Luka 1 - Tosi Tapu

¹ O tupu na toka api ai latou ala na faiga ke fau ia se fakamatala o nea ala na soko ia matou,

² o mulimuli ki le nea leia na tuku mai kia matou e latou ala na tio mata ki ai, ti kua liliu ko ni tagata fakasausau ki le folafola, talu mei le kamataaga ;

³ na kau manatu foki, i le oki o laku afaafa fakatotonu a nea fuli talu mei le kamataaga, ke tosi fakasosolo atu latou kiate koe, ei Teofile malie ai,

⁴ o tupu ke ke iloa le maoki o akonaki ala kua ke tali ia.

Fakasa o le tupu o Soane-Patita

⁵ I le temi o Elote, sau o Sutea, na i ai se tagata faisakilifisio, na igoa ko Sakalia, mei le kalasi o Apia ; ti na au lana avaga mei taineliki o Alone, ti na igoa a ia ko Elisapeta.

⁶ Na la agatonu toka lua i mua o le Atua, o tausi malie a lao fuli mo fakatotonu fuli a le Aliki.

⁷ Na leai sa la fanau, talie na paa Elisapeta ; ti kua la matutua toka lua foki.

⁸ Kae i le lolotoga o lana fai ona maua i mua o le Atua, o mulimuli ki le lakaga o lona kalasi, na vilo loa le filifili kiate ia,

⁹ Ke ulu a ia ki le fale tapu o le Aliki o momoli le nea fakamanogi o mulimuli ki le lekula o le gaoi fakapelepitelo.

¹⁰ Na nofo le kakai katoa o faikole i fafo i le momoli o le nea fakamanogi.

¹¹ Ti na sa loa se aselo o le Aliki kia Sakalia, o tuu i le fetuu atamai o le aletale o kaloni.

¹² Na i loa Sakalia i lana tio ki le aselo, ti na teteki lasi a ia.

¹³ Kae na pati loa le aselo kiate ia : Aua na ke i, Sakalia, talie kua tali lau kole. E fanaui loa e lou avaga ko Elisapeta se vosa kiate koe, ti e ke soli loa kiate ia le igoa ko Soane.

¹⁴ E liliu loa a ia kiate koe ko se tupuaga o se fiafia lasi, ti e fakafiafia loa se toka api i lona tupu.

¹⁵ Talie e lasi loa a ia i mua o le Aliki. E leaise inu loa e ia se vino, pe ko se kava makeke, ti e apele loa a ia i le Laumalie Maokioki mei le manava o lona tinana ;

¹⁶ Ti e toe taki loa e ia se toka api i vosa o Iselaele ki le Aliki, lolatou Atua ;

¹⁷ E saele loa a ia i mua o le Atua mo le laumalie ti mo le makeke o Elia, ke toe taki mai ai a loto o tamana ki fanau, ti mo le kau patigataa ki le poto o le kau agatonu, o tupu ke teuteui se kakai ke malie ki le Aliki.

¹⁸ Na pati loa Sakalia ki le aselo : E kau iloa loa i lea le nea a ia ? Talie kua kau matua, ti kua lasi fetuu o loku avaga.

¹⁹ Na tali loa le aselo kiate ia : Ko au Kapeliele, e kau tuu i mua o le Atua ; na kakau mai au ke au o masau atu kiate koe, ti mo fakailo atu kiate koe le logo malie lena.

²⁰ Ti ko leinei, e ke gutu mate loa, ti e leaise mafai loa lau masau o kaku ki le aso leia e soko ai loa a nea ana, talie na leaise ke tui ki aku folafola, ala e soko loa i lona temi.

²¹ Kae na talitali le kakai kia Sakalia, o punamauli i lana nofo fualoa i le fale tapu.

²² I lana ulu ki fafo, na leaise mafai loa e ia ke masau kia latou, ti na lotou matala loa na tio a ia ki se nea i le fale tapu, talie na kamokamo a ia kia latou, kae na leaise masau a ia.

²³ I le oki o ona aso gaoi, na ano loa a ia ki lona fale.

²⁴ I le sili o aso ana, na tinae loa Elisapeta, lona avaga. Ti na mumuni loa a ia i masina e lima, o pati :

²⁵ Kua fai e le Aliki le kalasia kiate au, i le aso leia na tio ai ona mata kiate au, ke too iate au loku luma i mua o tagata.

Fakasa o le tupu o Sesu

²⁶ I lona masina ono, na kakau loa e le Atua le aselo ko Kapeliele ki se kolo o Kalilea, na igoa ko Nasaleti,

²⁷ ki se taine taupoou kua fakapapau ki se tagata mei le fale o Tavite, na igoa ko Sosefo. Ko le igoa o le taupoou ko Malia.

²⁸ Na ulu loa le aselo ki le fale o Malia, o pati : E kau fakaalofa atu kiate koe, a koe leia kua fai ki ai se kalasia ; e iate koe le Aliki.

²⁹ I lona punamauli i le masau lena, na fakakaukau loa a ia ki le uiga o le fakaalofa lena.

³⁰ Kae na pati loa le aselo kiate ia : Aua na ke i, Malia, talie kua ke maua se kalasia i mua o le Atua.

³¹ Ti ko leinei, e ke tinae loa, ti e ke fanaui loa se tama, ti e ke soli loa kiate ia le igoa ko Sesu.

³² E lasi loa a ia, ti e fakaigoa loa a ia ko le Alo o le Taualuga, ti e soli loa e le Aliki Atua kiate ia le ekeekeaga o Tavite, lona tamana.

³³ E sau loa a ia i le fale o Sakopo o lee gato, ti e leaise toe gato loa lana pule.

Tupu fakamilakulo i le manava o Malia

³⁴ Na pati loa Malia ki le aselo : Pe soko feaki loa le nea lena, talie e leaise kau iloa se tagata ?

³⁵ Na tali loa le aselo kiate ia : E au loa le Laumalie Maokioki kiate koe, ti e fakamalumalu loa a koe e le mafimafi o le Taualuga. Koia e fakaigoa ai loa le fanau maokioki leia e tupu loa meiate koe ko le Alo o le Atua.

³⁶ Ko leinei, kua tinae foki Elisapeta, lou kaiga, ko se toe tama, kae kua finematua : ti ko leia na pati e paa kua nofo a ia i lona masina ono.

³⁷ Talie e leaise faigataa se nea ki le Atua.

³⁸ Na pati loa Malia : Ko au ko le fafine fakasausau a le Aliki ; ke fai kiate au o mulimuli ki lau folafola ! Ti na mavae loa le aselo iate ia.

Asiasi a Malia kia Sapeta

³⁹ I aso ana, na tuu ake loa Malia o ano fakatavili ki mauga, ki se kolo o Suta.

⁴⁰ Ti na ulu loa a ia ki le fale o Sakalia, o fakaalofa kia Elisapeta.

⁴¹ I le logo fai a Elisapeta ki le fakaalofa a Malia, na soposopo loa lona toe i lona manava, ti na apele loa Elisapeta i le Laumalie Maokioki.

⁴² Ti na kalaga loa a ia o leo lasi : E ke manuia a koe i fafine fuli, ti e manuia le fua o lou manava.

⁴³ Ti e feaki kua tuku mai ai kiate au ke au le tinana o loku Aliki kiate au ?

⁴⁴ Talie ko leinei, i le lakaga fai leia na lave ai le leo o lau fakaalofa ki loku taliga, na soposopo le toe i le fiafia lasi i loku manava.

⁴⁵ Manuia leia na tui : talie e fakasoko loa a nea ala na fakasa kiate ia mei le Aliki.

Katiko a Malia

⁴⁶ Ti na pati loa Malia : E fakavikiviki lasi loku laumalie ki le Aliki,

⁴⁷ Ti e fiafia loku loto i le Atua, loku Fakamauli.

⁴⁸ Talie na tagaki mai e ia ona mata ki le gaegae o lana fafine fakasausau. Talie ko leinei, i le lakaga nei e pati loa tautupu fuli kiate au : Fafine manuia,

⁴⁹ Talie na fai e le Mafimafi kiate au ni nea lalasi. E maokioki lona suafa,

⁵⁰ Ti e mafola lona manavaalofa i le tautupu ki le tautupu Kia latou ala e i kiate ia.

⁵¹ Na fakasa e ia le makeke o lona lima ; Na veteki e ia latou ala na nonofo mo ni manatu fia nealasi i olatou loto.

⁵² Na fakaifo e ia le kau makeke i olatou ekeekeaga fakasau, Ti na siki e ia ki aluga latou ala e taulalo.

⁵³ Na fakamakona e ia ki nea malilie latou ala na fia kai, Kae na kakau e ia le kau mou koloa ke ano mo lima ata.

⁵⁴ Na tokoi a ia ki Iselaele, lana tagata fakasausau, Ti na manatui e ia lona manavaalofa,

⁵⁵ Ofaipe lana fakasa ki otatou tamana, Kia Apalaamo mo lona sakoga o lee gato.

⁵⁶ Na nofo loa Malia mo Elisapeta i ni masina e tolu, ti na toe liliu loa a ia ki lona fale.

Tupu o Soane-Patita

⁵⁷ Na soko loa le temi leia kua tonu ke fanau ai Elisapeta, ti na fanaui loa e ia se tama.

⁵⁸ Na logo loa ona kau vasaa fale mo ona kaiga kua fakasa e le Aliki lona manavaalofa kiate ia, ti na lotou fiafia loa mo ia.

⁵⁹ I le valu o aso, na lotou au loa ke silikosisio le toe, ti na lotou fakaigoa loa a ia ko Sakalia, ki le igoa o lona tamana.

⁶⁰ Kae na pati loa lona tinana kia latou : Leai, e igoa loa a ia ko Soane.

⁶¹ Na lotou pati loa kiate ia : E leaise igoa se tasi i lou famili ki le igoa lena.

⁶² Ti na lotou fai loa ni kamokamo ki lona tamana ke iloa pe ko ai lona igoa.

⁶³ Na kole loa e Sakalia se ga pepa, ti na tosi loa e ia ki ai : Ko Soane lona igoa. Na lotou punamauli fuli loa.

⁶⁴ I le lakaga fai lena, na mavaa loa lona gutu, mo matala lona alelo, ti na masau loa a ia o fakafetai ki le Atua.

⁶⁵ Ti na vilo loa le i ki le kakai katoa o le potu fenua lena ; ti na masaui loa a nea fuli ana i mauga fuli o Sutea.

⁶⁶ Ko latou fuli ala na logo loa ki nea ana na taupau ia loa latou i olatou loto, o pati : Pe feaki loa le toe lena ? Talie na iate ia le lima o le Aliki.

Katiko a Sakalia

⁶⁷ Na apele loa lona tamana ko Sakalia i le Laumalie Maokioki, ti na folafola fakakikite loa a ia, o pati :

⁶⁸ Fakafetai ki le Aliki, le Atua o Iselaele, Talie kua asiasi a ia ki lona kakai ti kua totogi e ia a ia,

⁶⁹ Ti kua tuku e ia se fakamauli mafimafi kia tatou I le fale o Tavite, lana tagata fakasausau,

⁷⁰ Ofaipe lana fakasa i le gutu o ana polofeta maokioki i temi afea,

⁷¹ Ko se Fakamauli leia e saofaki ia tatou i otatou fili ti mo lima o latou fuli ala e vesia mai kia tatou !

⁷² E fakasa e ia i ai lona manavaalofa ki otatou tamana, Ti e manatui e ia lana sai maokioki,

⁷³ O mulimuli ki le fakapapau leia na fai e ia kia Apalaamo, lotatou tamana,

⁷⁴ Ke fakataga mai kia tatou, i le oki o lotatou saofaki i lima o otatou fili, Ke tou tausi kiate ia sala i,

⁷⁵ Ti ke tou saele i ona mua i le maokioki mo le faitotonu i aso fuli o lotatou mauli.

⁷⁶ Ti ko koe, ga toe, e fakaigoa loa a koe ko le polofeta o le Taualuga. Talie e ke saele loa i mua o le Aliki, o teuteu ona ala,

⁷⁷ O tupu ke fakasa ki lona kakai le iloa o le fakamauli I le fakamolemole o ana agasala,

⁷⁸ O tupu ko le manavaalofa mo le agamalie o lotatou Atua, Leia na mu ai le laa kia tatou mei aluga,

⁷⁹ Ke fakamalama latou ala e tonatona i le fakapouli mo le malu o le mate, Ke taki otou vae i le ala o le tokamalie.

⁸⁰ Ti na tupu le toe o lasi, ti na fakamakeke a ia i le laumalie. Ti na nofo loa a ia i toafa o kaku ki le aso leia na tuu ai loa a ia i mua o Iselaele.