Lua tosi o Sau 8 - Tosi Tapu

Oge i fetuu e fitu ; saofaki o le fafine Sunami

¹ Na pati loa Eliseo ki le fafine leia na fakamauli e ia lona tama : Tuu ki aluga, ti ke ano, a koe mo lou fale, ti ke nofo i se ganea leia e mafai ke ke nofo ai ; talie kua kakau mai e le Eteleno le oge ki le fenua o Iselaele i fetuu e fitu.

² Na tuu ake loa le fafine, ti na fai loa e ia o mulimuli ki le folafola a le tagata a le Atua : na ano loa a ia, a ia mo lona fale, o nofo i fetuu e fitu i le fenua o le kau Filisitini.

³ I le sili o fetuu e fitu, na toe liliu loa le fafine mei le fenua o le kau Filisitini, ti na ano loa a ia o tagi ki le sau ke toe tuku ake lona fale mo lona kele.

⁴ Na masau le sau mo Keasi, tagata fakasausau a le tagata a le Atua, ti na pati le sau : E kau kole atu kiate koe ke ke fakamatala mai a nea lalasi fuli ala na fai e Eliseo.

⁵ Ti na lolotoga fakamatala loa e Keasi ki le sau le fakamauli e Eliseo se tasi na mate, ko leinei, na tau ake le fafine leia na fakamauli lona toe e Eliseo, ke kole ki le sau ke tuku ake lona fale mo lona kele. Na pati loa Keasi : Ei sau, loku aliki, ko leinei le fafine, ti ko leinei mo lona tama leia na fakamauli e Eliseo.

⁶ Na fakavesilii loa e le sau le fafine, ti na fakamatala loa e le fafine kiate ia le nea na soko. Ti na tuku loa e le sau ki le fafine se enuke, o fakatotonu kiate ia : Ke toe fakaliliu ki le fafine leinei ana nea fuli, mo le tupu katoa o lana faisaga talu mei le aso leia na mavae ai a ia o kaku mai ki le aso nei.

Fakasa e Eliseo o le sau a Asaele i Silia

⁷ Na ano loa Eliseo ki Tamaso. Na masaki Pene-Atate, sau o Silia ; ti na fakasa loa kiate ia, o pati : Kua tau mai ki leinei le tagata a le Atua.

⁸ Na pati loa le sau kia Asaele : Too se nea alofa, o ano mo koe ki mua o le tagata a le Atua ; kole kiate ia le finegalo o le Eteleno, o pati : Pe kau mauli loa mei loku masaki ?

⁹ Na ano loa Asaele o fakafetaulaki kia Eliseo, mo se nea alofa i lona lima, leia na too mei nea malilie fuli i Tamaso, ko amoga a kamelo e kau fa. I lana kaku atu, na ano loa a ia ki mua o Eliseo, o pati : Kua kakau mai au e lou vosa ko Pene-Atate, sau o Silia, ke pati atu kiate koe : Pe kau mauli loa mei le masaki leinei ?

¹⁰ Na tali loa Eliseo kiate ia : Ano, o pati kiate ia : E ke mauli loa mei lou masaki ! Kae kua fakasa mai e le Eteleno kiate au, e mate loa a ia.

¹¹ Na tio fakamate loa le tagata a le Atua kia Asaele o fualoa ai, ti na tagi loa a ia.

¹² Na pati loa Asaele : Kolea e tagi ai loku aliki ? Ti na tali loa Eliseo : Talie e kau iloa le veli fuli leia e ke fai loa ki fanau o Iselaele ; e ke tutu loa olatou kolo tau, e ke tamate loa ki le seleta ona kau tagata tupulaga, e ke laliki loa alatou fanau liliki, ti e ke fakapaisi loa a manava o fafine tinanae.

¹³ Na pati loa Asaele : Kae ko ai lau tagata fakasausau, le kuli leinei ke fai ia ni nea lalasi fenaaki ? Na pati loa Eliseo : Kua fakasa mai e le Eteleno kiate au e ke soko loa ko le sau o Silia.

¹⁴ Na mavae loa Asaele meia Eliseo, o toe liliu ki lona pule, leia na pati loa kiate ia : Kolea le pati a Eliseo ? Ti na tali loa Asaele : Na pati mai a ia e ke mauli loa !

¹⁵ I leia ake aso, na too loa e Asaele se tupenu o fakasusu, ti na puloui loa e ia ki ai a mata o le sau leia na mate loa. Ti na sau loa Asaele, o fetogi Pene-Atate.

Solame, sau o Suta

¹⁶ I le lima o fetuu o le sau ko Solame, sau o Iselaele, vosa o Akapo, na sau loa i Suta a Solame, vosa o Sosafate.

¹⁷ Na sau a ia i lona fetuu kau tolu tupu lua, ti na sau loa a ia i fetuu e valu i Selusalemi.

¹⁸ Na saele loa a ia i le ala o sau o Iselaele, ofaipe le fale o Akapo, talie na avaga a ia mo se taine o Akapo, ti na fai loa e ia le nea leia e veli ki mata o le Eteleno.

¹⁹ Kae na leaise loto loa le Eteleno ke maumaui a Suta, o tupu ko Tavite, lana tagata fakasausau, o mulimuli ki le fakapapau leia na fai e ia kia Tavite ke soli tuumau kiate ia se fa malama i ona vosa.

²⁰ I le temi leia na sau ai Solame, na agatuu loa Etome ki le sau o Suta, o fakanofo e ia se sau kiate ia.

²¹ Na ano loa Solame ki Tesaile, mo ana saliote fuli ; na tuu ake loa a ia i le pouli, o tamate le kau Etome leia na takatakai ia a ia ti mo pule o saliote, ti na sosola loa le kakai ki ona falela.

²² Na fai le agatuu a Etome ki Suta o kaku mai ki le aso nei. Na toe agatuu foki Lipina i le temi totonu lena.

²³ Ko le toe o gaoi a Solame mo nea fuli ala na fai e ia, pe leaise tosi a ia i le tosi fakamatala ki sau o Suta.

²⁴ Na mate loa Solame ti na tanu loa a ia mo ona tamana i le kolo o Tavite. Ti na sau loa Akasia, lona vosa, o fetogi a ia.

Akasia, sau o Suta

²⁵ I le kau agafulu tupu lua fetuu o le sau o Solame, sau o Iselaele, vosa o Akapo, na sau loa Akasia, vosa o Solame, i Suta.

²⁶ Na sau loa Akasia i lona fetuu kau lua tupu lua, ti na sau loa a ia i le fetuu e tasi i Selusalemi. Na igoa lona tinana ko Atalia, taine o Omeli, sau o Iselaele.

²⁷ Na saele loa Akasia i le ala o le fale o Akapo, ti na fai loa e ia le nea leia e veli ki mata o le Eteleno ofaipe le fale o Akapo, talie na avaga a ia ki le fale o Akapo.

²⁸ Na ano loa a ia mo Solame, vosa o Akapo, o taui Asaele, sau o Silia, i Lamoti i Kalaate. Ti na lavea loa Solame i le kau Silia.

²⁹ Na toe liliu loa le sau ko Solame, o faitoo ona lavea i Siseleele, ona lavea ala i le tau mo Asaele, sau o Silia. Na ifo loa Akasia, vosa o Solame, sau o Suta, o fakatele kia Solame, vosa o Akapo, i Siseleele, talie na masaki a ia.