Luka 24 - Tosi Tapu

Toe tuuake o Sesu

¹ I le uluaki aso o le vasaa, na ano loa a fafine ki le tanuma, i le mafoata, o ave a nea fakamanogi ala na lotou teuteui.

² Na lotou maua atu loa le fatu kua tekai mei le tanuma ;

³ ti na lotou ulu loa ki loto kae na leaise lotou maua loa le tino o le Aliki Sesu.

⁴ I le sevaia o alatou fakakaukau, ko leinei, na sa loa kia latou ni tagata e toka lua, ala na teu gigila.

⁵ I lolatou i, o punou olotou mata ki le kele, na pati loa le sa tagata kia latou : Kolea e kotou afa ai i le kau mate leia e mauli ?

⁶ E leaise nofo a ia i leinei, kae kua toe tuuake a ia. Kotou manatui lana masau atu kia koutou, kae koi nofo a ia i Kalilea,

⁷ o pati : E tonu ke tuku le Vosa o le tagata ki lima o le kau agasala, ke tutuki a ia ki le koluse, ti ke toe tuuake a ia i le tolu o aso.

⁸ Ti na lotou manatui loa a folafola a Sesu.

⁹ Na lotou toe liliu loa mei le tanuma, o fakasa a nea fuli ana ki le tino agafulu tupu tasi ti mo la ake fuli.

¹⁰ Ko latou ala na fakasa ia a nea ana ki le kau apositolo, ko Malia mei Maketala, mo Soana, mo Malia tinana o Sakopo, ti mo la ake fafine ala na ano mo latou.

¹¹ Na fai a nea ana ki le kau apositolo pe ni moe miti, ti na leaise lotou tui ki fakamatala a fafine.

¹² Kae na tuu ake loa Petelo ki aluga, o makape ki le tanuma. Na faino loa a ia ki loto o le tanuma, ti na tio loa a ia ki kie ata e tuku i le kele ; ti na punamauli ai a ia ki le nea kua soko, ti na ano loa a ia ki lona kaiga.

Tisipulo e toka lua i le ala o Emausi

¹³ Ti ko leinei, i le aso foki lena, na ano ni tisipulo e toka lua ki se kolo na igoa ko Emausi, leia na mamao mei Selusalemi i ni kilometa e kau agafulu tupu tasi ;

¹⁴ ti na la masau ki nea fuli ala na soko.

¹⁵ I lala masau, na fakafeofi loa Sesu kia laua, o kau fanoga mo laua i le ala.

¹⁶ Kae na taofi ola mata ke aua na la iloa a ia.

¹⁷ Na pati loa Sesu kia laua : Koa nea ala e kolua masau ki ai ? Ti na la tutuu loa, o mata mamae ai.

¹⁸ Ti na tali loa kiate ia se tasi o laua, na igoa ko Keleopasi : Pe ko koe toka tasi i Selusalemi nei e leaise iloa ia le nea leia na soko i aso anei ? Ti na pati loa Sesu kia laua : Kolea le nea ?

¹⁹ Ti na la tali loa kiate ia : Le nea leia na soko kia Sesu mei Nasaleti, leia ko se polofeta makeke i gaoi mo masau i mua o le Atua ti mo mua o le kakai katoa,

²⁰ leia na tuku e le kau pule faisakilifisio ti mo omatou kau pule ke tautea ki le mate, o tutuki a ia ki se koluse.

²¹ Na motou fanaki ko ia leia ka fakamauli ia loa Iselaele ; kae mo nea fuli ana, ko le tolu leinei o aso mei le oki o nea ana.

²² E maoki foki na motou punamauli lasi ai, o tupu ko ni fafine o matou ala na ano i le mafoata ki le tanuma,

²³ ti na leaise lotou maua ia lona tino, ti na lotou au, o pati na sa ake kia latou ni aselo, o fakasa kua mauli a ia.

²⁴ Ti ko ni iki foki o latou ala na nonofo mo matou, na ano foki ki le tanuma, ti na lotou maua a nea fuli ofaipe le fakasa mai e fafine ; kae ko ia, na leaise lotou tio fua kiate ia.

²⁵ Ti na pati loa Sesu kia laua : Tagata sala atamai, ti mo tui gataa ki nea fuli ala kua fakasa e le kau polofeta !

²⁶ Pe na leaise tonu ai ke mamae le Kilisito i nea ana, ti ulu loa ki lona kololia ?

²⁷ Ti na kamata loa a ia meia Moisese ti mo le kau polofeta fuli, o fakamatala kia laua i le Tositapu katoa a nea o uiga mo ia.

²⁸ Na lotou kaku loa ki le kolo leia na la ano ki ai, ti na sakinake loa a ia e fia soko atu.

²⁹ Kae na la taofi loa a ia, o pati : Nofo mo maua, talie kua ofi le pouli, ti kua vave oki le aso. Na ulu loa a ia ki fale, ke nofo mo laua.

³⁰ I lana nofo mo laua i le laupapa kai, na too loa e ia le pane, o fakafetai, ti na tofitofi loa e ia a ia, o soli kia laua.

³¹ Ti na mavaa loa ola mata, ti na la iloa loa a ia ; kae na puli loa a ia mei ola mua.

³² Ti na la pati loa : Pe na leaise vevela ota loto, i lana masau mai kia taua i le ala, o fakamatala mai kia taua le Tositapu ?

Sa foou o Sesu i le aso lena

³³ Na la tutuu ake loa ki aluga i le ola fai lena, o toe liliu ki Selusalemi, ti na la maua loa le tino agafulu tupu tasi mo latou ala na nonofo mo latou, kua fakatasi,

³⁴ ti na lotou pati ake loa kia laua : Kua toe tuuake maoki le Aliki, ti kua sa a ia kia Simone.

³⁵ Na la fakamatala loa le nea leia na soko kia laua i le ala, ti mo lala iloa a ia i le tofitofi o le pane.

³⁶ I lala masau, na tuu loa Sesu totonu i loto malie o latou, o pati : Ke nofo le tokamalie mo koutou !

³⁷ Na lotou i lasi, mo lulu lasi, talie na lotou pati kua lotou tio ki se tuuola.

³⁸ Kae na pati loa a ia kia latou : Kolea e kotou i ai, ti kolea e tupu ai ni manatu fenaaki i okoutou loto ?

³⁹ Kotou tio mai ki oku lima mo oku vae, ko au totonu ; kotou fafa mai kiate au ti kotou tio : E leaise maua e le tuuola se kanofi mo ni ivi, ofaipe au leinei, e kotou tio mai ki ai.

⁴⁰ I lana masau lena, na fakaali loa e ia kia latou ona lima mo ona vae.

⁴¹ I le lasi o lolatou fiafia ti mo lolatou punamauli, na leaise lotou tui ko ia, ti na pati loa Sesu kia latou : Pe kotou maua i leinei se nea ke kai ?

⁴² Na lotou soli loa kiate ia se potu ika tunu.

⁴³ Ti na too loa e ia le nea lena, o kai i mua o latou.

Gaoi foou a le tino agafulu tupu tasi

⁴⁴ Ti na pati loa a ia kia latou : Ko nei a nea ala na kau fakasa atu kia koutou koi kau nofo mo koutou : E tonu ke fakasoko a nea fuli ala kua tosi kiate au i le lao a Moisese, mo le kau polofeta, ti mo pesalemo.

⁴⁵ Ti na fakamavaa loa e ia olatou atamai, ke lotou matala ki le Tositapu.

⁴⁶ Ti na pati loa a ia kia latou : E tuu foki i le tosi : E mamae loa le Kilisito, ti e toe tuuake loa a ia mei le kau mate i le tolu o aso,

⁴⁷ ti e fakasa loa le fakasemala mo le fakamolemole o agasala i lona suafa ki puleaga fuli, o kamata mei Selusalemi.

⁴⁸ Ko kau tagata fakamaoki koutou o nea ana.

⁴⁹ Ko leinei, e kau kakau mai loa kia koutou le nea leia na fakapapau e loku Tamana ; kae ko koutou, kotou nonofo i le kolo o kaku ki lakotou kofu le makeke mei aluga.

Asesione

⁵⁰ Na taki loa e ia latou o kaku ki Petania, ti na siki loa ona lima o tapuaki kia latou.

⁵¹ I le lolotoga o lana tapuaki kia latou, na mavae loa a ia meia latou, o ano ki le lagi.

⁵² Ti na lotou atolasio loa kiate ia, ti na lotou toe liliu loa ki Selusalemi i se fiafia lasi ai ;

⁵³ ti na lotou nonofo tuumau i le fale tapu, o fakavikiviki mo fakafetai ki le Atua.