Luka 23 - Tosi Tapu

Sesu i mua o Pilato

¹ Na lotou tutuu fakatasi fuli loa ki aluga, o taki Sesu ki mua o Pilato.

² Na lotou kamata fakalakasala loa a ia, o pati : Na motou maua le tagata leinei e fakatupu maveuveu ki le kakai, o tapui e ia le totogi o le tukusau kia Sesale, ti na pati a ia ko ia ko Kilisito, ko se sau.

³ Ti na vesili loa Pilato kiate ia, o pati : Pe ko le sau a koe o le kau Sutea ? Na tali loa Sesu kiate ia : Kua ke pati ki ai.

⁴ Na pati loa Pilato ki le kau pule faisakilifisio mo le kakai : E leaise kau maua fua se sala i le tagata nei.

⁵ Kae na lotou fakakinau loa, o pati : E lagai e ia le kakai ki lana akonaki : Na kamata a ia ki Kalilea, o fakalaka i Sutea katoa, o kaku mai ki leinei.

Sesu i mua o Elote

⁶ I le logo a Pilato ki le masau ki Kalilea, na vesili loa a ia pe ko le tagata leinei e Kalilea.

⁷ I le iloa e Pilato na au Sesu mei le fenua leia e sau ai Elote, na toe kakau loa e ia Sesu kia Elote, talie na nofo foki a ia i Selusalemi i aso ana.

⁸ I le tio a Elote kia Sesu, na fiafia lasi ai a ia ; talie kua fualoa ai lana oli ke tio kiate ia, o tupu ko nea ala na logo a ia ki ai o uiga mo ia, ti na amanaki a ia ke tio a ia ki le fai e Sesu o ni milakulo.

⁹ Na fai loa e ia ni vesili mauke kia Sesu, kae na leaise tali fua Sesu ki se nea.

¹⁰ Na tuu i ai le kau pule faisakilifisio mo le kau sekelipa, ti na lotou fakalakasala veli Sesu.

¹¹ Na gologolo loa kiate ia a Elote, mo lana kau tuu matapa, ti na lotou nukinuki loa kiate ia, o fakakofu a ia ki se kofu gigila, ti na lotou toe kakau loa a ia kia Pilato.

¹² I le aso totonu lena, na liliu loa Pilato mo Elote ko ni kaukau nea malie, laua ala na fili i mua.

Fakamaau o Sesu ki le mate

¹³ Na fakatasii loa e Pilato le kau pule faisakilifisio, mo le kau pule, ti mo le kakai, o pati kia latou :

¹⁴ Kua kotou aumai le tagata leinei kiate au talie na fakamaveuveui e ia le kakai. Ti ko leinei na kau fakavesilii a ia i okoutou mua, ti na leaise kau maua fua iate ia se sala i nea fuli ala na kotou tuku kiate ia ;

¹⁵ ti e toe tatau foki mo Elote, talie kua toe kakau mai e ia a ia kia tatou, ti ko leinei, na leaise fai fua e le tagata leinei se nea leia e tonu ke mate ai.

¹⁶ E kau fakalauatea loa a ia, i le oki o lona sasa.

¹⁷ Talie i Pasikate fuli, e maua ke fakalauatea e Pilato se tagata pilisoni e tasi.

¹⁸ Na lotou kalaga fakatasi fuli loa : Ke mate a ia, kae fakalauatea a Palapasi.

¹⁹ Na fakapilisoni le tagata lena o tupu ko se maveuveu leia na soko i le kolo ti mo se tukipo.

²⁰ Na toe masau loa Pilato kia latou mo le amanaki malie ke fakalauatea Sesu.

²¹ Kae na lotou kalaga loa : Kulusifiko, kulusifiko a ia !

²² Na toe masau loa Pilato kia latou, ko lona tua tolu a ia, o pati : Kolea le nea veli kua fai e ia ? Na leaise kau maua fua iate ia se nea leia e tonu ke mate ai. Koia e kau fakalauatea ai loa a ia i le oki o lona sasa.

²³ Kae na lotou toe kalaga fakamakeke, o kole ke kulusifiko a ia. Ti na fakalogo loa Pilato ki alatou kalaga,

²⁴ o pati : Fai ki le nea leia kua kotou kole mai ki ai.

²⁵ Ti na fakalauatea loa e ia leia na fakapilisoni o tupu ko le maveuveu mo le tukipo, leia na kole ake e le kakai ; kae tuku loa e ia Sesu ki lolatou finegalo.

I le ala o Kalevalio

²⁶ Na lotou ave loa Sesu, ti na lotou too loa se tagata ko Simone mei Silene, leia na au mei faisaga, ti na lotou fakaamo loa kiate ia le koluse i muli o Sesu.

²⁷ Na mulimuli iate ia se kakai toka api ai ti mo ni fafine ala na pa ia olatou fatafata, o tagi laulau kiate ia.

²⁸ Na mafuli loa Sesu kia latou, o pati : Taineliki o Selusalemi, aua na kotou tagi kiate au ; kae kotou tagi kia koutou mo akoutou fanau.

²⁹ Talie ko leinei, e soko mai loa ni aso ala e pati ai loa : Manuia latou ala e paa, manuia a manava ala na leaise fanau, ti mo u ala na leaise fakau ia !

³⁰ Ti e pati loa ki mauga : Kotou vivilo mai kia matou ! Ti ki mauga liliki : Taotao matou !

³¹ Talie, kapau e fai le nea leinei ki le laakau mata, ti kolea loa ka soko ki le laakau malo ?

³² Na taki foki mo ni tagata agaveveli e toka lua ke tamate fakatasi mo Sesu.

Tutuki o Sesu ki le koluse

³³ I lalatou kaku ki le ganea na igoa ko Ulupoko, na lotou tutuki loa Sesu ki le koluse mo tagata agaveveli e toka lua, ko le tasi i le fetuu atamai, ti ko le tasi i le fetuu sema.

³⁴ Na pati loa Sesu : Tamana, fakamolemole kia latou, talie e leaise lotou iloa le nea leia e lotou fai. Ti na lotou vae loa ona kofu ia latou, o toso.

³⁵ Na tutuu le kakai i ai, o tio. Na gologolo le kau pule kiate ia, o pati : Na saofaki e ia ni kakai kese ; ke saofaki e ia a ia totonu mo kapau ko ia ko le Kilisito, ko le Filifiliia a le Atua.

³⁶ Na gologolo foki le kau solia kiate ia ; na lotou fakafeofi mai, o soli kiate ia se vinika,

³⁷ o pati : Kapau ko le sau a koe o le kau Sutea, saofaki e koe a koe totonu !

³⁸ Na tosi i ona aluga a kupu anei : Ko ia leinei ko le sau o le kau Sutea.

Fakasemala a le tagata kaia

³⁹ Na nukinuki kiate ia se tasi o le sa tagata agaveveli ala na kulusifiko mo ia, o pati : Pe leaise ko le Kilisito a koe ? Saofaki a koe totonu, ti ke saofaki foki mo maua !

⁴⁰ Kae na valoki a ia e leia ake, o pati : Pe leaise ke i ki le Atua, a koe leia e tali ia se tua o tatau mo ia ?

⁴¹ Kia taua, e tonu ke ta tali a ia, talie ko le totogi a ia o ata agaveli ; kae kiate ia leinei, na leaise fai fua e ia se nea veli.

⁴² Ti na pati loa a ia kia Sesu : Aliki, manatui au mo ka ke au loa i lou puleaga.

⁴³ Na tali loa Sesu kiate ia : E kau pati maoki atu kiate koe, i le aso nei e ke nofo loa mo au i le Palatiso.

Mate o Sesu

⁴⁴ Na kaku loa ki le ono o ola, ti na fakapouli loa le malama nei katoa, o kaku ki le iva o ola.

⁴⁵ Ti na fakapouli loa le laa, ti na masae loa i loto malie le kie tapono o le fale tapu.

⁴⁶ Na kalaga loa Sesu o leo lasi : Tamana, e kau tuku loku laumalie ki ou lima. Ti oki, na mate loa a ia.

⁴⁷ I le tio a le setulio ki le nea leia kua soko, na fakakololia loa a ia ki le Atua, o pati : E maoki, ko le tagata leinei ko se tagata agatonu.

⁴⁸ Ti ko le kakai katoa leia na fakatasi ake i le fia tio ki le fai kulusifiko, i le oki o lalatou tio ki le nea leia kua soko, na lotou toe liliu loa, o pa olatou fatafata.

⁴⁹ Ko kaukau nea fuli o Sesu, ti mo fafine ala na mulimuli iate ia mei Kalilea, na tutuu loa mei mamao, o tio ki nea ana.

Tuku o Sesu ki le tanuma

⁵⁰ Na i ai se tagata o le fono lasi na igoa ko Sosefo, tagata agamalie mo faitotonu,

⁵¹ ti na leaise kau a ia ki le nea leia na fakatuutuu ti mo fai e la ake tagata o le fono lasi. Na au a ia mei le kolo o le kau Sutea ko Alimatea, ti na talitali a ia ki le puleaga o le Atua.

⁵² Na ano loa le tagata lena kia Pilato, o kole le tino o Sesu.

⁵³ Na too loa e ia le tino mei le koluse, o kofu ki se kie tea, ti na velo loa e ia a ia ki se tanuma kua ta i le utu, leia na leikiaise tuku ki ai se tasi.

⁵⁴ Ko le aso tokonaki lena, ti kua vave fua le kamata o le sapato i le afiafi.

⁵⁵ Ko fafine, ala na au mo Sesu mei Kalilea, na mulimuli loa ia Sosefo ; ti na lotou tio loa ki le tanuma ti mo le tuku o le tino o Sesu.

⁵⁶ Ti na lotou liliu loa, o teuteui ni nea fakamanogi ti mo ni lolo takai. Ti na lotou malolo loa i le aso o le sapato o mulimuli ki le lao.