Lua tosi o Koloniko 7 - Tosi Tapu

Kololia o le Eteleno i le fale tapu

¹ I le oki o le faikole a Salomone, na ifo loa le afi mei lagi o tutu le failaulau mo sakilifisio, ti na fakaapele loa le fale katoa e le kololia o le Eteleno.

² Na leaise mafai ke ulu le kau tagata faisakilifisio ki le fale o le Eteleno, o tupu kua fakaapele le fale o le Eteleno e le kololia o le Eteleno.

³ I le tio loa a fanau fuli a Iselaele ki le ifo o le afi mo le kololia o le Eteleno ki le fale, na lotou punou loa ki le kele o su mo fakafetai ki le Eteleno, o pati : Talie e agamalie a ia, talie e lee gato lona manava alofa !

⁴ Ti oki a ia, na momoli loa e le sau mo le kakai katoa ni sakilifisio i mua o le Eteleno.

⁵ Na momoli loa e le sau ko Salomone ni pipi tagata e kau lua tupu lua afe mo ni ovi e kau lelau kau lua afe. Ti na fai loa e le sau mo le kakai katoa le fakatapu o le fale o le Atua.

⁶ Na fai e le kau tagata faisakilifisio lalatou gaoi, ti na fai foki e le kau Levi lalatou gaoi mo alatou nea fai musika ki le Eteleno, ala na fai e le sau ko Tavite ke sua ki ai a fakavikiviki ki le Eteleno, i le aso leia na tuku ai loa e Tavite kia latou ke fakafetai ki le Eteleno, o pati : Talie lee gato lona manava alofa ! Na pupusi e tagata faisakilifisio ni fakatagi pupusi i olatou mua. Ti na tutuu le kakai katoa o Iselaele i aluga.

⁷ Na fakatapui loa e Salomone le loto malie o le lotoa leia i mua o le fale o le Eteleno ; talie ko le ganea lena na momoli ai e ia a failaulau mo gako o sakilifisio fakafetai, talie na leaise feauga le aletale sila leia na fakatuu e Salomone ki failaulau, mo moliga, ti mo gako.

⁸ Na fai loa e Salomone le katoaga lena i aso e fitu, mo le kakai katoa o Iselaele ; na au se kakai toka api ai mei tafatafa o Amati o kaku ki le liua o Esipito.

⁹ I le valu o aso na fai loa se fakatasi mamalu, talie na lotou fai loa le fakatapui o le aletale i aso e fitu, ti mo le fakafiafia i aso e fitu.

¹⁰ I le kau lua tupu tolu o aso o le fitu o masina, na kakau loa e Salomone ki olatou falela le kakai mo le loto fiafia mo nekenekea o tupu ko nea malilie ala na fai e le Eteleno kia Tavite, mo Salomone, ti mo Iselaele, lona kakai.

Sa tua lua o le Eteleno kia Salomone

¹¹ I le oki o le fakatuu e Salomone o le fale tapu o le Eteleno mo le fale o le sau, ti mo lana fai o iku manuia a nea fuli ala na loto a ia ke fai ki le fale o le Eteleno mo le fale o le sau,

¹² na sa loa le Eteleno kia Salomone i le pouli, o pati kiate ia : Kua kau tali lau kole ti kua kau filifili le ganea leinei ofaipe le fale leia e tonu loa ke momoli mai ai kiate au ni sakilifisio.

¹³ Ka kau tapono loa le lagi ke aua na toe to loa se ua, ka kau fakatotonu loa ki seseivaka ke maumaui le fenua, ka kau fakato loa le taumasaki ki loku kakai,

¹⁴ kapau e fakataulalo loa loku kakai leia e too ki ai loku suafa, mo faikole loa, mo afa ia loa oku mata, ti kapau e fakasemala loa a ia mo maliu loa a ia mei ona ala veveli, e kau tali loa a ia mei lagi, e kau fakamolemole loa lana agasala ti e kau fakamauli loa lona fenua.

¹⁵ I le aso lena, e mavaa loa oku mata, ti e logo loa oku taliga ki le kole leia e fai i le ganea leinei.

¹⁶ I le lakaga nei, kua kau filifili ti kua kau fakatapui le fale leinei ke agai ai loku suafa o tuumau, ti kua kau tuku ki ai oku mata mo loku loto o lee gato.

¹⁷ Ti ko koe, kapau e ke saele loa i oku mua ofaipe le saele a Tavite, lou tamana, o ke fai a nea fuli ala na kau fakatotonu atu kiate koe, ti kapau e ke tausi aku lao mo aku fakatotonu,

¹⁸ e kau fakamakeke loa le ekeekeaga fakasau o lou puleaga, ofaipe le nea leia na kau fakapapau kia Tavite, lou tamana, o pati : E ke maua tuumau loa se tasi i lou sakoga ke sau i Iselaele.

¹⁹ Kae kapau e kotou maliu kese loa, kapau e kotou tiaki loa aku lao mo aku folafola, ala na kau tosi atu kia koutou, ti kapau e kotou tausi loa ki ni iki ake atua kese, o punou i olatou mua,

²⁰ e kau ave loa koutou mei loku fenua leia na kau soli atu kia koutou, ti e kau tiaki mamao loa meiate au le fale leinei kua kau fakatapui ki loku suafa, ti e kau fakaliliu loa a ia ko se nea ke katai mo valoki i puleaga fuli.

²¹ Ti na logo ai le mauiga kese o le fale leinei, e ofolele loa leia e fakalaka loa i ona tafa, o pati : Kolea kua fai felaaki ai e le Eteleno le fenua leinei mo le fale leinei ?

²² Ti e tali loa kiate ia : O tupu kua lotou tiaki le Eteleno, le Atua o olatou tamana, leia na fakamavae ia latou mei le fenua o Esipito, talie kua lotou pipiki ki ni iki ake atua kese, kua lotou punou i olatou mua, ti kua lotou tausi kia latou ; ko le tupuaga lena o le aumai e le Eteleno kia latou o malaia fuli ana.