Luka 19 - Tosi Tapu

Felavei a Sesu mo Sakeo

¹ Na ulu loa Sesu ki Seliko o fakalaka i le kolo.

² Ti ko leinei, ko se tagata mou koloa, na igoa ko Sakeo, pule o le kau popelikano, na afa ke tio pe ko ai Sesu ;

³ kae na leaise mafai e ia ke kaku kiate ia, o tupu ko le kakai, talie na toetoe fua a ia.

⁴ Na makape loa a ia ki mua, o kava i se sikomole, ke tio kia Sesu, talie na tonu ke fakalaka a ia le ganea lena.

⁵ I le kaku mai a Sesu ki le ganea lena, na tagaki loa ona mata ki aluga, o pati kiate ia : Sakeo, ifo fakatavili ki lalo talie e tonu ke kau nofo i le aso leinei i lou kaiga.

⁶ Na fakatavili loa Sakeo o ifo, mo tali a ia i le fiafia.

⁷ I le tio a le kakai ki le nea lena, na lotou mumusu fuli, o pati : Kua ano a ia o nofo i le fale o se tagata agasala.

⁸ Kae na tuu ake loa Sakeo i mua o le Aliki, o pati kiate ia : Aliki, ko leinei, e kau soli ki le kau mativa le vaelua o oku koloa, ti kapau na kau kaia se paaga a se tasi, e kau toe fakaliliu loa kiate ia le nea lena o liuga fa.

⁹ Na pati loa Sesu kiate ia : I le aso nei kua ulu le fakamauli ki le fale leinei, talie ko ia foki leinei ko se vosa a ia o Apalaamo.

¹⁰ Talie kua au le Vosa o le tagata ke afa mo fakamauli le nea leia kua puli.

Folafola o fa mine e kau agafulu

¹¹ Na lotou fakalogo ki nea ana, ti na toe masau loa Sesu kia latou i se tasi folafola fakatata, talie kua ofi a ia ki Selusalemi, ti kua pati foki e sa loa le puleaga o le Atua i le temi lena.

¹² Na pati loa a ia : Na ano loa ki se fenua mamao se tagata mei se famili aliki, ke fakanofo a ia ke sau, ti toe liliu mai.

¹³ Na kalagai loa e ia se tino agafulu o ana tagata fakasausau, ti na soli loa e ia kia latou ni fa mine e kau agafulu, o pati : Kotou fakagaoi a fa mine anei o kaku ki laku toe liliu mai.

¹⁴ Kae na vesia le kakai o lona fenua kiate ia, ti na lotou kakau loa ni fakafofoga i ona muli ke ano, o pati : E leaise motou loto ke sau le tagata lena kia matou.

¹⁵ I lana toe liliu mai, kua maua loa e ia le puleaga, na kalagai loa e ia a tagata fakasausau ala na soli e ia ki ai le paaga, o tupu ke iloa pe na feaki le fakagaoi e le tagata taki toka tasi a ia.

¹⁶ Na au loa le uluaki, o pati : Aliki, kua toe maua e lau fa mine ni iki a fa mine e kau agafulu.

¹⁷ Na pati loa le sau kiate ia : Malie, tagata fakasausau agamalie ; talie na ke agatonu i se ganea ikiiki, tali e koe le pule ki ni kolo e kau agafulu.

¹⁸ Na au loa le lua, o pati : Aliki, kua maua e lau fa mine ni iki fa mine e lima.

¹⁹ Na pati loa le sau kiate ia : Mo koe foki, pule ki ni kolo e lima.

²⁰ Na au loa se tasi, o pati : Aliki, ko leinei lau fa mine, leia na kau taupau o kofukofu ki se kie ;

²¹ talie na kau i kiate koe, talie ko se tagata itaita a koe, e ke too ia le nea leia na leaise ke tuku, ti e ke utu ia le nea leia na leaise ke to.

²² Na pati loa le sau kiate ia : E kau fakamaaui loa a koe ki au masau totonu, tagata fakasausau agaveli ; na ke iloa ko se tagata itaita au, leia e too ia le nea leia na leaise kau tuku, ti e utu ia le nea leia na leaise kau to.

²³ Kolea na leaise ke tuku ai laku fa mine ki se fale paaga, o tupu ke kau toe liliu mai, o too a ia mo sona tupu ?

²⁴ Ti na pati loa a ia kia latou ala na nonofo i ai : Kotou too meiate ia le fa mine, ti kotou soli a ia ki leia e nofo mo fa mine e kau agafulu.

²⁵ Na lotou pati loa kiate ia : Aliki, e nofo a ia mo fa mine e kau agafulu.

²⁶ E kau pati atu kia koutou, e soli loa ki leia e maua, kae ki leia e nofo noa e toe too loa mo le nea foki leia e maua e ia.

²⁷ Kae, kotou aumai ki leinei oku fili, ala na leaise loto ke kau sau kia latou, ti kotou tamate latou i oku mua.

Ulu a Sesu ki Selusalemi

²⁸ I le oki o lana masau lena, na saele loa Sesu i mua o le kakai, o pale ki Selusalemi.

²⁹ I lana fakafeofi ki Petefase mo Petania, i le mauga e igoa ko le mauga o Oliveto, na kakau loa e Sesu se toka lua o ana tisipulo,

³⁰ o pati : Kolua ano ki le kolo leia e agaaga mai ; ka kolua ulu loa ki ai, e kolua maua loa se uviki asino kua sisi, ti e leikiaise eke fua ki ai se tagata ; kolua tatala a ia, ti kolua taki mai a ia ki leinei.

³¹ Ti ka vesili atu loa se tasi kia kolua : Kolea e kolua tatala ai a ia ? Kolua tali loa kiate ia : E aoga a ia ki le Aliki.

³² Ko laua ala na kakau na ano loa, ti na la maua loa a nea ofaipe lona fakasa e Sesu kia laua.

³³ I lala tatala le uviki asino, na vesili loa le pule o le asino kia laua : Kolea e kolua tatala ai le uviki asino ?

³⁴ Na la tali loa : E aoga a ia ki le Aliki.

³⁵ Ti na la taki loa le uviki asino kia Sesu. Na la teki loa ki ai ola kofu, ti na la fakaeke loa Sesu ki ai.

³⁶ I le ano a Sesu, na fola e le kakai olatou kofu i le ala.

³⁷ Ti kua ofi fua a ia ki Selusalemi, i le fakamaifo leia e au mei le mauga o Oliveto, na kamata fakafiafia loa mo fakavikiviki le kau tisipulo fuli ki le Atua o leo lasi, o tupu ko milakulo fuli ala kua lotou tio ki ai.

³⁸ Ti na lotou pati loa : Manuia le sau leia e saele mai i le suafa o le Aliki ! Tokamalie i le lagi, ti kololia i potu taualuga ai !

³⁹ Na pati loa ni faliseo, mei loto malie o le kakai, kia Sesu : Pule, valoki au tisipulo !

⁴⁰ Na tali loa a ia : E kau pati atu kia koutou, kapau e lotou fakalologo, ti e kalaga loa a fatu anei !

Tagi a Sesu ki Selusalemi

⁴¹ I le ofi a Sesu ki le kolo, na tio loa a ia ki ai, ti na tagi loa a ia, o pati :

⁴² Ka na ke iloa fua, io, e koe, i le aso nei, a nea ala e kau ki lou tokamalie ! Kae, i le aso nei, kua munia latou ki ou mata.

⁴³ E soko mai loa kiate koe ni aso ala e takatakai ai loa a koe e ou fili ki ni popoko, o taui a koe, ti mo tapotapono a koe i potu fuli ;

⁴⁴ Ti e lotou maumaui katoa loa a koe, io, a koe mo lou kakai ; ti e leaise lotou tuku loa se fatu i aluga o se tasi a fatu, o tupu na leaise ke iloa le aso leia na fakatele ai kiate koe.

Kapu o le kau fai koloa i le fale tapu

⁴⁵ Na ulu loa Sesu ki le fale tapu, ti na kamata kapu loa e ia ki fafo le kau fai koloa,

⁴⁶ o pati kia latou : E tuu i le Tosi : E liliu loa loku fale ko se fale faikole. Kae ko koutou, kua kotou fakaliliu a ia ko se ana o tagata kaia.

⁴⁷ Na akonaki a ia i aso fuli i le fale tapu. Ti ko le kau pule faisakilifisio, mo le kau sekelipa, mo pule o le kakai, na afa ke tamate a ia ;

⁴⁸ kae na leaise lotou iloa pe feaki lona fakasoko, talie kua tokaga le kakai katoa ke fakalogo kiate ia.