Luka 11 - Tosi Tapu

Ako e Sesu o le faikole ki ana tisipulo

¹ Na faikole loa Sesu i se aso i se ganea. I le oki o lana faikole, na pati loa se tasi o ana tisipulo kiate ia : Aliki, ako mai kia matou le faikole, ofaipe lona ako e Soane ki ana tisipulo.

² Na pati loa Sesu kia latou : Ka kotou faikole, ti kotou pati : Tamana ! Ke tapusa lou suafa ; ti ke au lou pule.

³ Soli mai kia matou le pane o aso taki tasi ;

⁴ fakamolemole mai ki amatou agasala, talie e motou fakamolemole foki kia latou ala e agasala mai kia matou ; ti aua na ke tuku matou ki le fakasala.

Folafola o kaunea e toka tolu

⁵ Na toe pati loa Sesu kia latou : Kapau e maua e se tasi o koutou sona kaukau nea, ti e ano a ia o afa a ia i le vaeluapo, o pati kiate ia : Ei loku kaukau nea, soli mai mua ni fa pane e tolu,

⁶ talie kua kaku mai se tasi o oku kaukau nea ki loku kaiga, kae e leaise kau maua se nea ke soli kiate ia,

⁷ ti kapau, mei loto o lona fale, e tali mai le kaukau nea lena kiate ia : Aua na ke fakakinakinau mai kiate au, kua mapono le matapa, ti kua motou momoe, a au mo aku fanau, e leaise mafai ke kau toe tuu ki aluga o soli atu ni pane.

⁸ E kau fakasa kia koutou, kapau na leaise tuu loa a ia o soli kiate ia a pane talie ko lona kaukau nea a ia, e tuu loa a ia ki aluga o tupu ko lana fakakinau, ti e soli loa e ia kiate ia a nea fuli ala e aoga kiate ia.

⁹ Ti ko au, e kau fakasa kia koutou : Kotou kole ti e soli atu loa kia koutou ; kotou afa ti e kotou maua loa ; kotou fitifiti ti e fakamavaa atu loa kia koutou.

¹⁰ Talie ko leia e kole e tali, ti ko leia e afa e maua, ti e fakamavaa ki leia e fitifiti.

Folafola o le tamana leia e tokaga ki ana fanau

¹¹ Ko ai le tamana leia ia koutou e soli ia loa se fa fatu ki lona vosa, mo kapau e kole e ia kiate ia se ga pane ? Pe soli loa e ia kiate ia se gata mo kapau e kole e ia kiate ia se ga ika ?

¹² Pe soli loa e ia kiate ia se molokau kona mo kapau e kole e ia kiate ia se fuai moa ?

¹³ Kapau loa, ko koutou, ala ko nea agaveli, e kotou poto i le soli o nea malilie ki akoutou fanau, pe feaki ake loa le lasi o le fia soli e le Tamana i Selo o le Laumalie Maokioki kia latou ala e kole ake ia kiate ia.

Sesu mo Pelesepu : le agasala ki le Laumalie Maokioki

¹⁴ Na kapu loa e Sesu se temonio i se tagata gutu mate. I le mavae a le temonio, na masau loa le tagata gutu mate, ti na punamauli ai le fenua.

¹⁵ Kae na pati loa ni iki : E kapu e ia a temonio i le makeke o Pelesepu, ko le pule o le kau temonio.

¹⁶ Ti ko iki, o tupu ke asiasii a ia, na kole ia loa kiate ia se fakamailoga mei le lagi.

¹⁷ Kae na iloa e Sesu alatou manatu, ti na pati loa a ia kia latou : Ko puleaga fuli ala e fetauaki, e mavetevete loa ; ti ko fale fuli ala e fetauaki, e solo loa.

¹⁸ Kapau e tau Satana kiate ia totonu, e feaki loa ke makeke lona puleaga, mo kapau e kotou pati e kau kapu a temonio i le makeke o Pelesepu ?

¹⁹ Ti kapau ko au, e kau kapu a temonio i le makeke o Pelesepu, ko okoutou vosa, e lotou kapu a temonio i le makeke o ai ? Koia leia e lotou liliu loa, latou totonu, ko okoutou tui fakamaau.

²⁰ Kae, kapau e kau kapu a temonio i le makeke o le Atua, ti kua au le Puleaga o le Atua kia koutou.

²¹ Kapau e leo e se tagata makeke lona fale ki ni masafu tau, e malui ana nea fuli.

²² Kae, kapau e oso mai se tasi leia e makeke ake iate ia, o malo iate ia, e too e le tagata lena a masafu tau fuli ala na fanaki a ia ki ai, kae e tufa e ia ana nea.

²³ Ko leia e leaise kau mo au, e agatuu a ia kiate au, ti ko leia e leaise tanaki mo au, e veteki e ia.

Le toe liliu o le laumalie veli

²⁴ Ka mavae le laumalie veli i se tagata, e ano a ia ki ni ganea malo o afa se maloloaga. Ti kapau e leaise maua e ia se maloloaga, ti e pati loa a ia : E kau toe liliu loa ki loku fale leia na kau mavae mei ai ;

²⁵ ti e ka kaku a ia ki ai, e maua e ia le fale kua seu mo teuteui.

²⁶ Ti e ano loa a ia o taki mai ni iki ake laumalie e fitu ala e agaveli ake iate ia ; ti e lotou ulu loa ki le fale o nonofo i ai, ti e veli oki ake loa le mauli fakamuli o le tagata lena i le uluaki.

²⁷ I le lolotoga o le masau a Sesu, na kalaga loa se fafine mei loto malie o le kakai kiate ia : Manuia le manava leia na fakanofo ia a koe ! Manuia a u ala na fakau ia a koe !

²⁸ Kae na tali loa Sesu : Manuia ake latou ala e logo ki le folafola a le Atua, ti e lotou taupau a ia !

Fakamailoga o Sonasi

²⁹ I le tanaki mai o se kakai toka api kiate ia, na pati loa Sesu kia latou : Ko le tautupu leinei ko se tautupu agaveli ; e lotou afa se fakamailoga, kae e leaise toe tuku loa kia latou se tasi ake fakamailoga i leia o Sonasi.

³⁰ Talie, ofaipe Sonasi leia na liliu ko se fakamailoga ki le kau Ninive, e toe tatau foki mo le Vosa o le tagata, e liliu loa a ia ko se fakamailoga ki le tautupu leinei.

³¹ E tuu ake loa ki aluga le fafine sau o le saute mo tagata o le tautupu leinei i le aso o le fakamaau, ti e fakamaaui loa e ia latou, talie na au loa a ia mei potupotu o le malama nei o tupu ke logo a ia ki le poto o Salomone ; kae e i ai se tasi i leinei leia e lasi ake ia Salomone.

³² E tutuu ake loa ki aluga a tagata o Ninive i le aso o le fakamaau mo le tautupu nei, ti e lotou fakalakasala loa latou, talie na lotou fakasemala loa i le akonaki a Sonasi ; kae e i ai se tasi i leinei leia e lasi ake ia Sonasi.

Folafola o le fa malama mo le fa mata

³³ E leaise tutu e se tasi se malama ke tuku ki se ganea fakapulipuli pe ke fakapulou ki se kisi, kae e teki a ia ki le tekiaga malama, o tupu ke tio latou ala e ulu ki le malama.

³⁴ Ko lou mata ko le malama a ia o lou tino. Kapau e malie lou mata, ti e malama lou tino katoa ; kae kapau e veli lou mata, ti e nofo lou tino i le fakapouli.

³⁵ Koia, tokaga ki le malama leia e nofo iate koe ke aua na liliu a ia o fakapouli.

³⁶ Koia kapau e fakamalamai lou tino katoa, o leaise tuku se koga i le fakapouli, ti e malama loa lou tino katoa, ofaipe ka fakamalamai a koe e le malama ki lona malama gigila.

Malaia ki faliseo mo toketa o le lao

³⁷ I le lolotoga o le masau a Sesu, na kole ake loa e se tagata faliseo kiate ia ke nake o kai i lona fale. Na ulu loa a ia ki ai, o nofo ki le laupapa kai.

³⁸ Na ofolele le tagata faliseo i lana tio na leaise fanofano Sesu i mua o le kai.

³⁹ Kae na pati loa le Aliki kiate ia : Ko koutou kau faliseo, e kotou fakamea a tafa o le ipu mo le pa, kae i loto e kotou apele i kaia mo agaveli.

⁴⁰ Kau valeuka ! ko leia na fau ia a tafa pe na leaise fau foki e ia mo loto ?

⁴¹ E malie ake ke kotou soli ki le kau mativa le nea leia e tuku i loto o akoutou ipu mo akoutou pa, ti e mea loa a nea fuli kia koutou.

⁴² Kae malaia kia koutou, kau faliseo ! Talie e kotou soli le vaega kau agafulu o le menete, mo le lue, mo faasiga magiti kesekese, kae e kotou fakanoai le faitotonu mo le alofa o le Atua : E tonu ke fai a nea anei, ti ke aua na fakanoai foki mo nea ana.

⁴³ Malaia kia koutou, kau faliseo ! Talie e kotou manako ki uluaki ekeekeaga i sinakoka, ti e kotou afa a fakamalo i malae fakafenua.

⁴⁴ Malaia kia koutou ! Talie e kotou faipe ni tanuma ala e leaise mailoga, ti e saele ai i aluga kae e leaise iloa.

⁴⁵ Na masau loa se tasi o le kau toketa o le lao, o pati kiate ia : Pule, i lau masau fenaaki, e ke toe valoki ai foki matou.

⁴⁶ Ti na tali loa Sesu : Malaia foki kia koutou, kau toketa o le lao ! Talie e kotou teki ki le kakai ni kavega e faigataa lona amo, ti e leaise kotou fakalave fua kia latou se maikao fua e tasi o okoutou lima.

⁴⁷ Malaia kia koutou ! Talie e kotou fau a tanuma o le kau polofeta, ala na tamate e okoutou tupuaga.

⁴⁸ Koia e kotou liliu ai loa ko ni tagata fakamaoki ki gaoi o okoutou tupuaga, talie na lotou tamate le kau polofeta, ti e kotou fau olatou tanuma.

⁴⁹ Koia na fakasa ai e le Atua i lona poto : E kau kakau loa kia latou ni polofeta mo ni apositolo ; ti e lotou tamate loa a iki kae e lotou fakavelivelii loa a iki.

⁵⁰ Koia e afa loa ki le tautupu leinei le toto o le kau polofeta fuli leia na liligi talu mei le fakatupu o le malama nei,

⁵¹ mei le toto o Apele o kaku ki le toto o Sakalia, leia na tamate i le vasa o le aletale mo le sagatualio o le fale tapu ; io, e kau fakasa atu kia koutou, e toe afa loa a nea ana ki le tautupu leinei.

⁵² Malaia kia koutou, kau toketa o le lao ! Talie na kotou too le kalavi o le poto ; na leaise kotou ulu a koutou totonu, ti na kotou tapui ke ulu latou ala na fia ulu ki ai.

⁵³ I lana mavae i lena, na kamata masau fakaitaita loa le kau sekelipa mo le kau faliseo kiate ia ti mo fakamasaui a ia ki ni nea mauke ai,

⁵⁴ o fai ni masele kiate ia, ke fakamauatoka ai se masau sala mei lona gutu.