Lua tosi o Sau 2 - Tosi Tapu

Too o Elia e le Atua i se saliote afi

¹ I le temi leia na too ake ai loa Elia ke ave ki lagi e le Eteleno i se asesio, na ano Elia mei Kilikale mo Eliseo.

² Na pati loa Elia kia Eliseo : E kau kole atu kiate koe, ke ke nofo i leinei, talie kua kakau au e le Eteleno ki Petele. Ti na tali loa Eliseo : E mauli le Eteleno ti e mauli lou laumalie ! e leaise kau mavae loa iate koe ! Ti na la ifo loa ki Petele.

³ Na au loa kia Eliseo a vosa o le kau polofeta ala na nonofo i Petele, o pati kiate ia : Pe ke iloa e ave loa e le Eteleno lou pule mei lou fa ulu i le aso nei ? Ti na tali loa Eliseo : E kau iloa a ia ; kotou fakalologo.

⁴ Na pati loa Elia kiate ia : Eliseo, nofo i leinei talie kua kakau au e le Eteleno ki Seliko. Na tali loa Eliseo : E mauli le Eteleno ti e mauli lou laumalie ! e leaise kau mavae loa iate koe. Ti na la kaku loa ki Seliko.

⁵ Na fakafeofi ake loa kia Eliseo a vosa o le kau polofeta ala na nonofo i Seliko, o pati kiate ia : Pe ke iloa e ave loa e le Eteleno lou pule mei lou fa ulu i le aso nei ? Ti na pati loa Eliseo : E kau iloa foki a ia ; kotou fakalologo.

⁶ Na pati loa Elia kia Eliseo : E kau kole atu kiate koe, ke ke nofo i leinei, talie kua kakau au e le Eteleno ki le Solotane. Na tali loa Eliseo : E mauli le Eteleno ti e mauli lou laumalie ! e leaise kau mavae loa iate koe. Ti na la soko atu lola fanoga.

⁷ Na kakau ake loa se kau tagata e tino lima i vosa o le kau polofeta, ti na lotou tutuu loa mei mamao o tio kia laua, kae na tutuu loa Elia mo Eliseo i le laugutu o le Solotane.

⁸ Ti na too loa e Elia lona taupulupulu o takatakai mo taai ki ai le vai o le Solotane, leia na mavaelua loa, ti na la fakalaka loa i le takele malo.

⁹ I le oki o lala fakalaka, na pati loa Elia kia Eliseo : Kole mai le nea leia e ke loto ke kau fai kiate koe, i mua o loku ave meiate koe. Na pati loa Eliseo : E kau kole kiate koe ke ifo kiate au se potu o lou laumalie fakakikite o liuga lua !

¹⁰ Na pati loa Elia : E ke kole se nea faigataa. Kae kapau e ke tio loa kiate au i le temi leia e ave ai au meiate koe, ti e soko loa le nea lena kiate koe ; ti kapau e leaise ke tio loa ki loku ave, ti e leaise soko loa le nea lena.

¹¹ Na la soko atu lala saele, o masasau, ti na fokifa loa kua vaei laua e se saliote afi mo ni osi afi, ti na pale ake loa Elia ki lagi i se asesio.

Gaoi a Eliseo ; ana uluaki milakulo

¹² Na tio Eliseo mo tagi : Loku tamana ! loku tamana ! Saliote o Iselaele mo lana kau tagata ekeosi ! Ti na leaise toe tio loa a ia kia Elia. Na too loa e ia ona teu o sae lua,

¹³ ti na too loa e ia le taupulupulu leia na fakavilo e Elia. Ti na toe liliu loa a ia, ti na tuu loa a ia i le laugutu o le Solotane ;

¹⁴ na too loa e ia le taupulupulu leia na fakavilo e Elia, ti na taai loa e ia ki ai le vai, o pati : Kofea le Eteleno, le Atua o Elia ? Ti na toe taai foki e ia le vai o le vaitafe, ti na mavaelua loa le vai, ti na fakalaka loa a ia.

¹⁵ I le tio loa a vosa o le kau polofeta, ala na nonofo i Seliko ti na tutuu mei mamao, ki le nea leia na fai e Eliseo, na lotou pati loa : Kua ifo le laumalie o Elia kia Eliseo ! Ti na lotou au loa o fakafelavei kia Eliseo, o punou olatou ulu ki le kele i ona mua.

¹⁶ Ti na lotou pati loa kia Eliseo : Ko leinei, e maua i au tagata fakasausau ni tagata makeke e tino lima, pe ke loto ke lotou ano o afa lou pule ? Na saga na ave a ia e le laumalie o le Aliki o tuku i se mauga pe ko se vaivailiua. Na tali loa Eliseo : Aua na kotou kakau latou.

¹⁷ Kae na lotou faiga fakamakeke loa kiate ia, ti na pati loa Eliseo : Kotou kakau latou. Na kakau loa e le kau polofeta le kau tagata e tino lima, o lotou afa loa Elia i aso e tolu, kae na leaise lotou maua loa a ia.

¹⁸ I lalatou toe liliu mai kia Eliseo, leia na nofo i Seliko, na pati loa Eliseo kia latou : Pe na leaise kau pati atu kia koutou : Ke aua na kotou ano ?

Le ipu foou mo le patai

¹⁹ Na pati loa le kakai o le kolo kia Eliseo : ko leinei, e malie le nofo i le kolo, ofaipe le tio ki ai a loku aliki ; kae e veli le vai, ti e kaka le kele.

²⁰ Na pati loa Eliseo : Aumai kiate au se pa foou, ti kotou liligi ki ai se patai. Ti na lotou ave loa a nea ana kia Eliseo.

²¹ Na ano loa Eliseo ki le matapuna o le vai, ti na laku loa e ia ki ai le patai, o pati : Ko leinei le folafola a le Eteleno : E kau fakamauli le vai leinei, ti e leaise toe maua loa mei ai le mate mo le paa.

²² Ti na mauli loa le vai o kaku mai ki le aso nei, o mulimuli ki le masau leia na fakasa e Eliseo.

Tautea o le kau gologolo

²³ Na pale loa a Eliseo mei Seliko ki Petele ; kae i lana pale i le ala, na ulu mai loa ni toe mei le kolo, o nukinuki kiate ia. Na lotou pati kiate ia : Pale, fa ulu tula ! Pale, fa ulu tula !

²⁴ Na tagaki loa ki muli a Eliseo, o tio ki toe, ti na fakamalaia loa e ia latou i le suafa o le Eteleno. Ti na au loa ni uluso e lua mei le vao, o kai a toe e tino fa tupu lua.

²⁵ Na ano loa Eliseo mei le ganea lena ki le mauga o Kalemelo, ti na toe liliu loa a ia i ai ki Samalia.