Luka 3 - Tosi Tapu

Akonaki a Soane-Patita

¹ I le kau agafulu tupu lima fetuu o le pule o Tipele Sesale, - na kovana Posio Pilato i Sutea, ti na sau Elote i Kalilea, ti na sau lona taina ko Filipo i Itulea mo le telituale o Talakonita, ti na sau Lisaniasi i Apilene,

² ti na pule faisakilifisio Anasi mo Kaifa, - na fakasa loa le folafola a le Atua kia Soane, vosa o Sakalia i le toafa.

³ Ti na ano loa a ia i le fenua katoa i le tafatafa o le Solotane, o akonaki ki le papitema o le fakasemala, o tupu ko le fakamolemole o agasala,

⁴ o mulimuli ki le nea leia kua tosi i le folafola a le polofeta ko Isaia : Ko le leo o leia e kalaga i le toafa : Kotou teuteu le ala o le Aliki, Kotou fakatokatoka ona anoaga.

⁵ Ke tanu a vaivailiua fuli, Ke soloi ki lalo a mauga mo patu fuli ; Ke fakasakosako a ala pikopiko, Ti ke fakalautatau a ala patupatu.

⁶ Ti e tio loa a kanofi fuli ki le fakamauli o le Atua.

⁷ Na pati loa Soane kia latou ala na au ke papitema e ia : Lanu o gata velo, ko ai na ako atu ia kia koutou ke kotou fesolaki mei le sausau ka au ?

⁸ Kotou fakatupu mua ni fua ala e gali mo le fakasemala, kae aua na kotou pati i okoutou loto : E motou tamana kia Apalaamo ! Talie e kau fakasa kia koutou e mafai noa le fakatupu e le Atua mei fatu anei ni fanau kia Apalaamo.

⁹ Kua tuu foki le toki i aka o laakau : Ko laakau fuli ala e leaise maua ia ni fua malilie, e tuuti loa o ti ki le afi.

¹⁰ Na vesili le kakai kiate ia, o pati : Kolea loa le nea leia e tonu ke motou fai ?

¹¹ Na tali loa Soane kia latou : Ko leia e maua ia ni kofu e lua ke vaevae e ia mo leia e sala kofu, ti ko leia e maua ia se nea kai ke toe fai fenaaki.

¹² Na au foki ni popelikano ke papitema, ti na lotou pati loa kiate ia : Pule, kolea e tonu ke motou fai ?

¹³ Na tali loa a ia kia latou : Ke aua na kotou siki a totogi kae kotou mulimuli ata ki le nea leia kua fakatotonu e le lao.

¹⁴ Ti na vesili foki ni tagata solia kiate ia : Ti ko matou, kolea e tonu ke motou fai ? Na tali loa Soane kia latou : Ke aua na kotou kaia se paaga i le fakamakeke pe ko le kaka ki se tasi, kae ke kotou fiafia i lokoutou totogi.

¹⁵ I le nofo talitali a le kakai, ti mo le fia iloa i olatou loto pe ko Soane ko le Kilisito,

¹⁶ na pati loa Soane kia latou fuli : Ko au, e kau papitema koutou ki le vai ; kae e au loa leia e makeke ake iate au, ti e leaise kau gali ke kau tatala ia a sai o ona taka. Ko ia leia e papitema ia loa koutou ki le Laumalie Maokioki mo le afi.

¹⁷ E too e ia i lona lima lana laakau sasa fulumeto ; e fakamea loa e ia lona sasaaga fulumeto, ti e tanaki loa e ia le fulumeto ki lona fale tanaki magiti, kae e tutu loa e ia a kaui fulumeto i se afi leia e leaise toe mate loa.

¹⁸ Na fakasa fenaaki e Soane le logo malie ki le kakai, o toe tuku foki e ia kia latou ni iki folafola fakalotomakeke o lasi ai.

¹⁹ Kae na valoki e Soane le sau ko Elote, o tupu ko Elotiasi, avaga o lona taina totonu ko Filipo, ti mo nea veveli fuli ala na fai e ia.

²⁰ Ti na toe fakalasi foki e Elote ana agaveli fuli, o fakaulu Soane ki le pilisoni.

Papitema o Sesu

²¹ I le oki o le papitema o le kakai katoa, na papitema foki Sesu ; ti i le lolotoga o lana faikole, na mavaa loa le lagi,

²² ti na ifo loa le Laumalie Maokioki kiate ia o fakaata ki se lupe. Ti na fakasa loa e se leo mei le lagi, o pati : Ko koe ko loku Alo alofaina, ti ko koe leia kua kau tuku ki ai loku alofa katoa.

Sakoga o Sesu-Kilisito

²³ Na fetuu kau tolu Sesu i lana kamata fai lana gaoi, kae na pati ko le vosa a ia o Sosefo, vosa o Eli,

²⁴ vosa o Matate, vosa o Levi, vosa o Melesi, vosa o Sanai, vosa o Sosefo,

²⁵ vosa o Matatiasi, vosa o Amosi, vosa o Naume, vosa o Esili, vosa o Nakai,

²⁶ vosa o Maati, vosa o Matatiasi, vosa o Semei, vosa o Soseke, vosa o Sota,

²⁷ vosa o Soanane, vosa o Lesa, vosa o Solopapele, vosa o Salatiele, vosa o Neli,

²⁸ vosa o Melesi, vosa o Ati, vosa o Kosame, vosa o Elimatame, vosa o Ele,

²⁹ vosa o Sesu, vosa o Eliesele, vosa o Solime, vosa o Matate, vosa o Levi,

³⁰ vosa o Simeone, vosa o Suta, vosa o Sosefo, vosa o Soname, vosa o Eliakimi,

³¹ vosa o Melea, vosa o Mena, vosa o Matata, vosa o Natane, vosa o Tavite,

³² vosa o Isaia, vosa o Opeto, vosa o Poose, vosa o Salomone, vosa o Naasone,

³³ vosa o Aminatape, vosa o Atemini, vosa o Alini, vosa o Eselome, vosa o Pelesi, vosa o Suta,

³⁴ vosa o Sakopo, vosa o Isaake, vosa o Apalaamo, vosa o Telake, vosa o Nakole,

³⁵ vosa o Seluke, vosa o Lakau, vosa o Faleke, vosa o Epele, vosa o Sala,

³⁶ vosa o Kainame, vosa o Alepakesate, vosa o Seme, vosa o Noe, vosa o Lameke,

³⁷ vosa o Matusala, vosa o Enoke, vosa o Saleti, vosa o Maleleele, vosa o Kainane,

³⁸ vosa o Enosi, vosa o Seti, vosa o Atama, vosa o le Atua.