia iate ia.

¹⁴ Na fakatotonu loa e Sesu ki le tagata : Aua na ke toe masau ki se tasi ki le nea lena. Kae ano o fakasa a koe ki le tagata faisakilifisio, ti mo momoli ki lou fakamea le nea leia na fakatotonu e Moisese, ke liliu le nea lena kia latou ko se fakamaoki.

¹⁵ Na toe asilisili ai le mafola o lona logologona, ti na au le kakai o toka api ai o fakalogo kiate ia, ti ke fakamauli e ia latou i olatou masaki.

¹⁶ Kae ko ia, na ano a ia mei ai ki ni potu lavaki, o faikole i ai.

Fakamauli o se tagata palalisia

¹⁷ I se tasi a aso, leia na akonaki ai Sesu, na nofo i ai ni kau faliseo mo ni kau toketa o le lao, ala na au mei kolo fuli o Kalilea, mo Sutea mo Selusalemi ; ti na sa le mafimafi o le Aliki i le fakamauli o ni kakai mei olotou masaki.

¹⁸ Ti ko leinei, na amo mai e se kau tagata se tagata palalisia i se palepale, ti na lotou faiga ke fakaulu a ia ki loto ti mo tuku a ia ki mua o Sesu.

¹⁹ Kae na leaise lotou maua se ganea leia ke fakaulu ai a ia, o tupu ko le api o le kakai. Ti na lotou kake loa ki le taufufu o le fale, ti na lotou ifoaki loa le tagata i se mavaa, mo lona palepale, ki loto malie o le fakatasi, i mua o Sesu.

²⁰ I lana tio ki lalatou tui, na pati loa Sesu : Tagata, kua fakamolemole au agasala.

²¹ Na kamata masau loa le kau sekelipa mo le kau faliseo, o pati : Ko ai leinei e fai ia ni fatituu ? Ko ai e mafai ke fakamolemole ia a agasala ? Pe leaise ko le Atua toka tasi ?

²² Kae i le iloa e Sesu alatou manatu, na masau loa a ia, o pati kia latou : Kolea e kotou maua ai ni manatu fenaaki i okoutou loto ?

²³ Kofea e faigaofie ake i le pati : Kua fakamolemole au agasala, mo le pati : Tuu ki aluga, o saele ?

²⁴ Kae o tupu ke kotou iloa e maua e le Vosa o le tagata i le malama nei le pule ke fakamolemole ai a agasala, ti na pati loa a ia ki le tagata palalisia : E kau fakatotonu atu kiate koe : tuu ki aluga, too lou palepale, ti ke ano ki lou kaiga.

²⁵ Ti na tuu ake loa a ia ki aluga i le temi fai lena, i mua o latou, o too le palepale leia na moe ai, ti na ano loa a ia ki lona kaiga, mo fakafetai ki le Atua.

²⁶ Na lotou punamauli fuli, ti na lotou fakakololia ki le Atua, ti na lotou apele i le i, o pati : Kua tou tio i le aso nei ki ni nea foou.

Kalagai o Levi

²⁷ I le oki o le nea lena, na mavae loa Sesu i lena, ti na tio loa a ia ki se tagata popelikano na igoa ko Levi, leia na eke i le pilo tukusau. Na pati loa Sesu kiate ia : Muli mai iate au.

²⁸ Ti na tuku loa e Levi a nea fuli, kae tuu loa a ia ki aluga, o muli ia Sesu.

Kalagai e Sesu ni kau agasala, kae leai ni kau agatonu

²⁹ Na fai loa e Levi se kaitasi lasi kia Sesu i lona fale, ti na nofo mo latou se kau popelikano toka api mo ni iki ake kakai i le laupapa kai.

³⁰ Na mumusu loa le kau faliseo mo le kau sekelipa, o pati ki ana tisipulo : Kolea e kotou kai mo inu ai mo le kau popelikano ti mo le kau agasala ?

³¹ Na pati loa Sesu kia latou : E leaise ko latou ala e saosaoa e aoga ki ai se toketa, kae ko le kau masaki.

³² Na leaise kau au o kalagai ki le fakasemala ni tagata agatonu, kae ni tagata agasala.

Sesunio ; kie foou mo utele foou

³³ Na lotou pati loa kiate ia : E sesunio sosoko mo faikole a tisipulo a Soane, ofaipe tisipulo a le kau faliseo, kae kai mo inu fai au tisipulo.

³⁴ Na tali loa Sesu kia latou : Pe feala ke kotou fakasesunio a kaukaunea o le tagata avaga kae koi nofo le tagata avaga mo latou ?

³⁵ E soko mai loa a aso ala e too ai loa le tagata avaga meia latou, ti e lotou sesunio loa i aso ana.

³⁶ Na tuku foki e ia kia latou se folafola fakatata : E leaise saei e se tasi i se kofu foou se masaei kie ke tapono ai se kofu afea ; talie e sae loa e ia le kofu foou, ti e leaise ano tasi le kofu foou mo le kofu afea.

³⁷ Ti e leaise tuku e se tasi se vino foou ki ni utele afea ; talie e motumotusi loa e le vino foou a utele afea, ti e puli noa loa le vino, ti e maumau loa a utele ;

³⁸ Kae e tonu ke tuku le vino foou ki ni utele foou.

³⁹ Ti e leaise tasi fua, kua inu ki se vino matua, e toe loto loa ki se vino foou, talie e pati a ia : E malie ake le vino matua.