Luka 22 - Tosi Tapu

Fakatuutuu a Sutasi ke tamate Sesu

¹ Kua ofi le aso o pane sala fakatupu, e igoa ko le Pasikate.

² Na afa e le kau faisakilifisio pule mo le kau sekelipa ni puleaki ke tamate Sesu ; kae na lotou i ki le kakai.

³ Kae, na ulu loa Satana kia Sutasi, na fakaigoa ko Isekaliote, leia na kau ki le tino agafulu tupu lua.

⁴ Ti na ano loa Sutasi o felogoi mo le kau faisakilifisio pule ti mo le kau pule ofisa, pe feaki le tuku o Sesu kia latou.

⁵ Na lotou fiafia ai, ti na lotou loto tasi loa ke soli kiate ia se paaga.

⁶ Ti na tali loa e ia le nea a ia, ti na afa loa e ia se faigamalie ke fakatau ai Sesu kia latou kae ke aua na iloa e le kakai.

Kai o le Pasikate

⁷ Kua ofi le aso o pane sala fakatupu, leia e tonu ke tamate ai le akeno o le Pasikate.

⁸ Ti na kakau loa e Sesu a Petelo mo Soane, o pati : Kolua ano o teuteui mai kia tatou le Pasikate ke tou kai a ia.

⁹ Na la pati loa kiate ia : Ko le ganea fea leia e ke loto ke ma teuteui ai le Pasikate ?

¹⁰ Ti na tali loa a ia kia laua : Ko leinei, ka kolua ulu loa ki le kolo, e kolua felavei loa mo se tagata leia e amo ia se fa fagu vai ; kolua muli iate ia ki le fale leia e ulu loa a ia ki ai,

¹¹ ti kolua pati loa ki le pule o le fale : E pati mai le pule kiate koe : Kofea le kogafale leia e kau kai ai loa le Pasikate mo aku tisipulo ?

¹² Ti e fakasa atu loa e ia kia koulua se kogafale lasi i fata kua oki i le teuteui, ko le ganea lena e kolua teuteu ai loa le Pasikate.

¹³ Na la ano loa, ti na la maua loa a nea ofaipe le fakasa ake kia laua e Sesu ; ti na la teuteui loa le Pasikate.

Pasikate fakaoki

¹⁴ Kua tatae loa le ola, ti na eke loa Sesu i le laupapa kai mo le kau apositolo.

¹⁵ Na pati loa a ia kia latou : Kua kau oli lasi ai ke kau kai le Pasikate leinei mo koutou, i mua o loku mate !

¹⁶ Talie, e kau fakasa kia koutou, e leaise kau toe kai loa a ia o kaku ki lona fakasoko katoa i le Puleaga o le Atua.

¹⁷ Ti na too loa e ia se ipu, ti na fakafetai loa a ia, o pati : Kotou too le ipu leinei o tufa ia koutou ;

¹⁸ talie e kau fakasa kia koutou, e leaise kau toe inu loa ki le fua o le vite, o kaku ki le au o le puleaga o le Atua.

Le kai fakamanatu

¹⁹ Na too foki e ia se pane, o fakafetai, mo tofitofi a ia, mo soli a ia kia latou, o pati : Ko le nea leinei ko loku tino, leia e soli o tupu ko koutou ; kotou fai le nea leinei o fakamanatu kiate au.

²⁰ I le oki o le kai, na toe too foki e ia le ipu, o soli a ia kia latou, o pati : Ko le ipu leinei o le sai foou i loku toto, leia e liligi o tupu ko koutou.

Fakasa e Sesu o leia e fakataga ia a ia

²¹ Kae ko leinei, kua fakatasi mo au i le laupapa le lima leia ka fakatau ia au !

²² E maoki, e ano loa le Vosa o le tagata, o mulimuli ki le nea leia kua fakatuutuu kiate ia. Kae malaia ki le tagata leia ka fakatau ia loa a ia !

²³ Ti na lotou kamata loa le fevesiliaki pe ko ai leia ia latou ka fai ia loa le nea lena.

Ko leia e lasi oki

²⁴ Na toe mafuta loa i le kau apositolo se visi pe ko ai leia e lasi ake ia latou.

²⁵ Na pati loa Sesu kia latou : Ko sau o puleaga e lagiaki fakamakeke kia latou, ti ko latou ala e pule ki puleaga e fakaigoa ia latou ko tagata manavaalofa.

²⁶ Kae e leaise fenaaki loa ia koutou. Ko leia e lasi ake ia koutou ke fai a ia pe leia e ikiiki oki, ti ko leia e pule ke fai a ia pe leia e fakasausau.

²⁷ Talie ko ai leia e lasi, pe ko leia e eke i le laupapa, pe ko leia e fakasausau ? Pe leaise ko leia e eke i le laupapa ? Kae ko au, e kau nofo i loto malie o koutou ofaipe leia e fakasausau !

Fakapale o kau apositolo i le puleaga

²⁸ Ko koutou, na kotou nonofo tuumau mo au i oku asiasii ;

²⁹ koia e kau tuku ai le puleaga kia koutou, ofaipe lona tuku mai e loku Tamana kiate au.

³⁰ E kotou kai loa mo inu loa i loku laupapa i loku puleaga, ti e kotou ekeeke loa i ni ekeekeaga fakasau, o fakamaaui a faasiga e kau agafulu tupu lua o Iselaele.

Fakasa e Sesu o le fakafiti a Petelo

³¹ Na pati loa le Aliki : Simone, Simone, na kole koutou e Satana, ke lu koutou ofaipe le lu o le fulumeto.

³² Kae kua kau ulufaki a koe, ke aua na puli lau tui ; ti ko koe, ka ke toe liliu mai loa, tokoi ki ou fetaina.

³³ Na pati loa Petelo kiate ia : Aliki, e kau teuteu ke kau ano mo koe ki le pilisoni ti mo le mate.

³⁴ Ti na pati loa Sesu : Petelo, e kau fakasa kiate koe, e leikiaise koukoua le moatoa i le aso nei kae kua ke fakafiti tua tolu kiate au.

Anoaga foou o tisipulo

³⁵ Ti na toe pati loa Sesu kia latou : I laku kakau koutou sala paaga, mo sala taga, ti mo sala taka, pe na puli se nea kia koutou ? Na lotou tali loa : Leai !

³⁶ Ti na pati loa a ia kia latou : Kae i le aso nei, ko leia e maua ia sana paaga ke too e ia a ia, ti ko leia e maua ia sana taga ke too e ia a ia, ti ko leia e sala seleta ke fakatau e ia lona kofu o totogi ai se seleta.

³⁷ Talie e kau fakasa atu kia koutou, e tonu ke fakasoko iate au le folafola leinei e tuu i le Tosi : Na lau a ia mo le kau agaveli. Ti ko nea ala na tosi kiate au kua vave soko fua.

³⁸ Ti na lotou pati loa : Aliki, ko nei ni seleta e lua. Ti na pati loa a ia kia latou : E feauga.

Kole a Sesu i le mauga o Oliveto

³⁹ Na ulu loa Sesu ki fafo, o ano ki le mauga ko Oliveto, ofaipe lana aga masani. Na muli loa ana tisipulo iate ia.

⁴⁰ I lana kaku ki le ganea lena, na pati loa a ia kia latou : Kotou faikole o tupu ke aua na kotou siga ki le fakasala.

⁴¹ Ti na fakamamao loa a ia ia latou, i se mamao o se fa fatu e ti, ti na tutuli loa a ia, o faikole,

⁴² o pati : Tamana, kapau na ke loto ki ai, fakamamao iate au le ipu leinei ! Kae, ke aua na fai ki loku finegalo, kae ki lou finegalo.

⁴³ Ti na sa mai loa se aselo mei le lagi, o fakamakeke a ia.

⁴⁴ Na logoi loa e ia se mamae lasi, ti na toe asilisili faikole fakamalotoloto a ia : ti na liliu loa lona kavakavaia ofaipe ni motii toto, ala na sasali ki le kele.

⁴⁵ I le oki o lana faikole, na tuu loa a ia ki aluga, o au ki ana tisipulo, ala na maua mai loa e ia kua tulemomoe i le mamae,

⁴⁶ ti na pati loa a ia kia latou : Kolea e kotou momoe ai ? Kotou tutuu o faikole, o tupu ke aua na kotou siga ki le fakasala.

Too o Sesu

⁴⁷ I le lolotoga o lana masau, ko leinei, na kaku mai loa se kakai ; ti ko leia na igoa ko Sutasi, ko le tasi o le tino agafulu tupu lua, na saele i mua o latou. Na fakafeofi loa a ia kia Sesu, o sogi kiate ia.

⁴⁸ Ti na pati loa Sesu kiate ia : Sutasi, e ke fakatau le Vosa o le tagata ki se sogi !

⁴⁹ I le tio a latou ala na nonofo mo Sesu ki le nea leia kua soko, na lotou pati loa kiate ia : Aliki, pe motou taai ki amatou seleta ?

⁵⁰ Ti na taai loa e le tasi o latou le tagata fakasausau a le pule faisakilifisio, o motu ai lona taliga atamai.

⁵¹ Kae na pati loa Sesu kia latou : Kua feauga, taofi ! Ti na fafa loa a ia ki le taliga o le tagata lena, o fakamauli a ia.

⁵² Na pati loa a ia ki le kau pule faisakilifisio mo le kau pule ofisa o le fale tapu, ti mo le kau fakamatuatua, ala na au o too a ia : Na kotou au mo ni seleta ti mo ni laakau, ofaipe ki se tagata kaia.

⁵³ I aso fuli na kau nofo mo koutou i le fale tapu, ti na leai fua se kotou kapa kiate au. Kae ko le ola leinei o koutou, ti mo le makeke o le fakapouli.

Fakafiti a Petelo

⁵⁴ Na lotou too loa Sesu, ti na lotou taki loa a ia ki le fale o le pule faisakilifisio. Na mulimuli loa Petelo mei mamao.

⁵⁵ Na lotou tafu loa se afi i loto o le malae, ti na lotou nonofo loa ki lalo i tafatafa o le afi. Na tonatona loa Petelo mo latou.

⁵⁶ Ko se fafine fakasausau, leia na tio loa kiate ia i mua o le afi, na tio fakamamau loa kiate ia, o pati : Na nofo foki le tagata leinei mo ia.

⁵⁷ Kae na fakafiti loa Petelo kiate ia, o pati : Fafine, e leaise kau iloa a ia.

⁵⁸ Ti na toe fakaikiiki ake fai, i le tio a se tasi kiate ia, na pati loa a ia : E ke kau foki, mo koe, kia latou ! Ti na tali loa Petelo : Tagata, e leaise kau kau mo latou.

⁵⁹ Ti na lagi sili loa ki ai se ola katoa, na fakapapau loa se tasi, o pati : E maoki, na nofo le tagata leinei mo ia, talie e Kalilea a ia.

⁶⁰ Na tali loa Petelo : Tagata, e leaise kau iloa le nea leia e ke masau ki ai. Ti na fokifa loa, kae koi masau a ia, kua koukoua loa le moatoa.

⁶¹ Na mafuli loa le Aliki ki muli, o tio kia Petelo. Ti na manatui loa e Petelo le folafola leia na fai e le Aliki kiate ia : I mua o le koukoua o le moatoa i le aso nei, kua ke fakafiti tua tolu kiate au.

⁶² Ti na ulu loa Petelo ki fafo, o tagi mamae.

Fakavesili o Sesu

⁶³ Ko tagata ala na taofi ia Sesu na gologolo kiate ia, ti mo sasa a ia.

⁶⁴ Na lotou sai loa ona mata, kae lotou vesili kiate ia, o pati : Mate ! pe ko ai leia na sasa ia a koe ?

⁶⁵ Ti na lasi ai a lauveli kesekese ala na lotou fai kiate ia.

Sesu i mua o le fono lasi

⁶⁶ I le ao ake loa, na fakatasi loa le kau fakamatuatua o le kakai, mo le kau pule faisakilifisio, ti mo le kau sekelipa, ti na lotou fakatotonu loa ke ave Sesu ki le fono lasi.

⁶⁷ Ti na lotou pati loa : Kapau ko koe ko le Kilisito, ti fakasa mai a ia kia matou. Na tali loa Sesu kia latou : Kapau e kau fakasa a ia kia koutou, ti e leaise kotou tui loa ki ai ;

⁶⁸ ti kapau e kau fai kia koutou se vesili, ti e leaise kotou tali mai loa kiate au.

⁶⁹ Kae i le oki o le nea lena, e nofo loa le Vosa o le tagata i le fetuu atamai o le mafimafi o le Atua.

⁷⁰ Na lotou pati fuli loa : Ko koe ai ko le Alo o le Atua ? Ti na tali loa a ia kia latou : Kua kotou pati ki ai, ko au totonu.

⁷¹ Ti na lotou pati loa : Pe koi aoga mai aifai kia tatou se fakamaoki ? Kua tou logo totonu ki ai mei lona gutu.