Luka 12 - Tosi Tapu

Ko iki akonaki ki le kau tisipulo

¹ I le temi lena, na fakatasi ake loa le kakai o lau i afe, ti kua lotou fetakatakafiaki foki, na kamata masau loa Sesu ki ana tisipulo : Kotou tokaga ki le fakatupu a le kau faliseo, leia ko le malualoi.

² E leaise nea leia e munia e leaise tonu ke sa loa, ti e leaise nea leia e fakapulipuli e leaise tonu ke iloa loa.

³ Koia ko nea fuli ala e kotou masau ki ai i le fakapouli e logoi loa i le malama, ti ko le nea leia e kotou fakamumusu ki ai i kogafale e fakasa loa i taufufu.

⁴ E kau pati atu kia koutou, kia koutou ala ko oku kaukau nea : Aua na kotou i kia latou ala e tamate ia le tino, ti oki, ti e leaise lotou mafai se tasi ake a nea.

⁵ E kau fakasa atu loa kia koutou leia e tonu ke kotou i ki ai. Kotou i ki leia, mo ka oki lana tamate, e maua ia le pule ke ti ki le afi lee gato ; io, e kau pati atu kia koutou, ko ia lena e tonu ke kotou i ki ai.

⁶ Pe leaise fakatau ni miti e lima ki ni fa piesi e lua ? Kae e leaise galo se tasi fua ia laua ana i mua o le Atua.

⁷ Ti kua lau okoutou fului ulu fuli. Koia, aua na kotou i : E kotou mauiga ake i ni miti mauke ai.

⁸ E kau pati atu kia koutou, ko leia e fakasa ia loa au i mua o tagata, e toe fakasa loa a ia e le Vosa o le tagata i mua o le kau aselo a le Atua ;

⁹ kae ko leia e fakafiti loa kiate au i mua o le tagata, e toe fakafiti loa le Vosa o le tagata kiate ia i mua o le kau aselo a le Atua.

¹⁰ Ti ko leia e masau veli ki le Vosa o le tagata, e fakamolemole loa kiate ia ; kae ko leia e fatituu loa ki le Laumalie Maokioki e leaise toe fakamolemole loa kiate ia.

¹¹ Ka ave loa koutou ki sinakoka, ki mua o le kau tui fakamaau ti mo le kau pule, aua na kotou tuania pe feaki loa lakotou puipui koutou, pe kolea le nea ka kotou masau loa ki ai ;

¹² talie e ako atu loa e le Laumalie Maokioki kia koutou i le temi fai lena le nea leia e tonu ke kotou masau ki ai.

Le tagata mou koloa valea

¹³ Na pati loa se tasi kia Sesu, mei lotomalie o le kakai : Pule, pati mua ki loku taina ke vaelua mo au loma tofiga.

¹⁴ Na tali loa Sesu kiate ia : Tagata, ko ai leia na fakanofo ia au ke fakamaau ia akoutou visi, pe ke vae ia okoutou koloa ?

¹⁵ Ti na pati loa a ia kia latou fuli : Kotou tokaga ki le fulupipiki ; talie e leaise fakalogo le mauli o le tagata ki le lasi o nea ala e maua e ia.

¹⁶ Ti na fakasa loa e ia kia latou se folafola fakatata : Na fua o lasi ai a kele o se tagata mou koloa.

¹⁷ Ti na fakakaukau loa a ia i lona loto, o pati : Kolea ka kau fai loa ? Talie e leaise ganea leia ke tanaki ai laku magiti.

¹⁸ Ti na pati loa a ia, ko leinei le nea leia ka kau fai loa : E kau maumaui loa oku fale tanakiaga magiti, ti e kau toe fakatuu loa ni iki ake ala e toe lalasi ake, ti e kau tanaki loa ki ai aku magiti fuli mo oku koloa fuli ;

¹⁹ ti e kau pati loa ki loku laumalie : Ei loku laumalie, kua lasi ai ou koloa ala kua tanaki ki ni fetuu mauke ai ; malolo la, mo kai, mo inu, ti mo fiafia.

²⁰ Kae e pati le Atua kiate ia : Ko le vale a koe ! I le po fai leinei e toe afa atu loa kiate koe lou laumalie ; ti ko nea fuli ala na ke teuteui, pe a ai loa latou ?

²¹ E toe fenaaki foki ki leia e tanaki ia ni koloa kiate ia, kae e leaise mou koloa a ia i mua o le Atua.

Ko i mo tuania

²² Na pati loa Sesu ki ana tisipulo : Koia e kau pati ai kia koutou : Aua na kotou tuania ki lokoutou mauli ki le nea leia ka kotou kai loa, pe ki okoutou tino ki le nea leia ka kotou lava loa.

²³ Talie e mauiga ake le mauli i le nea kai, ti e mauiga ake le tino i le nea lava.

²⁴ Kotou tio ki kolopo : E leaise lotou faisaga pe utuutu, e leaise lotou tanaki ni nea kai ki se fata, kae e fagai latou e le Atua. E kotou mauiga lasi ake i manu lele !

²⁵ Ko ai ia koutou e mafai ia le fakaloaloa o lona mauli i se fatiga lima e tasi ki ona tuania ?

²⁶ Kapau e leaise kotou mafai fua le ga nea noa lena, ti kolea loa e kotou tuania ia ai leia ake a potu.

²⁷ Kotou tio pe feaki le tutupu o sei laakau o le vao : E leaise lotou gaoi mo lalaga ; kae e kau fakasa atu kia koutou, ko Salomone foki, i lona kololia katoa, na leaise teu ofaipe se tasi o sei laakau ana.

²⁸ Kapau e teu fenaaki e le Atua a laakau ala e tuu i le vao i le aso nei, ti e laku loa ki le afi i apogipogi, ti e toe feaki ake loa lana fakalava koutou, kakai tui gaegae ?

²⁹ Ti ko koutou, aua na kotou mamae o afa tuumau le nea leia ka kotou kai loa mo le nea leia ka kotou inu loa,

³⁰ Talie e afa a nea fuli ana e le kau pagani o le malama nei. E iloa e lokoutou Tamana e aoga a nea fuli ana kia koutou.

³¹ Kotou afa mua le puleaga o le Atua ; ti e soli atu loa i aluga a nea fuli ana kia koutou.

³² Aua na kotou i, ga kau manu ikiiki ; talie kua malie ki lokoutou Tamana ke tuku atu kia koutou le puleaga.

³³ Kotou fakatau okoutou koloa ti kotou soli lona paaga ki le kau mativa. Kotou fai ni taga paaga ala e leaise toe popo, kotou tanaki se koloa lee gato i le lagi, i le ganea leia e leaise kaku ki ai le tagata kaia, ti e leaise maumau ai a ugogo.

³⁴ Talie ko le ganea leia e tuku ai lokoutou koloa, ko le ganea lena e toe tuku ai foki lokoutou loto.

Mauiga o le nofo alaala

³⁵ Ke toi okoutou kilii pipi ki okoutou sulugalava, ti ke ula okoutou malama.

³⁶ Ti ko koutou, ke kotou faipe ni tagata ala e talitali ke toe liliu mai lolatou pule mei se faiavaga, o tupu ke fakamavaa kiate ia le matapa mo ka kaku mai o fitifiti i le matapa.

³⁷ Manuia a tagata fakasausau ana ka maua mai loa e le pule e alaala, mo ka kaku mai a ia ! E kau fakasa maoki atu kia koutou : E toi loa e ia lona kilii pipi, ti e fakaeke loa e ia latou ki le laupapa kai, ti e au loa a ia o takatuu kia latou.

³⁸ Pe au a ia i le loto malie o le pouli, pe i le mafoata, manuia a tagata fakasausau ana, mo ka e maua mai loa e ia latou e alaala !

³⁹ Ke kotou matala malie ki le nea leinei : Kanapau na iloa e le pule o le fale le ola leia kua tonu ke au ai le tagata kaia, e alaala loa a ia talie e leaise tuku loa e ia ke ulufia lona fale.

⁴⁰ Ko koutou foki, ke kotou nofo teuteu, talie e au loa le Vosa o le tagata i le ola leia na leaise kotou amanaki ki ai.

Ko tagata fakasausau e toka lua

⁴¹ Na pati loa Petelo kiate ia : Aliki, pe ke fakasa le folafola fakatata leinei kia matou tefua, pe ki tagata fuli ?

⁴² Ti na pati loa le Aliki : Ko ai loa le tagata taupau koloa agatonu mo poto leia e fakanofo loa e lona pule ke tokaga ki ana tagata gaoi, ti ke soli kia latou le nea kai leia e aoga i lona temi ?

⁴³ Manuia le tagata fakasausau lena, mo ka au loa lona pule, o maua mai a ia e fai fenaaki !

⁴⁴ E kau fakasa maoki atu kia koutou, e fakanofo loa e ia a ia ke pule ki ona koloa fuli.

⁴⁵ Kae, kapau e pati loa le tagata fakasausau lena i lona loto : E tuvai mai loku pule ; ti kapau e tamate loa e ia a tagata fakasausau mo fafine fakasausau, ti kapau e kai loa a ia mo inu ke kona,

⁴⁶ e au loa le pule o le tagata fakasausau lena i le aso leia e leaise amanaki a ia ki ai ti mo le ola leia e leaise iloa e ia, ti e maumaui loa e ia a ia, o soli kiate ia lona vaega mo le kau agaveli.

⁴⁷ Ko le tagata fakasausau leia e iloa ia le finegalo o lona pule, kae na leaise teuteui e ia se nea, ti na leaise gaoi a ia o mulimuli ki lona finegalo, e tamate loa a ia ki ni fa ta mauke.

⁴⁸ Kae ko leia, na leaise iloa ia le finegalo o le pule, kae na fai e ia ni nea ala e tonu ke tautea, e tamate loa a ia ki ni fa ta teiki. E afa lasi loa ki leia na soli lasi ki ai, ti e fakaala lasi loa ki leia na fanaki lasi ki ai.

Kilisito, tupuaga o mavaevae

⁴⁹ Na kau au o ti se afi ki le malama nei ; ti kolea e kau oli ki ai, mo kapau kua ula a ia ?

⁵⁰ E i ai se papitema leia e tonu ke kau papitema ai, ti e kau loto ke fai ti ke soko mai la !

⁵¹ Pe kotou manatu na kau au o aumai le tokamalie ki le malama nei ? Leai, na kau au o aumai le mavaevae.

⁵² Talie e kamata nei, e mavaevae loa le toka lima i se loto fale, ko le toka tolu e fakafesagai loa ki se toka lua, ti ko se toka lua ki se toka tolu ;

⁵³ ko le tamana ki lona vosa ti ko le vosa ki le tamana, ko le tinana ki le taine ti ko le taine ki le tinana, ko le tinana ki le fugao fafine ti ko le fugao fafine ki le tinana.

⁵⁴ Ti na toe pati loa Sesu ki le kakai : Ka kotou tio ki se ao lei e mafuta mei le galoaga o le laa, e kotou pati aifai : Ka ua loa, ti e soko a ia.

⁵⁵ Ti ka kotou tio kua agi mai le matagi o le potu saute, ti e kotou pati : Ka vevela loa, ti e soko a ia.

⁵⁶ Tagata malualoi ! E kotou iloa le agaaga o le kele mo le lagi ; kolea e leaise kotou matala ai ki le agaaga o le temi nei ?

⁵⁷ Ti kolea e leaise kotou iloa ai i okoutou loto le nea leia e totonu ?

⁵⁸ Ka ke ano mo lou fili ki mua o le tui fakamaau, faiga ke ke lauatea meiate ia i le temi leia e kolua ano fakatasi ai i le ala, talie ke aua na ave loa e ia a koe ki mua o le tui fakamaau, ti ke aua na ave loa a koe e le tui fakamaau ki le ofisa, ti ke aua na fakaulu loa a koe e le ofisa ki le pilisoni.

⁵⁹ E kau fakasa kiate koe, e leaise ke mavae loa mei ai kae e leikiaise ke ui lou maua o kaku ki le fa piesi fakaoki.