Lua tosi o Sau 1 - Tosi Tapu

Masaki mo le mate o Akasia

¹ I le oki o le mate o Akapo, na agatuu loa Moape ki Iselaele.

² Ti na vilo loa Akasia mei le katupa o lona kogafale fata i Samalia, o masaki. Na kakau loa e ia ni tagata avelogo, o pati kia latou : Kotou ano o afa kia Paale Sepu, atua o Ekeloni, pe kau mauli loa mei le masaki leinei.

³ Kae na pati loa le aselo o le Eteleno kia Elia, tagata Tisipe : Tuu ki aluga, ti ke ano o fakafetaulaki ki tagata avelogo a le sau o Samalia, ti ke pati kia latou : Pe leaise Atua i Iselaele, leia e kotou ano ai o afa kia Paale-Sepu, atua o Ekeloni ?

⁴ Koia e folafola ai le Eteleno, o pati : E leaise ke ifo loa mei le palepale leia e ke moe ai, talie e ke mate loa. Ti na ano loa Elia.

⁵ Na toe liliu loa a tagata avelogo kia Akasia, ti na pati loa Akasia kia latou : Kolea kua kotou toe liliu mai ai ?

⁶ Na lotou tali loa ki le sau : Na pale mai se tagata o fakafelavei mai kia matou, ti na pati mai a ia kia matou : Kotou ano, kotou toe liliu ki le sau leia na kakau mai ia koutou, ti kotou pati kiate ia : Ko leinei le folafola a le Eteleno : Pe leaise Atua i Iselaele leia e ke kakau ai ke ano o afa kia Paale-Sepu ? Koia e leaise ke ifo ai loa mei le palepale lena e ke moe ai, talie e ke mate loa.

⁷ Na pati loa Akasia kia latou : E mata feaki le tagata lena na pale mai o fakafelavei kia koutou, ti na fai atu ia kia koutou a masau ana ?

⁸ Na lotou tali loa kiate ia, ko se tagata na teu ki ni fului manu ti na toi lona vakavaka ki se kilipipi. Ti na pati loa Akasia : Ko Elia, le tagata Tisipe.

⁹ Na kakau loa e le sau kia Elia se pule, leia na pule ki le tino lima mo lana kau tagata e tino lima. Na pale loa le pule lena kia Elia, leia na tonatona i le tumutumu o se mauga, ti na pati loa a ia kia Elia : Tagata a le Atua, kua pati mai le sau : Ke ke ifo mai !

¹⁰ Na pati loa Elia ki le pule o le tino lima : Kapau ko se tagata au a le Atua, ti ke vilo le afi mei lagi, o tutu a koe mo lau kau tagata e tino lima ! Ti na vilo loa le afi mei lagi, o tutu a ia mo lana kau tagata e tino lima.

¹¹ Na toe kakau loa e Akasia kia Elia se tasi ake a pule solia mo lana kau tagata e tino lima. Na pati loa le pule lena kia Elia : Tagata a le Atua, kua pati mai le sau : Ke ke ifo fakatavili mai !

¹² Na tali loa Elia kia latou : Kapau ko se tagata au a le Atua, ti ke vilo le afi mei lagi o tutu a koe mo lau kau tagata e tino lima ! Ti na ifo loa le afi a le Atua mei lagi o tutu a ia mo lana kau tagata e tino lima.

¹³ Na toe kakau loa e Akasia se tasi ake a pule mo lana kau tagata e tino lima. Na pale loa le tolu pule lena kia Elia ; kae i lana kaku loa kia Elia, na peluki loa e ia ona tuli i mua o Elia, ti na kolekole loa a ia, o pati : Tagata a le Atua, e kau kolekole atu ke mauiga kiate koe loku mauli mo le mauli o tagata anei e tino lima, ko au tagata fakasausau !

¹⁴ Ko leinei, na vilo mei lagi le afi o tutu a uluaki pule ki tino lima e lua mo ala kau tagata e tino lima : kae i le lakaga nei, ke mauiga loku mauli ki ou mata !

¹⁵ Na pati loa le aselo o le Eteleno kia Elia : Ifo mo ia, ti aua na ke i fua kiate ia. Na tuu ake loa Elia, o ifo mo ia ki le sau.

¹⁶ Na pati loa Elia ki le sau : Ko leinei le folafola a le Eteleno : Talie na ke kakau ni tagata avelogo kia Paale-Sepu, atua o Ekeloni, o sakinake na leaise maua i Iselaele se Atua leia e mafai ke afa ki ai, e leaise ke ifo loa mei le palepale leia e ke moe ai, talie e ke mate loa.

Solame, sau o Iselaele

¹⁷ Na mate loa Akasia o mulimuli ki le folafola a le Eteleno leia na fakasa e Elia. Ti na sau loa Solame, lona taina, o fetogi a ia, talie na leaise maua sona vosa, i le lua fetuu o le sau o Solame, sau o Suta, vosa o Sosafate.

¹⁸ Ko le toe o gaoi a Akasia, mo nea ala na fai e ia, pe leaise tosi a ia i le tosi fakamatala ki sau o Iselaele ?