Luka 16 - Tosi Tapu

Le tagata taupau koloa lee agatonu

¹ Na pati loa Sesu ki ana tisipulo : Na maua e se tagata mou koloa sana tagata taupau koloa, leia na fakasa loa kiate ia kua maumaui e ia ona koloa.

² Na kalagai loa e le pule lana tagata taupau koloa, o pati kiate ia : Kolea leia e kau logo ki ai o uiga mo koe ? Fakamatala mai kiate au lau taupau, talie e leaise ke toe taupau loa oku koloa.

³ Na pati loa le tagata taupau koloa i lona loto : Kolea e kau fai loa, talie kua too e loku pule loku tulaga ? Gaoi ki le kele ? E leaise kau mafai a ia. Kaiisi ? E kau luma.

⁴ E kau iloa le nea leia e kau fai loa, o tupu ke mau ai ni iki ke fakatalitali ia au i olatou fale, mo ka kapu loa au i laku gaoi.

⁵ Ti na kalagai loa e ia latou ala e tuu maua ki lona pule, ti na pati loa a ia ki le uluaki : E fia lou maua ki loku pule ?

⁶ Na tali loa a ia : Ko fa poe lolo e kau lelau. Ti na pati loa le tagata taupau koloa kiate ia : Too nei lou pepa, nofo fakatavili ki lalo, o tosi ki ai : kau lima.

⁷ Ti na toe pati loa a ia ki se tasi : Ti ko koe, e fia lou maua ? Na tali loa a ia : Ko taga fulumeto e kau lelau. Ti na pati loa le tagata taupau koloa kiate ia : Too nei lou pepa, o tosi ki ai : kau valu.

⁸ Na vikiviki loa e le pule le tagata taupau koloa lee agatonu lena, i lona poto i le fai o ni puleaki kaka. Talie e poto ake a fanau o le sekulo leinei i le fai koloa mo olatou tautagata i fanau o le malama.

⁹ Ti ko au, e kau pati atu loa kia koutou : Kotou fai ni okoutou kaukau nea ki koloa fakamalama, o tupu ke lotou tali koutou i nofoaga lee gato, mo ka puli loa a koloa ana.

¹⁰ Ko leia e agatonu i nea liliki e toe agatonu foki a ia i nea lalasi, ti ko leia e lee agatonu i nea liliki e toe lee agatonu foki a ia i nea lalasi.

¹¹ Kapau loa e leaise kotou agatonu i koloa fakamalama, ko ai e tuku ia loa kia koutou a koloa maoki ?

¹² Ti kapau e kotou lee agatonu i le taupau o koloa o se tasi kese, ko ai e soli ia loa kia koutou okoutou koloa totonu ?

¹³ E leaise mafai e se tagata fakasausau ke tausi ki ni pule e toka lua, talie e vesia loa a ia ki le tasi kae e alofa loa a ia ki le tasi ; pe e pipiki a ia ki le tasi kae e fakamamao a ia mei le tasi. E leaise mafai ke kotou tausi ki le Atua mo Mamone.

Valoki e Sesu o le fulupipiki

¹⁴ Ko le kau faliseo, ala na fulupipiki ki le paaga, na fakalogo ki nea fuli ana, ti na lotou gologolo kia Sesu.

¹⁵ Na pati loa a ia kia latou : Ko koutou, e kotou fia agatonu i mua o le tagata, kae e iloa e le Atua okoutou loto ; talie ko le nea leia e mauiga lasi ki tagata e fakalialia i mua o le Atua.

¹⁶ Na tuu le lao mo le kau polofeta o kaku mai kia Soane-Patita ; kae talu loa mei ai mo le fakasa o le logo malie o le puleaga o le Atua, ti e ulu loa ki ai i le fakamakeke.

¹⁷ Ti e faigaofie ake ke puli le lagi mo le kele, i le vilo o se ga matai tosi ikiiki o le lao.

Le mavete avaga

¹⁸ Ko le tagata leia e kapu ia lona avaga kae toe avaga a ia mo se tasi ake fafine e tono a ia mo le fafine lena, ti ko le tagata leia e avaga mo se fafine leia na kapu e lona avaga e tono a ia mo le fafine lena.

Le tagata mou koloa mo Lasalo

¹⁹ Na i ai se tagata mou koloa, leia na lava ki ni kie fulumalilie mo mauiga ai, ti na kai nea malilie a ia i aso taki tasi.

²⁰ Ko se tagata mativa mo papala, na igoa ko Lasalo, na moe i mua o le matapa o lona fale,

²¹ O oli ke kai e ia a momo ala na maluluku mei le laupapa o le tagata mou koloa ; ti na au foki a kuli o epo ona papala.

²² Na mate loa le tagata mativa, ti na ave loa a ia e le kau aselo ki tafa o Apalaamo. Na mate foki mo le tagata mou koloa, ti na tanu loa a ia ki le kele.

²³ I le nofoaga o le kau mate, na mamae lasi ai le tagata mou koloa ; ti na siki ake loa e ia ona mata ki aluga, ti na tio loa a ia mei mamao kia Apalaamo, ti mo Lasalo i ona tafa.

²⁴ Ti na tauvasa loa a ia : Tamana Apalaamo, alofa mai kiate au, ti kakau mai Lasalo ke fakasusu e ia le tumutumu o lona maikao ki le vai, ke fakamokomoko ai loku alelo, talie e kau mamae lasi ai i le afi nei.

²⁵ Na tali loa Apalaamo : Ei laku fanau, manatui e koe na ke maua au nea malilie i le lolotoga o lou mauli, kae na maua e Lasalo a nea veveli i le lolotoga o lona mauli ; i le aso nei, kua fimalie a ia i leinei, kae ko koe, kua ke mamae.

²⁶ Ti toe tasi foki, e i ai se vanu lasi i le vasa o matou mo koutou, o tupu ko latou ala e fia natu i leinei ki lena, pe fia au mei lena ki leinei, ke aua na mafai lalatou feanoaki.

²⁷ Na pati loa le tagata mou koloa : E kau kole atu loa kiate koe, tamana Apalaamo, ke ke kakau Lasalo ki le fale o loku tamana, talie e kau maua ni fetaina e toka lima.

²⁸ O tupu ke fakamaoki e ia a nea anei kia latou, ti mo valoki latou, ke aua na latou toe au mo latou foki ki le ganea leinei o le mamae.

²⁹ Na tali loa Apalaamo : E lotou maua Moisese mo le kau polofeta ; ke lotou fakalogo kia latou.

³⁰ Ti na pati loa le tagata mou koloa : Leai, tamana Apalaamo, kae kapau e ano loa se tasi i le kau mate kia latou, e lotou fakasemala loa.

³¹ Ti na tali loa Apalaamo kiate ia : Kapau e leaise lotou fia logo kia Moisese mo le kau polofeta, ti e leaise lotou toe tui foki mo kapau e toe tuuake se tasi i le kau mate.