Luka 2 - Tosi Tapu

Tupu o Sesu i Peteleemi

¹ I le temi a ia, na sa loa se tosi a Sesale Okusito, o fakatotonu ke tosi le malama nei katoa.

² Na fai loa le uluaki tosi kakai lena kae na kovana Kiliniusi i le fenua o Silia.

³ Na ano fuli o tasi tosi lona igoa i lona kolo.

⁴ Na pale foki Sosefo mei Kalilea, mei le kolo ko Nasaleti, o ano ki Sutea, ki le kolo o Tavite, na igoa ko Peteleemi, talie na kau a ia ki le fale mo le famili o Tavite,

⁵ o tupu ke tosi a ia mo Malia, lana feauaki, leia kua tinae.

⁶ I lala nofo i ai, na soko loa le temi leia na tonu ke fanau ai Malia,

⁷ ti na fanaui loa e ia lona tama uluaki. Na kofukofu loa e ia a ia, o fakamoe i se kaiaga manu, talie na leai se nofoaga i le fale talifanoga kia latou.

le kau tausi ovi

⁸ Na i ai, i le potu fenua lena, ni kau tagata tausi manu ala na nonofo i faisaga i le pouli o taupau alatou kau manu.

⁹ Ti ko leinei, na sa loa se aselo o le Aliki kia latou, ti na malama loa le kololia o le Aliki o takatakai latou. Na lotou i lasi ai.

¹⁰ Kae na pati loa le aselo kia latou : Aua na kotou i ; talie e kau fakasa kia koutou se logo malie, leia e liliu loa ki le kakai katoa ko le tupuaga o se fiafia lasi :

¹¹ I le aso nei, i le kolo o Tavite, kua tupu kia koutou se Fakamauli, leia ko Kilisito, ko le Aliki.

¹² Ti ko leinei le fakamailoga leia e kotou iloa ai loa a ia : E kotou maua loa se toe memea leia kua kofukofu, ti kua fakamoe i se kaiaga manu.

¹³ Ti fokifa kua fakatasi mai ki le aselo se toka lasi o le kau aselo o le lagi, o vikiviki ki le Atua, o pati :

¹⁴ Kololia ki le Atua i potu taualuga, Ti tokamalie i le kele ki tagata ala e alofa a ia ki ai !

¹⁵ I le mavae a le kau aselo ia latou o toe liliu ki le lagi, na fepatiaki loa le kau tagata tausi manu : Tou ano o kaku ki Peteleemi, o tio ki le nea leia kua soko, leia kua fakailo mai kia tatou e le Aliki.

¹⁶ Na lotou ano fakavilivili loa ki ai, ti na lotou maua loa Malia mo Sosefo, ti mo le ga toe memea leia na fakamoe i le kaiaga manu.

¹⁷ I lalatou tio ki le ga toe, na lotou fakamatala loa a nea ala na fakailo ake kia latou o uiga mo le ga toe lena.

¹⁸ Ko latou fuli ala na fakalogo ki alatou fakamatala na punamauli ai i nea ala na fakasa e le kau tagata tausi manu kia latou.

¹⁹ Na taupau e Malia a nea fuli ana, o tau fakamanatu i lona loto.

²⁰ Ti na toe liliu loa le kau tagata tausi manu, o lotou fakakololia loa mo fakavikiviki loa ki le Atua o uiga mo nea fuli ala kua lotou logo mo tio ki ai, talie na soko a nea fuli o mulimuli totonu ki nea ala na fakasa kia latou.

Momoli o Sesu i le Faletapu

²¹ Na soko loa le valu o aso, leia na tonu ke silikosisio ai le toe, ti na tuku loa kiate ia le igoa ko Sesu, igoa leia na fakasa e le aselo i mua o le fakatupu o le toe i le manava o lona tinana.

²² Ti i le katoa loa o aso o lola fakamea, o mulimuli ki le lao a Moisese, na ave loa e Sosefo mo Malia le toe ki Selusalemi, ke momoli a ia ki le Aliki,

²³ o mulimuli ki le nea leia kua tosi i le lao a le Aliki : E tonu ke fakatapui ki le Aliki a alopoou fuli,

²⁴ ti ke momoli se sakilifisio, ko ni tu e lua pe ko ni lupe e lua, o mulimuli ki le fakatotonu leia e tuu i le lao a le Aliki.

Atolasio a Simeone mo Ana

²⁵ Ti ko leinei, na i ai i Selusalemi se tagata na igoa ko Simeone. Na agatonu le tagata lena mo tausi malie ki le Atua, ti na talitali a ia ki le fakapelepeleaga o Iselaele, ti na iate ia le Laumalie Maokioki.

²⁶ Ti na fakasa e le Laumalie Maokioki kiate ia e leaise mate loa a ia i mua, kae e leikiaise tio a ia ki le Kilisito o le Aliki.

²⁷ Na au loa Simeone ki le fale tapu, o taki mai a ia e le Laumalie Maokioki. Ti e i le aumai e matua o le ga toe ko Sesu, ke fakasoko kiate ia le nea leia na fakatotonu e le lao,

²⁸ na tali loa e ia a ia i ona lima, ti na fakafetai loa a ia ki le Atua, o pati :

²⁹ I le lakaga nei, Aliki, ke ke tuku la lau tagata fakasausau Ke ano i le tokamalie, o mulimuli ki lau folafola.

³⁰ Talie kua tio oku mata ki lau fakamauli,

³¹ Fakamauli leia na ke teuteu i mua o kakai fuli :

³² Malama ke fakamalama ia a atu puleaga, Ti kololia o Iselaele, lou kakai.

³³ Ti na ofolele loa lona tamana mo lona tinana i nea ala na masaui kiate ia.

³⁴ Na tapuaki loa Simeone kia latou, o pati kia Malia, lona tinana : Ke ke iloa, kua fakatuu le fanau leinei ke tukia ai ti ke toe lagai ai se toka api i Iselaele, ti ke liliu a ia ko se fakamailoga ki ai,

³⁵ ti kiate koe totonu, e sukii loa e se seleta lou mafu, o tupu ke sa a manatu o loto o se toka api.

³⁶ Na i ai foki se fafine polofeta ko Ana, taine o Fanuele, mei le kutuga o Asele. Kua finematua ai a ia, ti na mauli a ia i fetuu e fitu mo lona avaga talu mei lona taupoou.

³⁷ Na nofo lokonui a ia o kaku ki lona fetuu kau valu tupu fa, ti na leaise mavae a ia i le fale tapu, ti na tausi a ia ki le Atua i le po mo le ao i le sesunio mo le faikole.

³⁸ I lana kaku totonu mai i le ola lena, na fakafetai a ia ki le Atua, ti na masau a ia kia Sesu kia latou fuli ala na talitali ki le saofaki o Selusalemi.

Toe liliu ki Nasaleti

³⁹ I le oki o lala fakasoko a nea fuli ala na fakatotonu e le lao a le Aliki, na toe liliu loa Sosefo mo Malia ki Kalilea, ki Nasaleti, lola kolo.

⁴⁰ Kae na tupu le toe o lasi mo makeke. Na apele a ia i le poto, ti na iate ia le kalasia o le Atua.

Sesu i le Fale tapu i lona fetuu kau agafulu tupu lua

⁴¹ Na pale a matua o Sesu i fetuu fuli ki Selusalemi i le aso lasi o le Pasikate.

⁴² I le fetuu kau agafulu tupu lua o Sesu, na lotou pale loa ki ai, o mulimuli ki le fai masani o le aso lasi.

⁴³ Ti i le oki o aso ana, na lotou toe liliu loa, kae na nofo loa le fanau ko Sesu i Selusalemi : Na leaise iloa loa e lona tamana mo lona tinana.

⁴⁴ I lala tuku na nofo a ia mo le kau fanoga, na la saele loa i le aso katoa, ti na la afa loa a ia i ola famili mo ola feilo.

⁴⁵ Kae na leaise la maua loa a ia, ti na la toe liliu loa ki Selusalemi o afa a ia.

⁴⁶ I le sili o aso e tolu, na la maua loa a ia i le fale tapu, na tonatona i loto malie o le kau toketa o le lao, o fakalogo kia latou ti mo fai vesili kia latou.

⁴⁷ Ko latou fuli ala na fakalogo kiate ia, na punamauli ki lona atamai ti mo ana tali.

⁴⁸ I le tio o ona matua kiate ia, na la punamauli ai, ti na pati loa lona tinana kiate ia : Ei loku fanau, kolea kua ke fai felaaki ai kia maua ? Ko leinei lou tamana mo au, kua ma afa a koe mo se loto mamae.

⁴⁹ Na pati loa Sesu kia laua : Kolea e kolua afa ai au ? Pe leaise kolua iloa e tonu ke kau tokaga ki nea o loku Tamana ?

⁵⁰ Kae na leaise la matala loa ki le nea leia na pati ki ai Sesu.

⁵¹ Ti na ifo loa a ia mo laua o ano ki Nasaleti, ti na fakalogo a ia kia laua. Kae na taupau e lona tinana a nea fuli ana i lona loto.

⁵² Ti na tupu ake Sesu o lasi i le poto, i le tino, ti mo le alofa, i mua o le Atua ti mo mua o tagata.