Lua tosi o Koloniko 1 - Tosi Tapu

Salomone, sau o Iselaele : lona poto mo lona kololia

¹ Na makeke loa Salomone, vosa o Tavite, i lona puleaga ; ti na nofo loa mo ia le Eteleno, lona Atua, o siki a ia o lasi ai.

² Na tuku loa e Salomone ni fakatotonu ki Iselaele katoa, ki pule o tino afe mo tino lelau, mo tui fakamaau, mo pule fenua o Iselaele katoa, ti mo pule o fale fakatamana ;

³ ti na ano loa Salomone mo le fakatasiga katoa ki le ganea tapu leia na tuu i Kapaone. Na tuu i ai le falela tapu o le Atua, leia na fai e Moisese, tagata fakasausau a le Eteleno i le toafa ;

⁴ kae kua ave e Tavite le aleka o le Atua mei Kiliate-Sealimi ki lona tukuaga leia na teuteui e ia kiate ia, talie na fakatuu e ia se falela kiate ia i Selusalemi.

⁵ Na tuu foki i ai, i mua o le tapenakulo o le Eteleno, le aletale sila leia na fai e Petesaleele, vosa o Uli, vosa o Ulu. Na afa loa e Salomone mo le fakatasiga katoa le Eteleno.

⁶ Ti na momoli loa e Salomone, i le aletale sila leia na tuu i mua o le falela tapu, ni failaulau e afe.

⁷ I le pouli, na sa loa le Atua kia Salomone, o pati kiate ia : Kole mai le nea leia e ke loto ke kau soli atu kiate koe.

⁸ Na tali loa Salomone ki le Atua : Kua ke fakasa lou agamalie mo lou agatonu ki loku tamana ko Tavite, ti kua ke fakanofo au ko le sau, o fetogi a ia.

⁹ I le lakaga nei, Eteleno Atua, ke fakasoko lau fakapapau leia na ke fai kia Tavite, loku tamana, talie kua ke fakanofo au ke sau ki se kakai api ai ofaipe le efu o le kele !

¹⁰ Soli mai foki kiate au le poto mo le iloa, o tupu ke kau iloa le saele i mua o le kakai leinei ! talie ko ai e mafai ia loa ke fakamaaui ia lou kakai, le kakai lasi leinei ?

¹¹ Na pati loa le Atua kia Salomone : O tupu ko lena le manatu o lou loto, o tupu na leaise ke kole ia ni koloa, pe ko ni nea malilie, pe ko le kololia, pe ko le mate o ou fili, pe ko se mauli fualoa, kae e ke kole kiate koe se poto mo se iloa o tupu ke fakamaaui loku kakai leia kua kau fakasau a koe ki ai,

¹² kua tuku atu loa kiate koe le poto mo le iloa. Ti kua kau toe soli atu foki kiate koe ni koloa, mo ni nea malilie, ti mo le kololia, o lasi ake i sau fuli i ou mua ti mo sau fuli i ou muli.

¹³ Na toe liliu loa Salomone ki Selusalemi, mei le ganea tapu leia na tuu ai le falela tapu i Kapaone. Ti na sau loa a ia i Iselaele.

¹⁴ Na tanaki loa e Salomone ni saliote tau mo ni kau tagata ekeosi : ti na maua loa e ia ni saliote e afe mo kau lelau e fa, ti mo ni kau tagata ekeosi e tino agafulu tupu lua afe, ti na tuku loa e ia latou i kolo ala na tanaki ai e ia ana saliote, ti mo Selusalemi ke ofi ki le sau.

¹⁵ I le sau a Salomone, na tatau loa le lasi o le aulo mo le siliva i Selusalemi mo fatu, ti na tatau loa le lasi o sete mo sikomole ala e tupu i le fenua.

¹⁶ Na aumai a osi a Salomone mei Esipito ; na ifo ni kau tagata fai koloa a le sau, o totogi mai latou mei ai ;

¹⁷ Na aumai e kau tagata fai koloa ana le saliote mei Esipito, o totogi ki ni fa sikele siliva e kau lelau ono, ti ko le osi ki fa sikele siliva e kau lima. Na lotou toe totogi mai foki ni saliote mo ni osi mei sau o le kau Eti mo sau o Silia.