Luka 21 - Tosi Tapu

Moliga o le fafine lokonui

¹ Na siki ake loa a mata o Sesu, o tio ki le velo e le kau mou koloa alatou moliga ki le kisi o moliga.

² Ti na tio foki a ia ki se fafine lokonui mativa, leia na velo ia ki ai ni ga fa piesi e lua.

³ Ti na pati loa a ia : E kau fakasa maoki atu kia koutou : kua soli e le fafine lokonui mativa lena o lasi ake ia latou fuli ake a la ;

⁴ talie na soli e latou fuli ake a la ni moliga ki le fa kisi o moliga mei le lasi o olatou koloa ; kae kua soli e ia, mei lona mativa, le nea katoa leia e aoga ki lona mauli.

Akonaki i le mauga o Oliveto

⁵ Na masau loa ni iki ki mataga o le fale tapu, mo ona fatu fulumalilie ti mo moliga. Kae na pati loa Sesu :

⁶ Ko nea ala e kotou tio ki ai, e soko mai loa a aso ala e leaise toe teki loa se fa fatu i aluga o se tasi fa fatu ; talie e laku fuli loa latou ki lalo.

Vesili e lua a tisipulo

⁷ Na lotou vesili loa kiate ia : Pule, ko le temi fea leia e soko ai loa le nea lena, ti kolea le fakamailoga leia e iloa ai loa ka soko a nea ana ?

Tali a Sesu : Ko temi fakamuli

⁸ Na tali loa Sesu : Kotou tokaga na kakaai koutou. Talie e au loa le toka api i loku suafa, o pati : Ko au ko Kilisito, ti, kua ofi mai le temi. Aua na kotou muli ia latou.

⁹ Ka kotou logo loa e masau ki ni tau mo ni maveuveu, aua na kotou i, talie e tonu ke soko a nea ana i mua. Kae e leaise ko le fakaoki loa a ia.

¹⁰ Ti na pati loa a ia kia latou : E malaga ake loa se kakai ki se tasi kakai, ti mo se puleaga ki se tasi puleaga ;

¹¹ e soko loa ni mafuike lalasi, mo ni oge, ti mo ni taumasaki lalasi, i potu kesekese ; ti e sa loa mei le lagi ni nea fakaii ti mo ni fakamailoga lalasi.

Mamae o le kau tui

¹² Kae, i mua o nea fuli ana, e too loa koutou, ti e fakavelivelii loa koutou ; e ave loa koutou ki ni sinakoka, e laku loa koutou ki ni pilisoni, e ave loa koutou ki mua o ni sau mo ni kovana o tupu ko loku suafa.

¹³ E soko loa le nea lena kia koutou o tupu ke kotou liliu ko se fakamaoki.

¹⁴ Koia ke fakapapau okoutou loto, ke aua na kotou tuania pe feaki loa lakoutou tali ;

¹⁵ Talie e kau soli atu loa kia koutou se gutu mo se poto ala e leaise mafai ke tali ki ai okoutou fili pe ke lotou taofi.

¹⁶ E fakatau loa koutou e okoutou matua, mo okoutou fetaina, mo okoutou famili, mo okoutou kaukau nea ; ti e tamate loa se toka api o koutou.

¹⁷ E vesiainai loa koutou e tagata fuli, o tupu ko loku suafa.

¹⁸ Kae e leaise puli loa se fa fului ulu o lokoutou ulu.

¹⁹ Kapau e kotou kataki fualoa, ti e kotou saofaki loa okoutou laumalie.

Maumaui o Selusalemi

²⁰ Ka kotou tio loa kua takatakai Selusalemi e ni kau tau, ti kotou iloa kua vave fua lona maumaui.

²¹ Koia, ko latou ala e nonofo loa i Sutea ke sosola ki mauga, ti ko latou ala e nonofo loa i Selusalemi ke mavae i ai, ti ko latou ala e nonofo loa i faisaga ke aua na toe ulu ki le kolo.

²² Talie ko aso loa ana ko ni aso o le tautea, o tupu ke fakasoko a nea fuli ala na tosi.

²³ Malaia ki fafine ala e tinanae loa ti mo latou ala e fakau toe loa i aso ana ! Talie e i ai loa se mamae lasi i le fenua leinei, ti e vilo loa le sausau o le Atua ki le kakai leinei.

²⁴ E tamate loa latou ki ni seleta, ti e ave loa latou o fakapopulai i puleaga fuli, ti e takatakafi loa Selusalemi e puleaga pagani, o kaku ki le katoa o le temi o puleaga.

Fakamailoga o le toe liliu mai o le Vosa o le tagata

²⁵ E i ai loa ni fakamailoga i le laa, mo le masina, ti mo fetuu. I le malama nei, e lulu loa le kakai i le i, o tupu ko le gugulu faikese o le tai ti mo le galu.

²⁶ Ti e tio noa loa le kakai i le i lasi ai ti mo le talitali pe kolea ka soko mai loa ki le malama nei katoa ; talie e galulu loa a makeke fuli o le lagi.

²⁷ Ti fokifa e lotou tio loa ki le Vosa o le tagata e ifo mai i se ao, mo le makeke, ti mo se kololia lasi.

²⁸ Ka kamata soko mai loa a nea ana, kotou tuu fakasako, ti kotou lagai ki aluga okoutou mata, talie kua ofi mai lokoutou saofaki.

Fakamailoga o le fiki

²⁹ Ti na fai loa e ia kia latou se fakatata : Kotou tio ki le fiki, ti mo laakau fuli.

³⁰ Ka lotou kamata sosomo, ti e kotou iloa e koutou totonu, kua ofi mai le temi vevela.

³¹ Ti e fenaaki foki, peka kotou tio loa ki nea ana kua soko mai, ke kotou iloa ai kua ofi mai le Puleaga o le Atua.

³² E kau pati maoki atu kia koutou, e soko a nea fuli ana, kae leikiaise puli le tautupu leinei.

³³ E puli le lagi mo le kele, kae e leaise puli aku folafola.

Ke alaala

³⁴ Kotou tokaga kia koutou totonu, ke aua na kotou tuku okoutou loto ke taomia o tupu ko le kai fakavale mo le inu fakavale, ti mo nea o le mauli, ti ke au fakapunamauli le aso lena kia koutou.

³⁵ Talie e au loa a ia, ofaipe se kupega, kia latou fuli ala e nonofo i le malama nei katoa.

³⁶ Koia kotou alaala ai, ti kotou faikole i temi fuli, o tupu ke kotou maua le makeke ke kotou sao ai i nea fuli ala ka soko mai, ti ke kotou tutuu i mua o le Vosa o le tagata.

³⁷ I le ao na akonaki Sesu i le fale tapu ; kae i le pouli na ano a ia o nofo i le mauga na igoa ko Oliveto.

³⁸ Ti na usuusu mai le kakai katoa ki le fale tapu, o fakalogo kiate ia.