Luka 10 - Tosi Tapu

Kakau e Sesu o le tino fitu

¹ I le sili o le nea a ia, na filifili loa e le Aliki ni iki ake tisipulo e tino fitu, ti na kakau loa e ia latou taki toka lua i ona mua ki kolo fuli ti mo ganea fuli ala kua tonu ke ano a ia totonu ki ai.

² Ti na pati loa a ia kia latou : E lasi ai le fuata, kae e toka lavaki fua le kau gaoi. Koia kotou kole ai ki le pule o le fuata ke kakau ni tagata gaoi ki lana fuata.

³ Kotou ano ! Ko leinei, e kau kakau koutou ofaipe ni akeno ki loto malie o ni lupo.

⁴ Aua na kotou too se paaga, pe ko se taga, pe ko ni taka, ti aua na kotou fakamalo ki se tasi i le ala.

⁵ I fale ala e kotou ulu ki ai, kotou pati mua : Ke nofo le tokamalie i le fale leinei !

⁶ Kapau e nofo i ai se tagata o le tokamalie, ti e nofo loa lokotou tokamalie iate ia ; ti kapau e leai, ti e toe liliu mai loa a ia kia koutou.

⁷ Kotou nonofo loa i le fale lena, o kai mo inu le nea leia e soli atu loa kia koutou, talie e tonu ke maua e le tagata gaoi lona totogi. Aua na kotou fesikiaki mei leia a fale ki leia a fale.

⁸ I kolo fuli ala e kotou ulu loa ki ai, ti e fakatalitali ai loa koutou, kotou kai a nea ala e tuku atu loa kia koutou,

⁹ ti kotou fakamauli le kau masaki ala e nonofo i ai, ti kotou pati kia latou : Kua fakafeofi mai le puleaga o le Atua kia koutou.

¹⁰ Kae i kolo fuli ala e kotou ulu loa ki ai, ti e leaise fakatalitali loa koutou, kotou ano i ona ala, o pati :

¹¹ E motou tutui kia koutou le efu totonu o lokoutou kolo talie na piki a ia ki omatou vae : Kae, ke kotou iloa fua kua fakafeofi mai le puleaga o le Atua kia koutou.

¹² E kau fakasa kia koutou i le aso o le fakamaau, e ikiiki loa le tautea o Sotoma i le tautea o le kolo lena.

Valoki o latou e leaise tui

¹³ Malaia kiate koe, Kolasini ! Malaia kiate koe, Petesaita ! Talie kanapau na fai i Tile mo Sitone a milakulo ala na fai i loto malie o kolua, kua fualoa ake lola fakasemala, o too le taga mo le mugalafu.

¹⁴ Koia, i le aso o le fakamaau, e tautea ai loa a Tile mo Sitone o maamaa ake ia koulua.

¹⁵ Ti ko koe, Kafanaume, pe ke malaga loa o kaku ki le lagi ? E tuku loa a koe ki lalo o kaku ki le nofoaga o le kau mate.

¹⁶ Ko leia e fakalogo kia koutou e fakalogo a ia kiate au, ti ko leia e tiaki ia koutou e tiaki e ia au ; ti ko leia e tiaki ia au e tiaki e ia leia na kakau ia mai au.

Toe liliu o tisipulo ; fiafia o Sesu

¹⁷ Na toe liliu loa le tino fitu i se fiafia, o pati : Aliki, kua fakalogo mai foki a temonio kia matou i lou suafa.

¹⁸ Na pati loa Sesu kia latou : Na kau tio ki le vilo a Satana mei lagi ofaipe se uila.

¹⁹ Ke kotou iloa na kau tuku kia koutou le makeke ke takatakafi ai a gata, mo sekolopio, ti mo le makeke katoa o le fili ; ti e leaise mafai loa ke fakavelii koutou e se nea.

²⁰ Kae aua na kotou fiafia, o tupu kua fakalogo atu a laumalie veli kia koutou ; kae kotou fiafia talie kua tosi okoutou igoa i le atu lagi.

²¹ I le lakaga fai lena, na fiafia loa Sesu i le Laumalie Maokioki, o pati : E kau fakavikiviki kiate koe, Tamana, Aliki o le lagi mo le kele, i lau fufu a nea ana ki le kau popoto mo le kau atamai, kae kua ke fakasa latou ki toe liliki. Io, Tamana, e kau fakavikiviki kiate koe talie ko lou finegalo malie a ia.

²² Kua tuku mai kiate au a nea fuli e loku Tamana. E leaise iloa e se tasi pe ko ai le Alo, ko le tamana toka tasi fai ; ti e leaise iloa e se tasi pe ko ai le Tamana, ko le Alo toka tasi fai ti mo leia e loto le Alo ke fakasa a ia ki ai.

²³ Ti na mafuli loa a ia ki ana tisipulo, o pati kia latou tefua : Manuia a mata ala e tio ki nea ala e kotou tio ki ai !

²⁴ Talie e kau pati atu kia koutou na toka api ai a polofeta mo sau ala na oli ke tio ki nea ala e kotou tio ki ai, kae na leaise lotou tio ki ai, ke logo ki nea ala e kotou logo ki ai, kae na leaise lotou logo ki ai.

Vesili a le toketa o le lao kia Sesu

²⁵ Na tuu loa ki aluga se toketa o le lao o pati kia Sesu, ke asiasii ai a ia : Pule, kolea le nea e tonu ke kau fai ke maua ai le mauli lee gato ?

²⁶ Na pati loa Sesu kiate ia : Kolea le nea e tuu i le lao ? Kolea e ke lau i ai ?

²⁷ Na tali loa a ia : E ke alofa loa ki le Aliki, lou Atua, i lou loto katoa, mo lou laumalie katoa, mo lou makeke katoa, ti mo lou atamai katoa ; ti mo lou oloi ofaipe koe totonu.

²⁸ Na pati loa Sesu kiate ia : Kua ke tali totonu, fai a ia, ti e ke mauli loa.

²⁹ Kae i lana fia fakatonu ia a ia, na pati loa a ia kia Sesu : Ti ko ai loku oloi ?

Folafola o le tagata Samalitano

³⁰ Na toe masau loa Sesu, o pati : Na ifo se tagata mei Selusalemi ki Seliko. Na vilo loa a ia ki lima o le kau kaia, ala na tatala ia loa iate ia ona kofu, mo tamate a ia, ti na lotou ano loa, kae tuku a ia kua teitei mate.

³¹ Ko se tagata faisakilifisio, leia na fuafuaki ifo mai i le ala lena, na tio loa ki le tagata lena, kae na fakalaka kese loa a ia.

³² Ko se Levita, leia na toe kaku mai foki ki le ganea lena, na tio ki le tagata, kae na toe fakalaka kese loa a ia.

³³ Kae ko se tagata Samalitana, leia na fanoga o kaku mai ki le ganea lena, na tio loa ki le tagata, ti na manavaalofa loa a ia kiate ia.

³⁴ Na fakafeofi loa a ia kiate ia, ti na liligi loa e ia se lolo mo se vino ki ona lavea, ti na sai loa e ia latou ; ti na luluku loa e ia le tagata o fakaeke ki lana manu fanoga, ti na ave loa e ia a ia ki se fale talifanoga, ti na tokaga loa a ia kiate ia.

³⁵ I leia ake a aso, na too loa e le tagata Samalitana ni fa tenalio e lua, o soli ki le pule o le fale talifanoga, ti na pati loa a ia kiate ia : Tokaga kiate ia, ti ko le nea leia e ke toe fakaaoga loa kiate ia, e kau totogi atu loa a ia kiate koe i laku toe liliu mai.

³⁶ Ko ai leia i le toka tolu lena e ke pati ko le oloi o leia na vilo ki le kau kaia ?

³⁷ Na tali loa le toketa o le lao : Ko leia na fakasa ia le manavaalofa ki le tagata lena. Ti na pati loa Sesu kiate ia : Ano, ti ke fai fenaaki.

Maleta mo Malia

³⁸ I le fanoga a Sesu i le ala mo ana tisipulo, na ulu loa a ia ki se kolo, ti ko se fafine, na igoa ko Maleta, na tali ia loa a ia i lona fale.

³⁹ Ti na i ai sona taina, na igoa ko Malia, leia na tonatona i vae o le Aliki, o fakalogo ki lana folafola.

⁴⁰ Ko Maleta, leia na tokaga ki kauga o le fale, na oso ake loa, o pati : Aliki, pe nea noa kiate koe ke tiaki au e loku taina ke kau gaoi toka tasi ? Koia ke ke pati kiate ia ke tokoi mai kiate au.

⁴¹ Na tali loa le Aliki kiate ia : Maleta, Maleta, kua ke oso saele mo tokaga ki nea mauke ai,

⁴² kae ko le nea fai e tasi e aoga. Ti kua filifili e Malia le vaega malie, leia e leaise toe too loa iate ia.