Lua tosi o Koloniko 6 - Tosi Tapu

Fakatapu o le fale tapu ; kole a Salomone

¹ Na pati loa Salomone : E loto le Eteleno ke nofo i le fakapouli !

² Ti ko au, kua kau fakatuu ia se fale ke liliu ko lou nofoaga, se ganea leia e ke nofo ai loa o lee gato !

³ Na maliu ake loa le sau o agaaga ki le kakai, ti na tapuaki loa a ia ki le fakatasi katoa o Iselaele ; ti na tutuu i aluga le kakai katoa o Iselaele.

⁴ Ti na pati loa Salomone : Ke fakafetai ki le Eteleno, le Atua o Iselaele, leia na folafola mei lona gutu kia Tavite, loku tamana, ti kua fakasoko ia i lona mafimafi le nea leia na fakasa e ia, o pati :

⁵ Talu mei le aso leia na kau fakamavae ai loku kakai mei le fenua o Esipito, na leaise kau filifili fua se kolo i nofoaga fuli o Iselaele, ke fakatuu ai se fale ki loku suafa, ti na leaise kau filifili fua se tagata ke pule ki loku kakai ko Iselaele ;

⁶ kae kua kau filifili Selusalemi ke agai ai loku suafa, ti kua kau filifili Tavite ke pule ki loku kakai ko Iselaele !

⁷ Na maua e Tavite, loku tamana, se manatu ke fakatuu se fale ki le suafa o le Eteleno, le Atua o Iselaele.

⁸ Ti na pati loa le Eteleno kia Tavite, loku tamana : Talie na ke maua le manatu leinei ke fakatuu se fale ki loku suafa, na ke fai malie ke maua le manatu lena i lou loto.

⁹ Kae, e leaise ko koe loa leia ka fakatuu ia loa le fale ; kae ko lou vosa loa, leia na au mei ou tootooga, ka fakatuu ia loa le fale ki loku suafa.

¹⁰ Ti kua fakasoko e le Eteleno le folafola leia na fakasa e ia. Talie kua kau tuu ake ki aluga o fetogi Tavite, loku tamana, ti kua kau eke i le ekeekeaga fakasau o Iselaele, ofaipe lona fakasa e le Eteleno, ti kua kau fakatuu le fale ki le suafa o le Eteleno, le Atua o Iselaele.

¹¹ Ti kua kau tuku ki ai le aleka leia e tuku ai le sai a le Eteleno, le sai leia na fai e ia mo fanau a Iselaele.

¹² Na tuu loa Salomone i mua o le aletale o le Eteleno, mo mua o le fakatasiga katoa o Iselaele, ti na folasi loa e ia ona lima.

¹³ Talie na fai e Salomone se ganea fai akonaki sila, o fakatuu i loto malie o le lotoa ; ko lona loa ko meta e lua vaelua, ti ko lona laulasi ko meta e lua vaelua, ti ko lona taualuga ko le meta e tasi vaelua ; na tuu loa Salomone i ai, ti na tutuli loa a ia i mua o le fakatasiga katoa o Iselaele, ti na siki loa e ia ona lima ki le lagi, o pati :

¹⁴ Ei Eteleno, Atua o Iselaele ! E leaise tasi ake fua Atua e tatau mo koe, i le lagi mo le kele : e ke taupau lau sai mo lou manava alofa ki au tagata fakasausau ala e saele i ou mua i lolatou loto katoa !

¹⁵ Koia kua ke fakasoko ai lau fakapapau leia na ke fai ki lau tagata fakasausau ko Tavite, loku tamana ; talie kua ke fakasoko i le aso nei ki lou mafimafi le nea leia na fakasa e lou gutu.

¹⁶ I le lakaga nei, Eteleno, Atua o Iselaele, ke ke fakasoko le fakapapau leia na ke fai kia Tavite, loku tamana, o pati : E leaise ke mativa loa i se aso i oku mua i se tagata leia ke nofo i le ekeekeaga fakasau o Iselaele, o fetogi a koe, ko leia fua ke tokaga ou vosa ki olatou ala ti ke lotou saele i laku lao ofaipe lau saele i oku mua.

¹⁷ Koia, Eteleno, Atua o Iselaele, fakasoko lau fakapapau leia kua ke fai ki lau tagata fakasausau ko Tavite !

¹⁸ Pe feala koia ke nofo maoki le Atua mo le tagata i le kele ? Ko leinei, e leaise o fua a ia i le lagi mo le lagi o atu lagi : Ti e feaki ake loa ke o a ia i le fale leinei kua kau fakatuu !

¹⁹ Koia Eteleno, loku Atua, ke ke epa mai ki le kole a lau tagata fakasausau ti mo lana fakakolekole ; ke ke fakalogo mai ki le tagi mo le kole ala e fai atu kiate koe e lau tagata fakasausau.

²⁰ Ke ke tuku tuumau ou mata i le ao mo le po ki le fale leinei, ki le ganea leia kua ke pati ki ai : E agai loa i ai loku suafa ! Ke ke fakalogo ki le kole leia e fai e lau tagata fakasausau i le ganea leinei.

²¹ Ke ke alofa o tali a kole a lau tagata fakasausau ti mo lou kakai ko Iselaele, mo ka lotou faikole loa i le ganea leinei ! Ke ke tali mei lou nofoaga, mei lagi, ke ke tali ti ke ke fakamolemole !

²² Kapau e agasala loa se tasi ki lona oloi, ti kapau e fakamaua kiate ia se fakapapau, ti kapau e au a ia o fakapapau i mua o lou aletale, i le fale leinei,

²³ ke ke fakalogo kiate ia mei lagi, ke ke gaoi ti ke ke fakamaaui au tagata fakasausau ; ke ke fakatuaa leia e sala ti ke ke fakavilo lana agasala ki lona fa ulu ; kae ke ke fakamauli leia e mea, ti ke ke fai kiate ia o mulimuli ki lona faitotonu !

²⁴ Kapau e lava loa lou kakai ko Iselaele i le fili, o tupu ko lana agasala kiate koe, kapau e lotou toe liliu mai loa kiate koe, o su ki lou suafa, ti kapau e lotou fai loa kiate koe ni kole mo ni tagi i le fale leinei,

²⁵ ke ke tali latou mei le lagi, ke ke fakamolemole le agasala a lou kakai ko Iselaele, ti ke ke toe aumai latou ki le fenua leia na ke soli kia latou mo olatou tamana !

²⁶ Ka mapono loa le lagi ti e leaise toe to loa se ua, o tupu ko alatou agasala kiate au, kapau e lotou faikole loa i le ganea leinei ti e lotou su loa ki lou suafa, ti kapau e lotou tiaki loa alatou agasala, talie na ke tautea loa latou,

²⁷ ke ke tali latou mei lagi, ke ke fakamolemole le agasala o au tagata fakasausau mo lou kakai ko Iselaele, leia e ke ako loa ki ai le ala totonu leia e tonu ke lotou saele ai, ti ke ke fakato le ua ki le kele leia na ke soli ko le tofiga o lou kakai !

²⁸ Ka maua loa i le fenua se oge, pe ko se taumasaki, pe ko se taulaa o mamate ai a magiti, pe ko se papala, pe ko se seseivaka i faasiga kesekese, ti ka taui loa e le fili lou kakai i lona fenua, i ona matapa, ti ka au loa ni malaia mo ni masaki kesekese,

²⁹ kapau e fai loa e se tagata, pe ko lou kakai katoa ko Iselaele, ni tagi mo ni kole kiate koe, ti kapau e tasi iloa e le tagata le veli o lona loto mo lona mamae, o siki ona lima ki le fale leinei,

³⁰ ke ke tali latou mei lagi, mei le ganea leia e ke nofo ai, ti ke ke fakamolemole ; ke ke soli ki le tagata taki toka tasi o fakatatau ki ona ala, e koe leia e iloa ia a loto fuli, talie ko koe toka tasi leia e iloa ia a loto o fanau a tagata ;

³¹ ti e lotou i loa kiate koe o saele i ou ala i le temi katoa leia e lotou mauli ai loa i le fenua leinei na ke soli ki omatou tamana !

³² Ka au loa se matapule, leia e leaise kau ki lou kakai ko Iselaele, mei se fenua mamao, o tupu ko lou suafa taualuga, mo lou lima makeke, ti mo lou lima falo, o faikole i le fale leinei,

³³ ke ke tali a ia mei lagi, mei le ganea leia e ke nofo ai, ti ke ke soli ki le matapule lena a nea fuli ala e kole atu loa e ia kiate koe, o tupu ke iloa e le kakai katoa o le kele lou suafa, ti ke lotou i kiate koe, ofaipe lou kakai ko Iselaele, ti ke lotou iloa e too lou suafa i le fale leinei kua kau aga o fakatuu !

³⁴ Ka ano loa lou kakai ke tau ki ona fili, o mulimuli ki le ala leia na ke fakatotonu loa kia latou, kapau e lotou fai atu loa kiate koe ni kole, o agaaga mai olatou mata ki le kolo leinei na ke filifili ti mo le fale leinei na kau fakatuu ki lou suafa,

³⁵ ke ke tali mei lagi alatou faikole mo alatou tagi ti ke ke au o tokoi kia latou !

³⁶ Ka lotou agasala loa kiate koe, talie e leaise tagata loa e leaise agasala, ti ka ke ita loa kia latou, o ke tuku latou ki le fili, leia e ave popula ia loa latou ki se fenua mamao pe ofi ;

³⁷ kapau e lotou fakasemala i olatou loto i le fenua leia e lotou popula ai loa, kapau e lotou fakasemala loa, o tagi atu kiate koe i le fenua leia e lotou popula ai loa, o pati : Kua motou agasala, kua motou fai ni patigataa, kua motou fai le nea e veli !

³⁸ Kapau e lotou toe liliu mai loa kiate koe mo le loto katoa ti mo le laumalie katoa, i le fenua lena e lotou popula ai loa, kapau e lotou faikole atu loa kiate koe, o agaaga olatou mata ki lolatou fenua leia na ke soli ki olatou tamana, mo le kolo leia na ke filifili, ti mo le fale leia na kau fakatuu ki lou suafa,

³⁹ ke ke tali alatou kole mo alatou tagi mei lagi, mei lou nofoaga, ti ke ke tokoi kia latou ; ke ke fakamolemole a agasala a lou kakai kiate koe.

⁴⁰ I le lakaga nei, ei loku Atua, ke mavaa ou mata, ke logo ou taliga ki le kole leia e fai i le ganea leinei !

⁴¹ I le lakaga nei, Eteleno Atua, ke ke tuu ki aluga, ke ke au ki lou maloloaga, a koe mo le aleka o lou agai. Eteleno Atua, tuku ke kofu au tagata faisakilifisio ki le fakamauli, ti tuku ke fakafiafia lou kakai alofaina ki le manuia !

⁴² Eteleno Atua, aua na ke tekei lau filifiliia, ke ke manatui a kalasia fuli ala na ke tuku kia Tavite, lau tagata fakasausau !