Lua tosi o Sau 20 - Tosi Tapu

Masaki o Esekiasi mo lona fakamauli

¹ I le temi lena, na masaki loa Esekiasi o teiteiki ke mate. Na au loa le polofeta ko Esaia, vosa o Amote, ki ona tafa, o pati kiate ia : Ko leinei le folafola a le Eteleno : Ke tuku au fakatotonu ki lou fale talie ka ke mate loa, e leaise ke toe mauli loa mei lou masaki.

² Na maliu loa Esekiasi o agaaga ona mata ki le paa, o fai le kole leinei ki le Eteleno :

³ Ei Eteleno ! Ke ke manatui na kau saele i ou mua i le maokioki mo le agatonu, ti na kau fai le nea leia e malie ki ou mata ! Ti na tagi mamae loa Esekiasi.

⁴ Kae na leikiaise kaku loa Esaia, leia kua ulu ki fafo, ki loto malie o le malae, na au loa le folafola a le Eteleno kiate ia, o pati :

⁵ Toe liliu o pati kia Esekiasi, pule o loku kakai : Ko leinei le folafola a le Eteleno, le Atua o Tavite, lou tamana : Kua kau logo ki lau faikole, ti kua kau tio ki ou loimata. E kau soli loa kiate koe le malolo ; i le tolu o aso, e ke pale loa ki le fale o le Eteleno.

⁶ E kau toe fakatologa loa lou mauli i fetuu e kau agafulu tupu lima. E kau saofaki loa a koe, a koe mo le kolo leinei, mei le lima o le sau o Asilia ; e kau malui loa le kolo leinei o tupu ko au, ti tupu ko Tavite, laku tagata fakasausau.

⁷ Na pati loa Esaia : kotou too se paapaa fiki. Na too loa a ia, o teki ki le papala. Ti na mauli loa Esekiasi.

⁸ Na pati loa Esekiasi kia Esaia : Pe kau iloa loa i le fakamailoga fea e fakamauli loa au e le Eteleno ti e kau pale loa i le tolu o aso ki le fale o le Eteleno ?

⁹ Ti na pati loa Esaia : Ko leinei, mei le Eteleno, le fakamailoga leia e ke iloa ai loa e fakasoko loa e le Eteleno le folafola leia na fakasa e ia kiate koe : Pe ke loto ke ano ki mua le malu i ni fa takakega e kau agafulu pe ke solomuli a ia i ni fa takakega e kau agafulu ?

¹⁰ Na tali loa Esekiasi : Ko le nea noa ke ano le malu ki mua i ni fa takakega e kau agafulu.

¹¹ Koia na kole ai loa e Esaia, le polofeta, ki le Eteleno, leia na fakasolomuli ia loa le malu i fa takakega e kau agafulu, i le kakega o Akase.

Kaku o ni fakafofoga mei Papilone

¹² I le temi lena, na ave loa e Pelotake-Palatane, vosa o Palatane, sau o Papilone se tosi mo se nea alofa kia Esekiasi, talie na logo a ia ki le masaki o Esekiasi.

¹³ Na fakatalitali loa latou e Esekiasi, ti na fakasasa loa e ia le ganea leia na tuku ai ona koloa mauiga, le paaga mo le aulo, mo nea fakamanogi, mo le lolo mauiga, mo lona fale tanaki masafu, mo nea fuli ala na tuku fakatasi mo ona koloa : na leaise nea fua i lona fale, mo lona puleaga katoa na leaise fakasa e Esekiasi kia latou.

¹⁴ Na au loa Esaia, le polofeta, ki le sau ko Esekiasi, o pati kiate ia : Kolea le pati a kakai ana, ti na lotou au meifea ? Na tali loa a Esekiasi : Na lotou au mei se fenua mamao, mei Papilone.

¹⁵ Ti na toe pati loa Esaia : Kolea le nea leia na lotou tio ki ai i lou fale ? Na tali loa Esekiasi : Na lotou tio ki nea fuli o loku fale : na leaise nea fua i oku koloa na leaise kau fakasa kia latou.

¹⁶ Na pati loa Esaia kia Esekiasi : Fakalogo mai ki le folafola a le Eteleno !

¹⁷ Ko leinei, e soko mai loa le temi leia e ave ai loa ki Papilone a nea fuli ala e tuku i lou fale, ti mo nea ala na tanaki e ou tamana o kaku mai ki le aso nei ; e folafola le Eteleno : E leaise toe loa se nea fua e tasi.

¹⁸ Ti e too loa ou vosa, ala na tupu meiate koe, ala na fanaui kiate koe, o fakaliliu latou ko ni enuke i le fale sau o le sau o Papilone.

¹⁹ Na tali loa Esekiasi kia Esaia : E malie le folafola a le Eteleno, leia na ke fakasa. Ti na toe pati loa a ia : Pe leaise maua loa le tokamalie mo le malolo i le lolotoga o loku mauli ?

Mate o Esekiasi

²⁰ Ko le toe o gaoi a Esekiasi, ana gaoi lalasi fuli, mo lana fai le fa tane vai mo le takiaga vai ki le kolo, pe leaise tosi a ia i le tosi fakamatala ki sau o Suta ?

²¹ Na mate loa Esekiasi, ti na sau loa Manase, lona vosa, o fetogi a ia.