Lua tosi o Sau 25 - Tosi Tapu

¹ I le fetuu iva o le sau o Setesiasi, i le aso kau agafulu o le kau agafulu o masina, na au loa Nepukatenesale, sau o Papilone, mo lana solia katoa, o taui Selusalemi ; na fakatuu loa e Nepukatenesale lona nofolaga tau i mua o Selusalemi, ti na kenu loa e ia ni popoko i le takatakai katoa o Selusalemi.

² Na takatakai loa le kolo e le tau o kaku ki le fetuu kau agafulu tupu tasi o le sau o Setesiasi.

³ I le iva o aso o le masina, na makeke ai le oge i le kolo, na leaise koi maua se pane ki le kakai o le kolo.

⁴ Ti na fai loa se pu i le paa o le kolo ; ti na sosola loa a tagata tau fuli o Suta i le pouli, i le ala o le matapa i vasa o paa ala e ofi ki le oloto o le sau, kae na lolotoga takatakai e le kau Kaletea le kolo. Na too loa e le kau tagata ala na sosola le ala o le toafa.

⁵ Kae na tuli loa e le solia a le kau Kaletea le sau, o maua a ia ki le toafa o Seliko, ti na mavete loa lana solia katoa o mamao meiate ia.

⁶ Na too loa e le kau Kaletea le sau, o ave ki le sau o Papilone i Lipela ; ti na fakamaaui loa a ia.

⁷ Na tamate loa a vosa o Setesiasi i ona mua ; ti na kape loa a mata o Setesiasi, ti na fui loa a ia ki ni tini kapa, o ave ki Papilone.

Maumaui o Selusalemi mo le fale tapu ; Ave popula fakamuli ki Papilone

⁸ I le fitu o aso o le lima o masina, i le fetuu kau agafulu tupu iva o le sau o Nepukatenesale, sau o Papilone, na ulu loa ki Selusalemi a Nepusalatane, pule o le kau leo, tagata fakasausau a le sau o Papilone.

⁹ Na tutu loa e ia le fale o le Eteleno, mo le fale o le sau, ti mo fale fuli o Selusalemi ; na tutu loa e ia ki le afi a fale fuli ala na mauiga.

¹⁰ Na maumaui loa e le solia katoa a le kau Kaletea, leia na ano mo le pule o le kau leo, a paa takatakai o Selusalemi.

¹¹ Na ave popula loa e Nepusalatane, pule o le solia, latou ala o le kakai na nonofo i le kolo, mo latou ala na ano ki mua o le sau o Papilone, ti mo le toega o le kakai toka api.

¹² Kae na tuku loa e le pule o le solia ni iki o le kau mativa o le fenua ke tausi ki vite mo gaoi ki faisaga.

¹³ Na maumaui loa e le kau Kaletea a pou sila ala na tuu i le fale o le Eteleno, mo tuuaga, mo le tai sila leia na tuu i le fale o le Eteleno, ti na lotou ave loa le sila ki Papilone.

¹⁴ Na lotou too loa a nea tanaki mugalafu, mo supeti, mo sele, mo ipu liliki, mo nea gaoi sila fuli ala na fai ki ai le gaoi.

¹⁵ Na toe too foki e le pule o le solia a nea tanaki malala mo ipu, mo nea aulo mo nea siliva.

¹⁶ Ko fa pou e lua, mo le tanoa, ti mo ona tuuaga, ala na fai e Salomone ki le fale o le Eteleno : ko le sila o nea fuli ana na leaise iloa lona mamafa.

¹⁷ Ko le loa o le fa pou ko meta e iva, ti na teki i ona aluga se puloga sila leia na meta tasi vaelua lona taualuga ; na takatakai a puloga o pou e se ukamea na lalaga mo ni kelenati, ti na fai a nea fuli ana ki le sila ; na toe fenaaki mo le lua o fa pou.

¹⁸ Na too loa e le pule o le solia a Selasa, le tagata faisakilifisio lasi, mo Sofoni, le lua o tagata faisakilifisio, ti mo ni tagata leo matapa e toka tolu.

¹⁹ Ti na too loa e ia i le kolo se enuke leia na pule tau, mo ni tagata e toka lima ala na kau ki le kau fono a le sau ti na maua i le kolo, mo le sekalaipe o le pule o le solia leia na tokaga ki le tae o le kau solia, ti mo ni tagata o le kakai o le fenua e tino ono ala na nonofo i le kolo.

²⁰ Na too loa latou e Nepusalatane, pule o le solia, o ave ki le sau o Papilone i Lipela.

²¹ Na tamate loa latou e le sau o Papilone i Lipela, i le fenua o Amate.

Ketalia, kovana o Suta

²² Na ave popula loa i ai a Suta o mamao mei lona fenua. Ti na fakanofo loa e Nepukatenesale, sau o Papilone, ke pule ki le kakai leia na tuku loa e ia ke nofo i le fenua o Suta, a Ketalia, vosa o Asikame, vosa o Safani.

²³ I le logo loa a pule solia fuli o Suta, latou mo alatou kau solia, kua fakanofo e le sau o Papilone a Ketalia ko le kovana, na lotou ano loa kia Ketalia i Misipa, ko Isemaele, vosa o Netania, mo Sokanane, vosa o Kalease, mo Selasa, vosa o Tanumete, mei Netofa, ti mo Saasania, vosa o le tagata Maaka, latou mo alatou kau tagata.

²⁴ Na fakapapau loa Ketalia kia latou mo alatou kau tagata : Aua na kotou tuania ia se nea mei tagata fakasausau a le kau Kaletea ; kotou nonofo i le fenua, kotou tausi ki le sau o Papilone, ti e kotou maua loa ona malilie.

²⁵ Kae i le fitu o masina, na au loa Isemaele, vosa o Netania, vosa o Elisama, mei le famili sau, mo ni tagata e tino agafulu, ti na lotou taai loa Ketalia, o mate ai, mo le kau Sutea, ti mo le kau Kaletea leia na nonofo mo ia i Misipa.

²⁶ Koia na tutuu ake ai loa ki aluga le kakai katoa, mei leia e ikiiki oki o kaku ki leia e lasi, mo pule o le solia, ti na lotou ano loa ki Esipito, talie na lotou i ki le kau Kaletea.

Mavae o Sosakini i le pilisoni

²⁷ I le fetuu kau tolu tupu fitu o le popula o Sosakini, sau o Suta, i le aso kau lua tupu fitu o le kau agafulu tupu lua o masina, na toe lagai loa e Evile-Melotake, sau o Papilone, i le uluaki fetuu o lana sau, le fa ulu o Sosakini, sau o Suta, o fakamavae a ia mei le pilisoni.

²⁸ Na masau loa a ia kiate ia i le agamalie, ti na siki loa e ia lona ekeekeaga fakasau ki aluga o le ekeekeaga o sau ala na nonofo mo ia i Papilone.

²⁹ Na fetogi loa e ia ona kofu fakapopula, ti na kai tuumau loa Sosakini i le laupapa o le sau o Papilone i lona mauli katoa.

³⁰ Na tokaga tuumau loa le sau ki nea ala na aoga kiate ia i aso taki tasi o lona mauli katoa.