Lua tosi o Sau 19 - Tosi Tapu

Kole a Esekiasi kia Esaia ke faikole ki le Eteleno

¹ I le logo loa a le sau ko Esekiasi ki nea ana, na sae loa e ia ona teu, ti na tui loa e ia se taga, o ano ki le fale o le Eteleno.

² Na kakau loa e ia Eliakimi, pule o le fale o le sau, mo Sepena, le sekalaipe ti mo le kau ulumatua o kau tagata faisakilifisio kia Esaia, le polofeta, vosa o Amote. Na lotou kofu loa ki ni taga.

³ Ti na lotou pati loa kia Esaia : Ko leinei le masau a Esekiasi : Ko le aso leinei ko se aso o le mamae, mo le tautea, ti mo le luma ; talie kua vave vilo fua a toe mei manava o olatou tinana, kae e leaise maua se makeke ke fanaui ai latou.

⁴ E lagi na logo le Eteleno, lou Atua, ki masau fuli ala na fai e Lapesake, leia na kakau mai e le sau o Asilia, lona pule, ke au o nukinuki ki le Atua mauli, ti e lagi fakasoko loa e le Eteleno, lou Atua, ana tautea o tupu ko masau ala na logo a ia ki ai. Koia ke ke fai ake se kole ke pale ki aluga o tupu ko le kakai leia koi toe.

⁵ Na ano loa a tagata fakasausau a le sau ko Esekiasi kia Esaia.

Tali a le Eteleno ia Esaia

⁶ Ti na pati loa Esaia kia latou : Ko leinei le nea leia e kotou fakasa loa ki lokoutou pule : Ko leinei le folafola a le Eteleno : Aua na ke i ki masau ala na ke logo ki ai, ala na lauveli ai kiate au a tagata fakasausau a le sau o Asilia.

⁷ E kau tuku loa kiate ia se laumalie o tupu ke maua loa e ia se logo, ti ke toe liliu loa a ia ki lona fenua, ti ke kau tamate loa a ia ki le seleta i lona fenua.

⁸ Koia na toe mavae loa Lapesake, ti na maua loa e ia le sau o Asilia leia na lolotoga taui ia Lipena, talie na maua e ia le logo kua mavae le sau mei Lakisi.

⁹ Ti na maua loa e le sau o Asilia se logo o uiga mo Tilaka, sau o Etiopia ; na fakasa loa kiate ia : Ko leinei le sau o Etiopia kua saele mai o taui a koe. Ti na toe kakau loa e le sau o Asilia ni tagata avelogo ke ano, o pati kia Esekiasi :

¹⁰ E kotou masau feneeki loa kia Esekiasi, sau o Suta : Ke aua na kakaai a koe e lou Atua leia e ke fanaki ki ai, o pati : E leaise tuku loa Selusalemi ki lima o le sau o Asilia.

¹¹ Ko leinei, kua ke logo ki nea ala na fai e le sau o Asilia ki fenua fuli, pe na feaki lana aga o maumaui a fenua ana ; ti ko koe, e ke sao feaki loa !

¹² Pe na saofaki e atua o atu puleaga a puleaga ana na maumaui e oku tamana, a Kosani, mo Salani, mo Letisefi, ti mo vosa o Eteni, ala e nonofo i Telasa ?

¹³ Kofea a sau o Amate, mo le sau o Alepati, ti mo le sau o le kolo ko Sefalevaimi, mo Ena, ti mo Iva ?

Kole a Esekiasi i le fale tapu

¹⁴ Na too loa e Esekiasi le tosi mei lima o tagata avelogo, o lau. Ti na pale loa a ia ki le fale tapu o le Eteleno, o folasi le tosi i mua o le Eteleno,

¹⁵ ti na fai loa e ia le kole leinei kiate ia : Eteleno, Atua o Iselaele, leia e ekeeke i aluga o selupino ! Ko le Atua a koe e tasi i puleaga fuli o le kele, ko koe leia na fai ia le lagi mo le kele.

¹⁶ Eteleno ! Tuku mai lou taliga, ti ke fakalogo mai. Eteleno ! Fakamavaa ou mata, ti ke tio. Logo ki masau a Sanekelipe, leia na kakau ia mai Lapesake ke au o lauveli ki le Atua mauli.

¹⁷ E maoki, ei Eteleno ! Na maumaui e sau o Asilia a atu puleaga mo olatou fenua ;

¹⁸ ti na lotou laku olatou atua ki le afi ; kae e leaise ko ni atua maoki latou, ko ni gaoiaga a lima o tagata, ko ni laakau mo ni fatu ; koia leia na lotou maumaui ai latou o puli noa.

¹⁹ I le lakaga nei, Eteleno, lomatou Atua ! saofaki matou mei le lima o Sanekelipe, ti ke iloa e puleaga fuli o le kele, ko koe toka tasi ko le Atua, ei Eteleno !

Lua tali a le Eteleno ia Esaia

²⁰ Ti na kakau loa e Esaia, vosa o Amote, ke pati kia Esekiasi : Ko leinei le folafola a le Eteleno, le Atua o Iselaele : Kua kau logo ki le kole leia na ke fai mai kiate au o uiga mo Sanekelipe, sau o Asilia.

²¹ Ko leinei le folafola na fakasa e le Eteleno o uiga mo ia : E nukinuki a ia kiate koe, e gologolo a ia kiate koe, Ko le taine taupoou, taine o Sione ; E kalokalo lona ulu kiate koe, Le taine o Selusalemi.

²² Ko ai leia na ke lauvelii ia mo pativelii ia ? Ko ai leia na ke pati leo lasi ki ai ? Na ke siki ou mata ki aluga Ki le Sagato o Iselaele !

²³ I au tagata avelogo kua ke nukinuki ki le Aliki, Ti na ke pati : O tupu ko le lasi o aku saliote, Kua kau kava ki le tumutumu o mauga, Ki loto malie o Lipane, E kau sele loa a sete taualuga fuli, Ona sipele fulumalilie fuli, Ti e kau kaku loa ki le tumutumu o le laakau fakaoki, Ti mo lona vaomatua leia e tatau mo se oloto laakau fua ;

²⁴ Kua kau kenu ni sosoni, ti kua kau inu ki se vai matapule, Ti kua kau fakamasa loa a vaitafe o Esipito ki oku alofivae.

²⁵ Pe na leaise ke logo na kau teuteui a nea ana talu mei mamao, Ti na kau fakatuutuu latou talu mei le temi afea ? I le lakaga nei, kua kau fakataga ke soko a nea ana, Ti ke ke fakaliliu ni kolo tau ko ni kolo maumau.

²⁶ Koia kua ikiiki ai le makeke o olatou kakai, kua lotou lulu mo luma ; Kua lotou tatau mo vao o faisaga ti mo le mutie, Mo le mutie leia e somo i le ato o fale, Ti mo le fulumeto leia e malo kae e leikiaise gato lona tupu ake.

²⁷ Kae e kau iloa le temi e ke tonatona ai, Le temi e ke ulu ai ki fafo ti ke ulu ai ki fale, Le temi e ke itaita ai kiate au.

²⁸ Talie kua ke itaita kiate au, Ti kua kaku mai ki oku taliga au masau matasoka, E kau tuii loa laku matau ki lou isu, Ti e kau fakagutu loa a koe, Ti e kau toe fakaliliu ia loa a koe i le ala leia na ke au ai.

²⁹ Ke liliu le nea leinei ko se fakamailoga kiate koe, Esekiasi : E kotou kai loa i le fetuu e tasi le fua o le fulumeto leia na to, i le lua o fetuu e kotou kai loa le fulumeto leia na sosomo noa ; kae i le tolu o fetuu, e kotou muluki loa, ti e kotou tuuti loa le fulumeto, e kotou to loa ni vite, ti e kotou kai loa ona fua.

³⁰ Ko le nea leia e sao loa mei le fale o Suta, le nea leia e toe loa e toe sosomo loa ona aka i le kele, ti e kalulu loa ona fua i aluga.

³¹ Talie e somo ake loa i Selusalemi se ga toetoega, ti e au loa mei le mauga o Sione ni iki ala na sao i le tau. Ko lena le nea leia e fai loa e le Aliki i le lasi o lona alofa.

³² Koia e pati ai le Eteleno ki le sau o Asilia : E leaise ulu loa a ia ki le kolo leinei, E leaise toso loa e ia ni gasau i ai, E leaise fakaali loa e ia ni paletau ki ai, Ti e leaise kenu loa e ia ni popoko.

³³ E toe liliu loa a ia i le ala leia na au ai, Ti e leaise ulu loa a ia ki le kolo leinei, ko le folafola leinei a le Eteleno.

³⁴ E kau taupau loa le kolo leinei ke saofaki, O tupu ko au, ti tupu ko Tavite, laku tagata fakasausau.

³⁵ I le po lena, na ifo mai loa le aselo o le Eteleno, ti na tamate loa e ia i le nofolaga tau o le kau Asilia a tagata e tino lelau tino valu tupu lima afe. I le ala usu ake, ko leinei, kua mamate a tagata fuli.

³⁶ Koia na tuu ake loa Sanekelipe, sau o Asilia, mo lana solia, o ano ke toe liliu ; ti na nofo loa a ia i Ninive.

³⁷ I se aso na tulolo ai loa a ia i le fale o Niseloke, lona atua, na taai loa a ia e Atalameleke mo Saletesele, ko ona vosa, ki le seleta, ti na la sosola loa ki le fenua o Alalate. Ti na sau loa Esale-Atone, lona vosa, o fetogi a ia.