Lua tosi o Sau 23 - Tosi Tapu

Lau o le tosi o le lao ki le kakai

¹ Na fakatasii loa e le sau ko Sosiasi le kau matua fuli o Suta mo Selusalemi.

² Ti na pale loa a ia ki le fale o le Eteleno mo tagata fuli o Suta, mo le kakai katoa o Selusalemi, mo le kau tagata faisakilifisio, mo le kau polofeta, ti mo le kakai katoa, mei leia e ikiiki oki o kaku ki leia e lasi. Na lau loa e le sau i olatou mua a folafola fuli o le tosi o le sai, leia na maua i le fale o le Eteleno.

Na fai e Sosiasi se sai mo le Eteleno

³ Na tuu le sau i le ganea taualuga, ti na fai loa e ia se sai i mua o le Eteleno, ke mulimuli i le Eteleno, ke tausi ki ana fakatotonu mo ana pelesepeto mo ana lao i lona loto katoa mo lona laumalie katoa, ke fai a folafola fuli o le sai lena, ala kua tosi i le tosi lena. Ti na fakamaoki loa le kakai katoa ki le sai.

⁴ Ti na fakatotonu loa e le sau kia Ilekisa, le tagata faisakilifisio lasi, mo la ake kau tagata faisakilifisio, ti mo le kau leo matapa, ke lotou laku ki fafo mei le fale o le Eteleno a nea gaoi fuli ala na fai kia Paale, mo Asetalate ti mo le kau tau katoa o le lagi ; ti na tutu loa e ia latou i le tua kolo o Selusalemi, i faisaga o Setolone, ti na kakau loa e ia ke ave lona mugalafu ki Petele.

⁵ Na kapu loa e ia a kau pelepitelo o taulaatua, ala na fakanofo e sau o Suta ke tutu ia a nea fakamanogi i ganea taualuga o kolo o Suta ti mo tafatafa o Selusalemi, ti mo latou ala na momoli ia ni nea fakamanogi kia Paale, mo le laa, mo le masina, mo fetuu, ti mo le kau tau katoa o le lagi.

⁶ Na too loa e ia mei le fale o le Eteleno le fakatata o Asetalate, leia na ave loa e ia ki le tua kolo o Selusalemi ki le liua o Setolone ; na tutu loa e ia a ia i le liua o Setolone o okioki, ti na laku loa e ia le mugalafu ki tanuma o fanau o le kakai.

⁷ Na soloi loa e ia a fale o le kau faiaga ala na tuu i le fale o le Eteleno, ala na tui ai e fafine ni falela kia Asetalate.

⁸ Na fakamaopo mai loa e ia a kau pelepitelo fuli o kolo o Suta ; ti na fakakelekele loa e ia a ganea taualuga ala na tutu ai e le kau pelepitelo a nea fakamanogi, mei Kepa o kaku ki Peele-Sepa ; ti na maumaui loa e ia a ganea taualuga o matapa, leia na tuu i le uluaga o le matapa o Sosue, le pule o le kolo, ti mo leia na tuu i le fetuu sema o le matapa o le kolo.

⁹ Kae na leaise pale ake le kau pelepitelo o ganea taualuga ki le aletale o le Eteleno i Selusalemi, kae na lotou kai ni pane sala fakatupu i loto malie o olatou fetaina.

¹⁰ Na fakakelekele loa e le sau a Tofete i le vaivailiua o vosa o Inome, o tupu ke aua na toe momoli e se tasi lona vosa pe ko lona taine i le afi kia Moloke.

¹¹ Na fakapuli loa e ia i le uluaga o le fale o le Eteleno a osi ala na fakatapui e le sau o Suta ki le laa, o ofi ki le kogafale o le enuke ko Netane-Meleke, leia na nofo i le fale e pipiki ki le fale tapu ; ti na tutu loa e ia a saliote o le laa.

¹² Ti na maumaui loa e le sau a aletale ala na tuu i aluga o ato o le kogafale aluga o Akase, ala na fai e sau o Suta, ti mo aletale ala na fai e Manase i malae e lua o le fale o le Eteleno ; i le oki o lana maumaui mo sau mei ai, na laku loa e ia le efu ki le liua o Setolone.

¹³ Ti na fakakelekele loa e le sau a ganea taualuga ala na tuu i mua o Selusalemi, i le fetuu atamai o le mauga o le malaia, ala na fakatuu e le sau ko Salomone kia Asetalate, le fakatata fakalialia o le kau Sitone, mo Kemosi, le fakatata fakalialia o le kau Moape, ti mo Milekome, le atua fakalialia o vosa o Amone.

¹⁴ Ti na fatifatii loa e ia a fakatata ti na maumaui loa e ia mo taulaatua, ti na fakaapele loa e ia ki ivii tagata a tuuaga o fakatata ana.

¹⁵ Ti na maumaui loa e ia le aletale leia na tuu i Petele, ti mo le ganea taualuga leia na fakatuu e Selopoamo, vosa o Nepate, leia na fakaagasalai ia Iselaele ; ti na tutu loa e ia le ganea taualuga o okioki, ti na tutu loa e ia le fakatata.

¹⁶ I le maliu loa a Sosiasi o tio ki tanuma ala na tuu i le mauga, na kakau loa e ia ke tae mai a ivi mei tanuma, ti na tutu loa e ia latou i aluga o le aletale ke fakakelekele ai latou, o mulimuli ki le folafola leia na fakasa e le Eteleno i le gutu o le tagata a le Atua, leia na fakasa fakatomua ia a nea ana.

¹⁷ Na pati loa le sau : Kolea le fakamanatu leinei e kau tio ki ai ? Na tali loa le kakai o le kolo kiate ia : Ko le tanuma a ia o le tagata a le Atua leia na au mei Suta ti na kalaga ki le aletale o Petele, leia na fakasa ia a nea anei e ke lolotoga fakasoko.

¹⁸ Ti na pati loa le sau : Kotou tuku a ia, aua na fafa se tasi ki ona ivi ! Na leaise laga loa ona ivi mo ivi o le polofeta leia na au mei Samalia.

¹⁹ Ti na toe maumaui loa e Sosiasi a fale fuli o ganea taualuga, ala na tuu i kolo o Samalia, ala na fakatuu e sau o Iselaele ke tupu ai le ita o le Eteleno ; na fai loa e ia i Samalia a nea fuli ala na fai e ia i Petele.

²⁰ Na tutu loa e ia i aluga o aletale a kau pelepitelo fuli o ganea taualuga, ala na nonofo i ai, ti na tutu loa e ia a ivii tagata i ai. Ti na toe liliu loa Sosiasi ki Selusalemi.

Toe fakatuutuu o le Pasikate

²¹ Na tuku loa e le sau le fakatotonu leinei ki le kakai katoa : Kotou fai le Pasikate ki le Eteleno, lokoutou Atua, o mulimuli ki le nea leia e tuu i le tosi o le sai.

²² Na leaise fai se Pasikate na toe tatau mo le Pasikate lena, mei le temi leia na fai fakamaau ai le kau tui fakamaau i Iselaele, ti mo le temi katoa o sau o Iselaele mo sau o Suta.

²³ Na fai loa le Pasikate lena ki le Eteleno i le fetuu kau agafulu tupu valu o le sau o Sosiasi.

²⁴ Ti na fakapuli foki e Sosiasi latou fuli ala na masau ki laumalie veli, mo latou ala na fai kikite, mo fakatata, mo taulaatua, ti mo nea fakalialia fuli ala na maua i le fenua o Suta mo Selusalemi, o tupu ke fakasoko ai a folafola o le lao, ala na tuu i le tosi leia na maua e le tagata faisakilifisio ko Ilekisa, i le fale o le Eteleno.

²⁵ I mua o Sosiasi, na leai se sau ofaipe ia, leia na toe liliu ki le Eteleno i lona loto katoa, mo lona laumalie katoa, ti mo lona makeke katoa, o mulimuli ki le lao katoa a Moisese ; i muli o Sosiasi, na leaise toe sa loa se tasi ke tatau mo ia.

²⁶ Kae na logo ai le nea lena, na leaise tafoki loa le Eteleno mei le kaka o lona sausau lasi ki Suta, o tupu ko nea fuli ala na fai e Manase ke tupu ai lona ita.

²⁷ Ti na pati loa le Eteleno : E kau toe sau foki mo Suta mei oku mua ofaipe laku sau Iselaele, ti e kau tiaki loa le kolo leinei ko Selusalemi leia na kau filifili, ti mo le fale leia na kau pati ki ai : E kau agai loa i ai.

²⁸ Ko le toe o gaoi a Sosiasi, a nea fuli ala na fai e ia, pe leaise tosi a ia i le tosi fakamatala ki sau o Suta ?

Mate o Sosiasi

²⁹ I le temi o Sosiasi, na pale ake loa Falaone Neko, sau o Esipito, o taui le sau o Asilia, i le vaitafe o le Eufalate. Na ano loa le sau ko Sosiasi ke taui a ia ; ti na tamate loa a ia e Falaone i Mekito, i lana tio kiate ia.

³⁰ Na ave loa a ia e ana tagata fakasausau i se saliote mei Mekito ki Selusalemi, ti na lotou tanu loa a ia i lona tanuma. Ti na too loa e le kakai o le fenua a Soakase, vosa o Sosiasi, o fakanofo ke sau, o fetogi lona tamana.

Soakase, sau o Suta

³¹ Na sau loa Soakase i lona fetuu kau lua tupu tolu, ti na sau a ia i masina e tolu i Selusalemi. Na igoa lona tinana ko Amutale, taine o Selemia, mei Lipena.

³² Na fai loa e Soakase le nea leia e veli ki mata o le Eteleno, o mulimuli katoa ki nea veveli ala na fai o ona tamana.

³³ Na fui loa a ia e Falaone Neko ki ni tini i Lipela, i le fenua o Amate, ke aua na toe sau i Selusalemi ; ti na tuku loa e ia ki le fenua se tukusau ko fa tenalio paaga e kau lelau mo se fa tenalio aulo e tasi.

³⁴ Ti na fakanofo loa e Falaone Neko a Eliakimi, vosa o Sosiasi, ke sau o fetogi a Sosiasi, lona tamana, ti na fetogi loa e ia lona igoa ki leia o Sosakimi. Na too loa e ia Soakase, leia na ano loa ki Esipito, o mate i ai.

³⁵ Na soli loa e Sosakimi kia Falaone le paaga mo le aulo ; kae na fakamaua loa e ia se tukusau ki le fenua o tupu ke maua ai le paaga lena e loto ki ai Falaone ; na fakatuutuu loa e ia le tukusau o le tagata taki toka tasi, ti na fakamaua loa e ia ki le kakai le paaga mo le aulo leia e tonu ke ave e ia kia Falaone Neko.

Sosakimi, sau o Suta

³⁶ Na sau loa Sosakimi i lona fetuu kau lua tupu lima, ti na sau a ia i fetuu e kau agafulu tupu tasi i Selusalemi, na igoa lona tinana ko Seputa, taine o Petasa, mei Luma.

³⁷ Na fai loa e Sosakimi le nea leia e veli ki mata o le Eteleno, o mulimuli katoa ki nea veveli ala na fai e ona tamana.