Lua tosi o Sau 9 - Tosi Tapu

Seu, sau o Iselaele

¹ Na kalagai loa e Eliseo, le polofeta, se tasi i vosa o le kau polofeta, o pati kiate ia : Toi lou kilii pipi, ti ke too le fagu lolo leinei, o ano ki Lamoti i Kalaate.

² Ka ke kaku loa ki ai, afa a Seu, vosa o Sosafate, vosa o Nimesi. E ke ano loa o too mai a ia mei loto malie o ona fetaina, ti e ke taki loa a ia ki se kogafale lavaki.

³ E ke too loa le fagu lolo, o liligi a ia ki lona fa ulu, o ke pati loa : Ko leinei le folafola a le Eteleno : E kau pani lolo a koe ke ke sau ki Iselaele ! Ti e ke fakamavaa loa le matapa, ti ke sola loa, o leaise ke toe tuu.

⁴ Na ano loa le tupulaga, tagata fakasausau a le polofeta, ki Lamoti i Kalaate.

⁵ I lana kaku atu ki ai, ko leinei, na tonatona a pule o le solia. Na pati loa le polofeta : Pule, e kau fia masau kiate koe. Ti na tali loa a Seu : Kiate ai ia matou fuli nei ? Na tali loa le polofeta : kiate koe, pule.

⁶ Na malaga ake loa a Seu ki aluga, o ulu ki fale, ti na pani loa e le polofeta le lolo ki lona fa ulu, o pati : Ko leinei le folafola a le Eteleno, le Atua o Iselaele : E kau fakanofo a koe ko le sau o Iselaele, o le kakai a le Eteleno.

⁷ E ke tamate loa le fale o Akapo, lou pule, ti e kau totogi loa kia Sesapele le toto o aku tagata fakasausau, le kau polofeta, ti mo le toto o tagata fakasausau fuli a le Eteleno.

⁸ E mate loa le fale katoa o Akapo ; e kau tamate loa latou fuli ala e kau kia Akapo, leia e popula mo leia e lauateaia i Iselaele,

⁹ ti e kau fakaliliu loa le fale o Akapo o tatau mo le fale o Selopoamo, vosa o Nepate, ti mo le fale o Paesa, vosa o Akisa.

¹⁰ E kai loa e kuli a Sesapele i le faisaga o Siseleele, ti e leaise maua loa se tasi ke tanu ia a ia. Ti na fakamavaa loa e le polofeta le matapa, o sola.

¹¹ I le ulu ake loa a Seu ke ano ki tagata fakasausau a lona pule, na pati loa a ia kiate ia : Pe malie fai ? Kolea na au ai le vale lena kiate koe ? Na tali loa a Seu kia latou : E kotou iloa malie le tagata mo le nea leia e mafai ke pati a ia ki ai.

¹² Kae na lotou tali loa : E ke loi ! Ke ke tali mai kia matou ! Ti na pati loa a Seu : Na masau feneeki mai a ia, o pati : Ko leinei le folafola a le Eteleno : E kau fakanofo a koe ko le sau o Iselaele.

¹³ Ti na lotou tasi too loa lona kofu i le temi fai lena, o teki ki aluga o takakega ke tonatona ai a Seu ; ti na lotou pupusi loa le fakatagi pupusi, o pati : Kua sau a Seu !

¹⁴ Ti na fono loa a Seu, vosa o Sosafate, vosa o Nimesi, ke tamate Solame. I le temi lena, na saofaki e Solame mo Iselaele katoa le kolo ko Lamoti i Kalaate mei a Asaele, sau o Silia ;

¹⁵ Kae kua toe liliu loa le sau ko Solame o faitoo ona lavea i Siseleele, lavea ala i le tau mo Asaele, sau o Silia. Na pati loa a Seu : Kapau ko leinei lokoutou loto, ti e leaise toe sola loa se tasi mei le kolo, ke ano o fakasa le logo leinei ki Siseleele.

¹⁶ Ti na eke loa a Seu ki lana saliote, o ano ki Siseleele, talie na moe i ai Solame, ti na ifo ki ai Akasia, sau o Suta, o fakatele kiate ia.

¹⁷ Na tio loa le tagata leo mei le tule o Siseleele ki le au o le solia a Seu, ti na pati loa a ia : E kau tio ki se solia. Na pati loa Solame : Too se tagata ekeosi, ti kakau a ia ke ano o fakafetaulaki kia latou, o vesili pe ko le tokamalie leia e lotou au ai.

¹⁸ Na ano loa le tagata ki mua o Seu, o pati : Ko leinei le masau a le sau : Pe ko le tokamalie ? Ti na tali loa a Seu : Pe mauiga le tokamalie kiate koe ? Muli mai iate au. Na fakasa loa e le tagata leo le nea kua soko : Na ano le tagata afa logo o kaku kia latou, ti na leaise toe liliu mai a ia.

¹⁹ Na toe kakau loa e Solame se tasi ake tagata ekeosi, leia na kaku loa, o pati kia latou : Ko leinei le masau a le sau : Pe ko le tokamalie ? Na tali loa a Seu : Kolea le uiga o le tokamalie kiate koe ? Muli mai iate au.

²⁰ Ti na fakasa loa e le tagata leo le nea kua soko, o pati : Na ano a ia o kaku kia latou, ti e leaise toe liliu mai a ia. Ti e fai le taki o manu pe leia a Seu, vosa o Nimesi, talie e taki fakavale a ia.

²¹ Ti na pati loa Solame : Teuteui laku saliote ! Ti na teuteui loa lana saliote. Na tasi eke loa Solame, sau o Iselaele mo Akasia, sau o Suta, ki lana saliote, o ano ki mua o Seu, ti na lotou felavei loa i le faisaga o Napote mei Siseleele.

²² I le temi fai leia na tio ai loa Solame kia Seu, na pati loa a ia : Pe ko le tokamalie, Seu ? Na tali loa Seu : Le tokamalie fea ! Kae kua ke iloa malie koi soko atu fai e lou tinana ko Sesapele lana tausi ki taulaatua mo lana fai a nea fakatemonio !

²³ Ti na fakamaliu loa ki muli e Solame lana saliote, o sola, ti na pati loa a ia kia Akasia : Tokaga Akasia, ko le kaka !

²⁴ Kae na too loa e Seu lana gasau ti na kaloloi loa e ia Solame, o tau i lona tua : na ea loa le gasau i le mafu, ti na mate loa Solame i loto o lana saliote.

²⁵ Na pati loa a Seu ki lana tagata leo ko Pitekale : Too a ia, o ti ki le faisaga o Napote leia mei Siseleele ; talie ke ke manatui, i le temi leia na ta eke ai, a koe mo au, i osi i muli o Akapo, lona tamana, na fakasa loa e le Eteleno kiate ia le tautea leinei :

²⁶ Na pati loa le Eteleno : Na kau tio nanafi ki le toto o Napote mo le toto o ona vosa, ti e kau liufaki atu loa kiate koe le nea lena, i le faisaga fai leinei. Too a ia, o ti ki le faisaga, o mulimuli ki le folafola a le Eteleno.

²⁷ I le tio loa a Akasia, sau o Suta, ki le nea lena, na sola loa a ia i le ala o le fale o le oloto. Na tuli loa a ia e Seu, o pati : Mo ia foki, kotou taai a ia i le saliote ! Ti na taai loa Akasia i le paleaga o Kule, o ofi ki Sipeleami. Na mumuni loa a ia i Mekito, ti na mate ai loa a ia.

²⁸ Na ave loa a ia e ana tagata fakasausau i se saliote ki Selusalemi, ti na lotou tanu loa a ia i lona tanuma mo ona tamana, i le kolo o Tavite.

²⁹ Na sau loa Akasia i Suta i le kau agafulu tupu tasi fetuu o le sau o Solame, vosa o Akapo.

Tamate o Sesapele e Seu

³⁰ Na ulu loa a Seu ki Siseleele. I le logo loa a Sesapele ki le nea lena, na pena loa e ia ona mata mo teuteui loa e ia lona fa ulu, ti na tuu loa a ia o tio mei le katupa.

³¹ I le temi leia na ulu mai ai loa a Seu i le matapa, na pati loa Sesapele : Pe ko le tokatokamalie, Simeli foou, tagata leia na tukipooi ia lona pule ?

³² Na tagaki ake loa a Seu ki le katupa, o pati : Ko ai e kau mo au ? Ko ai ? Ti na faino loa ni enuke e toka lua pe toka tolu mei le katupa.

³³ Na pati loa a Seu : Kotou ti mai a ia ki lalo ! Na lotou ti loa Sesapele ki lalo, o topisi loa lona toto ki le paa mo osi. Ti na takafi loa a ia e Seu ;

³⁴ ti na ulu loa a ia, o kai mo inu, ti na pati loa a ia : Kotou ano o tio ki le fafine malaia lena, ti kotou tanu a ia, talie ko se taine a ia o se sau.

³⁵ Na lotou ano loa ke tanu a ia ; kae na lotou maua fai lona pati ulu, mo ona taga vae, ti mo ona alofilima.

³⁶ Na lotou liliu loa o fakasa kia Seu, ti na pati loa a Seu : Ko le nea lena na fakasa e le Eteleno i le gutu o lana tagata fakasausau ko Elia, le tagata Tisipe i lana pati : E kai loa e kuli le tino o Sesapele i le faisaga o Siseleele ;

³⁷ ti e fai loa le tino o Sesapele pe ni faikauga i aluga o faisaga, i le faisaga o Siseleele, ti e leaise toe mafai loa ke pati : Ko Sesapele.