Luka 13 - Tosi Tapu

Mauiga o le fakasemala

¹ I le temi lena, na au loa ni iki, o fakamatala kiate ia le nea leia na soko ki ni kau Kalilea ala na tamate e Pilato i le temi leia na lotou momoli ai alatou sakilifisio.

² Na tali loa a ia kia latou : Pe kotou manatu na agasala lasi ake a tagata Kalilea ana i la ake kau Kalilea fuli, talie kua lotou mamae lasi ai ?

³ E kau pati atu kia koutou, leai. Kae kapau e leaise kotou fakasemala o fetogi akoutou aga, ti e kotou mamate fuli loa.

⁴ Ti ko le tino agafulu tupu valu leia na solo ki ai le tule o Siloe, pe kotou manatu na lotou agasala lasi ake i la ake kakai fuli o Selusalemi ?

⁵ E kau pati atu kia koutou, leai. Kae kapau e leaise kotou fakasemala o fetogi akoutou aga, ti e kotou mamate fuli loa ofaipe latou ana.

Folafola o le fiki

⁶ Na toe fakasa foki e ia le folafola fakatata leinei : Na to e se tagata se fiki i lana vite. Na au loa a ia o afa i ai ni fua, ti na leaise maua fua e ia se nea.

⁷ Ti na pati loa a ia ki le tagata faivite : Ko le fetuu tolu loa leinei o laku tau au o afa fiki ake i le fiki nei, kae e leaise kau maua fua se nea. Sele a ia : kolea e maumaui noa ai e ia le kele.

⁸ Na tali loa le tagata faivite kiate ia : Aliki, toe tuku mua a ia ke tuu i le fetuu leinei ; e kau kenu takai loa i ona tafatafa, ti e kau laku loa ki ai se nea fakagako kele.

⁹ E lagi fua loa a ia i le fetuu ka au ; ti kapau e leai aifai, ti ke sele loa a ia.

Fakamauli o se fafine tua piko i le sapato

¹⁰ I se sapato, na akonaki loa Sesu i se sinakoka.

¹¹ Ti ko leinei, na i ai se fafine leia na ulu tino ai se laumalie veli leia na fakamasaki ia a ia talu mei fetuu e kau agafulu tupu valu ; na tua piko a ia, ti na leaise mafai ke toe tuu fakasako a ia.

¹² I le tio a Sesu ki le fafine, na kalagai loa e ia a ia, o pati kiate ia : Fafine kua fakamauli a koe i lou maimoa.

¹³ Ti na teki loa e ia ona lima ki le fafine. I le temi fai lena na tuu fakasako loa le fafine, o fakafetai ki le Atua.

¹⁴ Kae na itaita loa le pule o le sinakoka i le fakamauli o le masaki e Sesu i le aso o le sapato, ti na pati loa a ia ki le kakai : E i ai a aso e ono ala ke gaoi ai ; kotou au i aso ana ke fakamauli koutou, kae aua na kotou au i le aso o le sapato.

¹⁵ Na tali loa le Aliki kiate ia : Kau malualoi ! Pe leaise kotou ano i le aso o le sapato o tasi tatala lana pipi pe ko lana asino, o ave ke fakainu ?

¹⁶ Ti ko le fafine leinei, leia ko se taine o Apalaamo, leia na sai e Satana talu mei fetuu e kau agafulu tupu valu, pe leaise tonu ke saofaki a ia mei le tini lena i le aso o le sapato ?

¹⁷ I lana masau felaaki, na apele ona fili fuli i le luma, kae na fiafia le kakai ki nea fulumalilie fuli ala na fai e ia.

Folafola o le fatui sinapi mo le fakatupu

¹⁸ Na toe pati loa Sesu : E tatau mo lea le puleaga o le Atua, ti kolea ke kau fakatatau a ia ki ai ?

¹⁹ E tatau le puleaga o le Atua mo se fa fatui sinapi leia e too e se tagata o ti ki lona oloto ; e somo a ia, o liliu ko se laakau lasi, ti e nonofo loa a manu lele o le lagi i ona laa.

²⁰ Na toe pati loa a ia : Pe kau toe fakatatau loa kilea le puleaga o le Atua ?

²¹ E fakatatau a ia ki se ga fakatupu leia e too e se fafine o tuku ki ni kilo falina e kau lua tupu lima, ke tupu ai le falina katoa.

Akonaki i le ala ki Selusalemi : le matapa lau ikiiki

²² Na fakalaka loa Sesu i kolo lalasi mo kolo liliki o akonaki, ti mo ano ki Selusalemi.

²³ Na pati loa se tasi kiate ia : Aliki, pe ko se ga toka teiki fua leia e saofaki loa ? Na tali loa a ia kia latou :

²⁴ Kotou faiga ke kotou ulu i le matapa lau ikiiki. Talie e kau pati atu kia koutou, e toka api latou ala e fefai loa ke ulu, kae e leaise lotou mafai loa.

²⁵ Ka tuu loa le pule o le fale, o tapono le matapa, ti ko koutou, ala e tutuu loa i fafo, e fitifiti loa i le matapa, o pati : Aliki, Aliki, fakamavaa mai kia matou ! E tali atu loa a ia kia koutou : E leaise kau iloa pe ko koutou meifea !

²⁶ Ti e kotou kamata pati loa : Na motou kai mo inu i ou mua, ti na ke akonaki i omatou ala.

²⁷ Ti e tali loa a ia : E kau pati atu kia koutou, e leaise kau iloa pe ko koutou meifea ; kotou fakamamao atu iate au, koutou fuli ala e fai ia le agaveli.

²⁸ Ko lena le ganea leia ka maua ai loa a tagi mo fetati o nifo, mo ka kotou tio loa kia Apalaamo, mo Isaake, mo Sakopo, ti mo le kau polofeta katoa i le puleaga o le Atua, kae e ti loa koutou ki fafo.

²⁹ E au loa mei le sopoaga o le laa mo le galoaga o le laa, mei le potu tokelau mo le potu toga ; ti e lotou kai loa i le puleaga o le Atua.

³⁰ Ti ko leinei, e i ai loa ni mulimuli e liliu loa ko ni muamua, ti mo ni muamua e liliu loa ko ni mulimuli.

Tagi a Sesu ki Selusalemi

³¹ I le aso lena, na au loa ni iki o le kau faliseo o pati kiate ia : Mavae i leinei, o ano kese, talie e loto Elote ke tamate a koe.

³² Na pati loa a ia kia latou : Kotou ano o fakasa ki le lenato lena : Ko leinei e kau kapu a temonio mo fakamauli ni iki i le aso nei mo apogipogi, ti e oki loa laku gaoi i le tolu o aso.

³³ Kae e tonu ke kau saele i le aso nei, mo apogipogi, ti mo leia atu a aso ; talie e leaise malie ke mate se polofeta i se ganea kese i Selusalemi.

³⁴ Selusalemi, Selusalemi, leia e tamate ia le kau polofeta mo tuki fatui ia latou ala na kakau mai kiate koe, kua tua fia loku loto ke tanaki au fanau, ofaipe se tanaki e se ufa lona toloaki i lalo o ona kapakau, kae na leaise kotou loto ki ai !

³⁵ Koia, e tiaki ai loa lokoutou fale ke lavaki ; kae, e kau pati atu kia koutou, e leaise kotou tio loa kiate au o kaku ki lakotou pati : Manuia leia e au i le suafa o le Aliki !