Lua tosi o Sau 12 - Tosi Tapu

Fakafoou o le fale tapu e Soasi

¹ Na kamata sau Soasi i le fetuu fitu o le sau o Seu, ti na sau loa Soasi i fetuu e kau fa i Selusalemi. Na igoa lona tinana ko Tesipesa, mei Peele-Sepa.

² Na fai loa e Soasi le nea leia e totonu i mua o le Eteleno i le temi katoa na mulimuli ai a ia ki taki a le tagata faisakilifisio ko Seosata.

³ Kae na leaise puli loa a ganea taualuga ; na soko atu e le kakai lalatou momoli ni sakilifisio mo ni nea fakamanogi i ganea ana.

⁴ Na pati loa Soasi ki tagata faisakilifisio : Ko le paaga katoa o nea tapu fuli ala e aumai ki le fale o le Eteleno, mo le paaga o tukusau, le paaga totogi o kakai fuli kua lau o mulimuli ki le fakafuafua kua fai, mo le paaga leia kua loto malie se tagata ke soli ki le fale o le Eteleno,

⁵ tuku ke too le paaga lena e le kau tagata faisakilifisio, e le tagata taki toka tasi mei kakai ala e iloa e ia, ti ke lotou fakaaoga a ia ki le fau o potu ala kua maumau o le fale tapu.

⁶ Kae na soko loa, i le kau lua tupu tolu fetuu o le sau o Soasi, na leaise fau fua e tagata faisakilifisio a potu ala na tonu ke fau.

⁷ Na kalagai loa e le sau ko Soasi le tagata faisakilifisio ko Seosata mo la ake kau tagata faisakilifisio, o pati kia latou : Kolea na leaise kotou fau ai a potu o le fale na maumau ? I le lakaga nei, e leaise kotou toe too loa le paaga mei le kakai, kae e kotou tuku loa a ia ki le fau o le potu o le fale kua maumau.

⁸ Na loto tasi loa le kau tagata faisakilifisio ke aua na lotou toe too loa le paaga mei le kakai, ti ke aua na lotou toe too loa le kavega lena ko le fau o maumau o le fale tapu.

⁹ Ti na too loa e le tagata faisakilifisio ko Seosata se fa pusa, o puui lona tapono, ti na fakatuu loa e ia a ia i tafa o le aletale, i le fetuu atamai, i le ganea leia e ulu ai ki le fale o le Eteleno. Ti na tuku loa ki ai e le kau tagata faisakilifisio ala na tausi ki le matapa le paaga katoa leia na aumai ki le fale o le Eteleno.

¹⁰ Ka tio loa a tagata faisakilifisio kua lasi le paaga i le fa pusa, ti na pale le sekalaipe a le sau mo le pule o le kau tagata faisakilifisio, ti na la liligi loa le fa pusa, ti na lau loa le paaga leia na maua i le fale o le Eteleno.

¹¹ Ti na la toe tuku loa le paaga lena kua lau ki lima o latou ala na tokaga ki le fau o maumau o le fale o le Eteleno. Ti na fakaaoga le paaga lena ki le totogi o le kau tufuga mo le kau fakatuu fale ala na gaoi ki le fakafoou o le fale o le Eteleno,

¹² mo le totogi o le kau fai sima mo le kau ta fatu, ti mo le totogi o laakau mo fatu fua lalasi ala na aoga ki le fakafoou o le fale o le Eteleno, ti mo nea fuli na aoga ki le fau o le fale.

¹³ Kae na leaise fai loa ni pesini, mo ni sele, mo ni ipu, mo ni fakatagi pupusi pe ko ni nea aulo pe paaga ki le paaga leia na aumai ki le fale o le Eteleno :

¹⁴ Na soli le paaga lena kia latou ala na fai ia a gaoi, o tupu ke lotou fakaaoga a ia ki le fakafoou o le fale o le Eteleno.

¹⁵ Na leaise toe afa ki tagata ala na soli ki ai le paaga ke totogi ai le kau gaoi, pe na feaki lalatou fakaaoga a ia, talie na lotou gaoi fakaagatonu.

¹⁶ Na leaise aumai loa ki le fale o le Eteleno le paaga o sakilifisio ki le agasala ti mo sakilifisio fakamolemole : na tuku le paaga lena ki le kau tagata faisakilifisio.

¹⁷ Na pale loa Asaele, sau o Silia, o taui a Kate, o maua loa e ia. Ti na manatu loa Asaele ke pale, o taui Selusalemi.

¹⁸ Na too loa e Soasi, sau o Suta, a nea tapu fuli, a nea ala na tanaki e Sosafate, mo Solame, ti mo Akasia, ona tamana ko sau o Suta, a nea ala na tanaki e ia totonu mo le aulo katoa leia na tuku i koloa o le fale o le Eteleno ti mo le fale o le sau ; ti na fakamomoli loa e ia a nea fuli kia Asaele, sau o Silia, ti na leaise pale ake loa a Asaele o taui Selusalemi.

Mate o Soasi

¹⁹ Ko le toe o gaoi a Soasi, a nea fuli ala na fai e ia, pe leaise tosi a ia i le tosi fakamatala ki sau o Suta.

²⁰ Na fono loa ana tagata fakasausau ke tamate a ia ; na lotou tamate loa Soasi i le fale o Milo, leia e tuu i le ifoaga ki Sila.

²¹ Ko Sosakale, vosa o Simeate, mo Sosapate vosa o Somele, ana tagata fakasausau, na taai ia loa a ia, ti na mate ai loa Soasi. Na tanu loa a ia mo ona tamana i le kolo o Tavite. Ti na sau loa Amatesia, lona vosa, o fetogi a ia.