Lua tosi o Sau 3 - Tosi Tapu

Solame, sau o Iselaele

¹ Na sau loa Solame, vosa o Akapo, ki Iselaele i Samalia, i le fetuu kau agafulu tupu valu o le sau ko Sosafate, sau o Suta. Na sau loa a ia i fetuu e kau agafulu tupu lua.

² Na fai loa e ia le nea leia e veli ki mata o le Eteleno, kae na leaise tatau loa pe le nea leia na fai e lona tamana mo lona tinana. Na maumaui loa e ia a fakatata o Paale ala na fai e lona tamana ;

³ kae na logo ai na pipiki a ia ki agasala a Selopoamo, vosa o Nepate, leia na fakaagasalai ia Iselaele, ti na leaise tafoki a ia mei ai.

Agatuu a Moape

⁴ Na maua e Mesa, sau o Moape, ni kau manu, ti na tuku e ia ki le sau o Iselaele se tukusau ko akeno e kau lelau afe mo ovi tagata e kau lelau afe ti mo olatou fului ovi.

⁵ I le mate o Akapo, na agatuu loa le sau o Moape ki le sau o Iselaele.

⁶ Koia na ulu ake loa le sau ko Solame mei Samalia, o lau Iselaele katoa.

⁷ Na saele loa a ia, ti na kakau loa e ia ke pati kia Sosafate, sau o Suta : Kua agatuu le sau o Moape kiate au ; pe ke loto ke ke au mo au o taui Moape ? Na tali loa Sosafate : E kau ano loa, a au ofaipe koe, loku kakai ofaipe lou kakai, laku kau osi ofaipe lau kau osi.

⁸ Ti na pati loa a Sosafate : Ko le ala fea e tou pale ai loa ? Na pati loa a Solame : I le ala o le toafa o Etome.

Fakanoai o Solame e Eliseo

⁹ Na ano loa le sau o Iselaele, mo le sau o Suta, ti mo le sau o Etome ; I le oki o lalatou saele i aso e fitu, na leaise koi maua loa se vai ki le solia mo manu.

¹⁰ Na pati loa le sau o Iselaele : Oi ! na fakatasii e le Eteleno a sau anei e toka tolu, o tupu ke tuku e ia latou ki lima o Moape.

¹¹ Kae na pati loa Sosafate : Pe e leaise maua i leinei se polofeta a le Eteleno, leia e feala ai ke tou iloa le finegalo o le Eteleno ? Na tali loa se tasi o tagata fakasausau a le sau o Iselaele : E nofo i leinei Eliseo, vosa o Safate, leia na liligi ia le vai ki lima o Elia.

¹² Ti na pati loa Sosafate : E nofo le folafola a le Eteleno mo ia. Na ifo loa kiate ia le sau o Iselaele ko Sosafate mo le sau o Etome.

¹³ Ti na pati loa Eliseo ki le sau o Iselaele : Kolea kua ke au ai kiate au ? Ano ki le kau polofeta o lou tamana mo le kau polofeta o lou tinana. Ti na pati loa le sau o Iselaele kiate ia : Leai ! talie kua fakatasii e le Eteleno a sau anei e toka tolu, o tupu ke soli e ia latou ki lima o Moape.

¹⁴ Na pati loa Eliseo : E mauli le Eteleno o kau tau, leia e kau fakasausau ki ai ! Kanapau na leaise kau tokaga kia Sosafate, sau o Suta, e leaise kau tokaga fua kiate koe ti e leaise kau tio atu foki kiate koe.

¹⁵ I le lakaga nei, aumai kiate au se tagata fai musika alepe. I le ta loa o le alepe e le tagata, na ifo loa le lima o le Eteleno kia Eliseo.

Lava o Moape

¹⁶ Ti na pati loa Eliseo : Ko leinei le folafola a le Eteleno : Ke kotou kenu i le vaivailiua leinei ni popoko ! ni popoko !

¹⁷ Talie ko leinei le folafola a le Eteleno : E leaise kotou tio loa ki se matagi ti e leaise kotou tio loa ki se ua, kae apele loa le vaivailiua leinei i le vai, ti e kotou inu loa, a koutou, mo akoutou kau manu liliki, ti mo akoutou kau manu lalasi.

¹⁸ Kae ko se nea noa lena ki mata o le Eteleno. E tuku atu loa e ia Moape ki okoutou lima ;

¹⁹ e kotou maumaui loa a kolo tau fuli mo fulumalilie, e kotou tutuuti loa a laakau malilie fuli, e kotou tapotapono loa a matapuna vai fuli, ti e kotou tanu loa ki ni fatu a faisaga malilie fuli.

²⁰ Ti na soko loa i le usu, i le temi leia na momoli ai le sakilifisio, ko leinei, na tafe mai loa le vai mei le ala o Etome, ti na apele loa le fenua i le vai.

²¹ Kae i le logo loa a le kau Moape fuli kua pale ake a sau e toka tolu ke taui latou, na lotou tanaki loa latou fuli ala na mafai ke too masafu, ti na lotou nonofo loa i le koiga.

²² Na lotou ala ake loa i le pogipogi usu, ti ko leinei, i le temi leia na mu ai loa le laa ki aluga o le vai, na tio loa le kau Moape ki le vai i olatou mua kua kula ofaipe se toto.

²³ Na lotou pati loa : ko se toto a ia ! Kua fetauaki a sau ia lotou, kua lotou fetamateaki ia latou ; i le lakaga nei, tagata o Moape, ki le tae o koloa !

²⁴ Na lotou saele loa ki le nofoaga o Iselaele. Kae na tuu ake loa Iselaele ki aluga, o tamate Moape, leia na sola loa i olatou mua. Na lotou ulu loa ki le fenua, ti na lotou tamate loa Moape.

²⁵ Na lotou maumaui loa a kolo, na lotou laku loa ni fatu o tanumia ai a faisaga malilie fuli, na lotou tanu loa a matapuna vai fuli, ti na lotou sele loa a laakau malilie fuli ; ti na takatakai loa e le kau fai makamaka le kolo ko Kile-Aleseti, o taui, kae na lotou tuku loa ona fatu.

²⁶ I le tio loa a le sau o Moape kua gaegae a ia i le tau, na too loa e ia ni kau tagata tau seleta e tino lelau fitu, o faiga ke kaku ki le sau o Etome, kae na leaise mafai.

²⁷ Koia na too ai loa e ia lona vosa uluaki, leia na tonu ke sau o fetogi a ia, ti na momoli loa e ia a ia i se failaulau i aluga o le paa o le kolo. Ti na i lasi loa Iselaele, leia na fakamamao loa mei le sau o Moape, o toe liliu ki lona fenua.