Lua tosi o Sau 11 - Tosi Tapu

Atalia, fafine sau o Suta

¹ I le tio loa a Atalia, tinana o Akasia, kua mate lona tama, na tuu ake loa a ia, o tamate le sakoga sau fuli.

² Kae na too loa e Sosepa, taine o le sau ko Solame, tuagaane o Akasia, a Soasi, vosa o Akasia, o fufu mei vosa o le sau, i le temi leia na tamate ai latou : Na tuku loa e Sosepa a Soasi mo lona fafine taupau ki le kogafale leia na tanaki ai a palepale. Na saofaki loa i ai a Soasi mei lima o Atalia, o leaise mate a ia.

³ Na fufu Soasi i fetuu e ono mo lona fafine taupau i le fale o le Eteleno. Ti ko Atalia leia na pule loa i le fenua.

Soasi, sau o Suta

⁴ I le fitu o fetuu na kakau loa e Seosata ke afa mai a pule solia o le kau Keleti mo le kau polisi, ti na tanaki loa e ia latou ki ona tafa i le fale o le Eteleno. Na fai loa e ia se sai mo latou ke lotou fakapapau ake kiate ia i le fale o le Eteleno, ti na fakasa loa e ia kia latou le vosa o le sau.

⁵ Ti na tuku loa e Seosata kia latou ana fakatotonu, o pati : Ko leinei le nea leia e kotou fai loa. Ia latou o koutou ala e kamata ia lalatou selevisi i le aso o le sapato, e tonu ke leo loa se vaega tolu i le fale o le sau,

⁶ ti ko se tasi vaega tolu i le matapa o Sule, ti ko se tasi vaega tolu i le matapa i muli o le kau polisi : e kotou tokaga loa o leo le fale, ke aua na maumaui a ia.

⁷ Ko la ake loa o koutou e leaise gaoi i le aso o le sapato, e lotou au loa o taupau le fale o le Eteleno leia e nofo ai le sau :

⁸ E kotou takatakai loa le sau, ti e kotou tasi too loa lana masafu i lona lima : ti e mailoga leia e laka mai loa ki loto, kotou tamate loa a ia ; e kotou ofi loa i le sau mo ka ulu loa a ia ki fafo pe ulu loa a ia ki loto.

⁹ Na fai loa e le kau pule o tino lelau a fakatotonu fuli na tuku e le tagata faisakilifisio ko Seosata. Na lotou tasi too loa lana kau tagata, latou ala na vae ke ulu ki loto i le aso o le sapato mo latou ala na vae ke ulu ki fafo i le aso o le sapato, o lotou ano loa ki le tagata faisakilifisio ko Seosata.

¹⁰ Na soli loa e le tagata faisakilifisio ki pule o tino lelau ni tao mo ni paletau mei le temi o le sau ko Tavite, ala na tuku i le fale o le Eteleno.

¹¹ Na tutuu loa le kau polisi, o tasi mo ia lana masafu kua too i lona lima, ti na lotou takatakai loa le sau, mei le tuliki atamai o kaku ki le tuliki sema o le fale tapu, o ofi ki le aletale mo le fale tapu.

¹² Ti na aumai loa ki fafo e le tagata faisakilifisio ko Soasi le vosa o le sau, ti na teki loa e ia ki lona fa ulu le pala fakasau, ti na tuku loa e ia kiate ia le tosi o le lao. Na lotou pani loa a ia ki le lolo ke fakanofo a ia ke sau, ti na lotou pasipasi loa, o kalaga : Ke mauli le sau !

¹³ Na logo loa Atalia ki le kalaga a kau polisi mo le kakai, ti na au loa a ia ki le kakai i le fale o le Eteleno.

¹⁴ Na tio loa Atalia. Ti ko leinei, kua tuu le sau i le ganea leia e nofo masani ai le sau ; ti kua tutuu a pule mo le kau pupusi fakatagi o ofi ki le sau : ti kua fakafiafia le kakai katoa o le fenua, ti kua pupusi a fakatagi pupusi. Na sae loa e Atalia ona teu, o kalaga : Ko le kaka ! Ko le kaka !

¹⁵ Ti na tuku loa e le tagata faisakilifisio ko Seosata le fakatotonu leinei ki pule o tino lelau, ala na taki ia le solia : Kotou ave a ia ki fafo, ti kotou tamate ki le seleta leia e muli loa iate ia. Talie na pati le tagata faisakilifisio : Ke aua na tamate a ia i loto o le fale o le Eteleno !

¹⁶ Na tuku ake loa a ia ke ano, ti na ano loa a ia ki le fale sau i le ala leia e ulu ai a osi : ti na tamate loa a ia i ai.

Seosota, tagata fakasausau a le Eteleno

¹⁷ Na fai loa e Seosata se sai i mua o le Eteleno, mo le sau, ti mo le kakai, ke lotou liliu ko kakai a le Eteleno ; ti na fai foki e ia le sai i le vasa o le sau mo le kakai.

¹⁸ Na ulu loa le kakai katoa ki le fale o Paale, ti na lotou maumaui loa a ia ; na lotou maumaui katoa ona aletale mo ona fakatata, ti na lotou tamate i mua o aletale a Matane, le pelepitelo a Paale. Na tuku loa e le tagata faisakilifisio ko Seosata ni tagata leo ki le fale o le Eteleno.

¹⁹ Na too loa e ia a pule o tino lelau, le kau Keleti mo le kau polisi, mo le kakai katoa o le fenua ; ti na fakaifo ake loa e ia le sau mei le fale o le Eteleno, ti na lotou ulu loa ki le fale o le sau i le ala o le matapa o le kau polisi. Ti na eke loa Soasi ki le ekeekeaga fakasau o sau.

²⁰ Na fakafiafia le kakai katoa o le fenua, ti na fimalie loa le kolo. Na lotou tamate loa Atalia ki le seleta i le fale o le sau.

²¹ Na sau Soasi i lona fetuu fitu.