Luka 15 - Tosi Tapu

Folafola o le fiafia maoki

¹ Na fakafeofi ake loa kia Sesu le kau popelikano fuli mo ni kakai mauli veli, ke logo kiate ia.

² Ti na mumusu loa le kau faliseo mo le kau sekelipa, o pati : E fakatalitali e le tagata leinei ni kakai mauli veli, ti e kai a ia mo latou.

Le ovi na puli

³ Kae na fakasa loa e ia kia latou le folafola fakatata leinei :

⁴ Pe ko ai ia koutou, mo kapau e maua e ia ni ovi e kau lelau, ti e puli se ovi e tasi, e leaise tuku e ia a ovi e kau iva tupu iva i le toafa, kae ano a ia o afa leia kua puli, o kaku ki lana maua a ia ?

⁵ Ka maua e ia a ia, e teki e ia a ia ki ona tuauma i le fiafia,

⁶ ti ka toe liliu a ia ki fale, e kalagai e ia ona kaukau nea mo ona vasaa fale, o pati kia latou : Kotou fiafia mo au, talie kua kau maua laku ovi leia na puli.

⁷ Koia e kau pati atu ai kia koutou, e ia loa se fiafia lasi ake i le lagi i se tagata agasala e toka tasi leia e fakasemala, i ni tagata agatonu e tino iva tupu iva ala e leaise aoga ki ai le fakasemala.

Le fa talame na puli

⁸ Pe ko ai le fafine leia, mo kapau e maua e ia ni fa talame e kau agafulu, ti puli se fa talame e tasi, e leaise tutu ia se malama, mo seu ia le fale, ti mo afa lasi o kaku ki lana maua a ia ?

⁹ Ka maua e ia a ia, ti e kalagai e ia ona kaukau nea mo ona vasaa fale : Kotou fiafia mo au, talie kua kau maua laku fa talame leia na puli !

¹⁰ Koia e kau pati atu ai kia koutou : e i ai se fiafia i mua o le kau aselo o le Atua i se tagata agasala e toka tasi leia e fakasemala.

Le vosa na puli

¹¹ Na toe pati foki Sesu : Na maua e se tagata ni vosa e toka lua.

¹² Na pati loa le mulimuli ki lona tamana : Tamana, soli mai loku vaega i koloa ala e tonu ke kau maua. Ti na vae loa e le tamana ki ona vosa lona koloa.

¹³ Na sili ni ga aso teiki, na tanaki loa e le mulimuli ona koloa fuli, ti na mavae loa a ia o ano ki se fenua mamao, o maumaui ona koloa i se mauli maveuveu.

¹⁴ I le oki o lana maumaui ona koloa fuli, na to loa se oge i le fenua lena, ti na kamata fia kai loa a ia.

¹⁵ Na ano loa a ia o fakasausau ki se tagata o le fenua, leia na kakau ia loa a ia ke ano o taupau a uviki puaka i ona kele.

¹⁶ Na oli loa a ia ke fakamakona a ia ki fuai kalupe ala na kai e le kau puaka ; kae na leaise soli ake e se tasi se nea kiate ia.

¹⁷ Na fakakaukau loa a ia i lona loto, o pati : E toka fia a tagata gaoi totogi i le fale o loku tamana ala e maua ia se pane o lasi, ti mo au leinei ka mate i le fia kai !

¹⁸ E kau tuu loa ki aluga, ti e kau ano loa ki loku tamana, ti e kau pati loa kiate ia : Tamana, kua kau agasala ki le lagi ti mo koe,

¹⁹ e leaise koi kau gali ke fakaigoa a au ko lou vosa ; too au ofaipe se tasi o au tagata gaoi totogi.

²⁰ Ti na tuu loa a ia ki aluga, ti na ano loa a ia ki lona tamana. Koi natu a ia i mamao, kae kua tio mai lona tamana kiate ia, ti na manavaalofa loa a ia, ti na makape loa a ia, o fui lona vosa ki ona lima, ti mo sogi kiate ia.

²¹ Na pati loa le vosa kiate ia : Tamana, kua kau agasala ki le lagi ti mo koe, e leaise koi kau gali ke fakaigoa au ko lou vosa.

²² Kae na pati loa le tamana ki ana tagata fakasausau : Kotou aumai vave le kofu fulumalie oki, ti kotou tui a ia kiate ia ; kotou velo mo se mama ki lona maikao, ti kotou tui mo ni taka ki ona vae.

²³ Ti kotou aumai le uviki pipi peti, ti kotou tamate a ia. Tou kai ti tou fiafia ;

²⁴ talie ko loku vosa leinei na mate, ti kua toe mauli a ia ; na puli a ia, ti kua toe maua a ia. Ti na lotou kamata fakafiafia loa.

²⁵ Kae na nofo le vosa uluaki i faisaga. I lana toe liliu mai, o fakafeofi mai loa ki le fale, na logo loa a ia ki se musika mo ni mako.

²⁶ Na kalagai loa e ia se tasi o le kau tagata fakasausau, ti na vesili loa a ia kiate ia pe kolea kua soko.

²⁷ Ti na pati loa le tagata fakasausau lena kiate ia : Kua toe liliu mai lou taina, ti kua tamate e lou tamana le uviki pipi peti, talie kua toe maua e ia lona vosa e malolo.

²⁸ Na itaita loa le vosa uluaki, ti na leaise loto loa a ia ke ulu ki fale. Na ulu ake loa lona tamana ki fafo o kole kiate ia ke ulu ki fale.

²⁹ Kae na tali loa a ia ki lona tamana : Ko leinei, kua lasi ai a fetuu mo laku tausi kiate koe, o leaise kau maumaui fua i se aso au fakatotonu, kae na leaise ke soli mai fua kiate au se uviki koti e tasi ke kau fiafia ai mo oku kaukau nea.

³⁰ Kae i le kaku mai o lou vosa, leia na kai ia ou koloa mo fafine faiaga, kua ke fakatotonu ke tamate kiate ia le uviki pipi peti !

³¹ Na pati loa le tamana kiate ia : Ei loku fanau, e ke nofo tuumau mo au, ti ko nea fuli a aku a au foki ;

³² kae na tonu mua ke tou kai mo fakafiafia, talie ko lou taina leinei na mate kae kua toe mauli a ia, ti na puli kae kua toe maua a ia.