Lua tosi o Sau 7 - Tosi Tapu

Saofaki o Samalia

¹ Na pati loa Eliseo : Kotou fakalogo ki le folafola a le Eteleno ! I apogipogi, i le ola leinei, e maua loa ni kilo falina e kau agafulu tupu lua ki se fa piesi paaga e tasi ti mo ni kilo falina olese e kau lua tupu fa ki se fa piesi paaga e tasi, i le maketi o Samalia.

² Na tali loa le tagata solia leia na feanoaki tuumau mo le sau ki le tagata a le Atua : Kapau e fai loa e le Eteleno ni katupa i le lagi ke laku mai ai se fulumeto, tio lagi mafai ke soko loa le nea lena e ke pati ki ai ! Na tali loa Eliseo : E tio loa ou mata ki le nea lena, kae e leaise ke kai loa ki ai.

³ Na i ai ni tagata kilia e toka fa i le mua o le matapa o le kolo, ala na fepatiaki loa : Kolea e tou nonofo ai loa i leinei o kaku ki lotatou mamate ?

⁴ Kapau e tou manatu ke tou ulu ki le kolo, e nofo le oge i le kolo ti e tou mamate ai loa ; ti kapau e tou nonofo aifai i leinei, e tou toe mamate ai foki. Koia ke tou ano o ulu ki le nofolaga tau o le kau Silia ; kapau e lotou tuku tatou ke mauli, e tou mauuli loa, ti kapau e lotou tamate tatou, e tou mamate loa.

⁵ Na lotou ano loa i le afiafi ki le nofolaga tau o le kau Silia ; I le temi na lotou kaku ai loa ki le uluaga o le nofoaga o le kau Silia, ko leinei, na leaise se fa toka tasi i ai.

⁶ Na fakagugulu e le Aliki i le loto o le nofolaga tau o le kau Silia se logoa o ni kau saliote ti mo se logoa o ni kau osi, le logoa o se fa solia api ai, ti na femasauaki loa le kau Silia ia latou : Ko leinei, kua totogi e le sau o Iselaele a sau o le kau Eti mo sau o le kau Esipito ke au o taui tatou.

⁷ Ti na lotou tutuu ake loa ki aluga, o fesolaki i le afiafi pouli, kae na lotou titiaki loa olatou falela, mo alatou kau osi, mo alatou kau asino, mo le nofolaga tau, ti mo nea fuli, kae na lotou sosola loa ke saofaki ai olatou mauli.

⁸ I le kaku loa a le kau kilia ki le nofolaga tau, na lotou ulu loa ki se falela, o lotou kakai mo inu loa, ti na lotou ave loa se paaga, mo se aulo ti mo ni nea lava, ala na lotou ano loa o fufu. Na lotou toe liliu mai loa, o toe ulu ki se tasi ake falela, ti na lotou toe ave foki ni iki a nea o fufu.

⁹ Ti na lotou fepatiaki loa : E leaise malie le nea leia e tou fai ! Ko le aso leinei ko se aso o logo malilie ; kapau e tou fakaleemu o kaku ki le mafoa mai o le ao, e vilo loa le tautea kia tatou. Kotou au ke tou ano, o fakasa le logo leinei ki le fale o le sau.

¹⁰ Na lotou ano loa, o kalagai a tagata leo o le matapa o le kolo, ti na lotou fakamatala loa kia latou, o pati : Na motou ulu ki le nofolaga o le kau Silia, ti ko leinei, na leaise tasi fua i ai, na leaise logo fua i ai ki se leo o se tagata ; gato fai ki osi mo asino na sasai i ai, ti mo falela na titiaki felaaki i ai.

¹¹ Na kalaga loa a tagata leo o le kolo, o fakasoko le logo lena ki le fale o le sau.

Fakasoko o le fakapapau a Eliseo

¹² Na tuu ake loa le sau i le pouli, o pati ki ana tagata fakasausau : E kau loto ke fakasa atu kia koutou le nea leia e fai mai kia tatou e le kau Silia. Kua lotou iloa e tou pakupaku, koia kua lotou tuku felaaki ai le nofoaga solia kae lotou ano o mumuni i le vao, talie kua lotou pati : Ka lotou ulu mai loa ki fafo mei le kolo, e tou tapo mauli loa latou, ti e tou ulu loa ki le kolo.

¹³ Na pati loa se tasi i tagata fakasausau a le sau : Ke too ni osi e lima i osi ala koi toe i le kolo, - talie e lotou fai pe le toka api o Iselaele leia e toe i ai, e lotou fai pe le toka api o Iselaele leia kua vave mate, - ti ke tou kakau ke tio ki le nea kua soko.

¹⁴ Na too loa ni saliote e lua mo ni osi, ti na kakau loa e le sau ni tagata avelogo ke lotou mulii le anoaga o le solia a le kau Silia, o pati : Kotou ano o tioi.

¹⁵ Na lotou ano loa i muli o le kau Silia o kaku ki le Solotane ; ti na lotou tio loa kua apele le ala katoa i nea lava mo nea ala na titiaki e le kau Silia i lalatou sola fakatavili. Na toe liliu loa a tagata avelogo, o fakamatala a nea ana ki le sau.

¹⁶ Na ulu loa le kakai mei le kolo, o tae a koloa o le nofolaga tau o le kau Silia. Ti na maua loa le fua falina e tasi ki se fa sikele e tasi, ti mo fua falina olese e lua ki se fa sikele e tasi, o mulimuli ki le folafola a le Eteleno.

¹⁷ Na tuku loa e le sau le taupau o le matapa ki le ofisa leia na fanaki ki ai lona lima ; kae na takatakafi loa le ofisa lena i le matapa e le kakai, ti na mate ai loa a ia, o mulimuli ki le folafola leia na fakasa e le tagata a le Atua i le aso leia na ifo ake ai le sau kiate ia.

¹⁸ Talie na pati loa le tagata a le Atua ki le sau : E maua loa ni fua falina olese e lua ki se fa sikele e tasi, ti mo se fua falina malie e tasi ki le fa sikele e tasi, i apogipogi, i le ola leinei, i le matapa o Samalia.

¹⁹ Ti na tali loa le ofisa ki le tagata a le Atua : Pe fai foki e le Eteleno ni katupa i le lagi ke laku mai ai ni fulumeto, pe soko loa se nea felaaki ? Ti na pati loa Eliseo : E ke tio mata loa ki ai, kae e leaise ke kai loa ki ai.

²⁰ Ti na soko totonu loa le nea lena kiate ia : Na takatakafi loa a ia i le matapa e le kakai.