Lua tosi a Soane 1 - Tosi Tapu

Fakaalofa

¹ Ko au ko le tagata fakamatuatua, kia Kilia ko le fafine filifiliia ti mo ana fanau, ala e kau alofa ki ai i le maoki, ti e leaise ko au fua leia e alofa kia latou, kae ko latou fuli foki ala e iloa ia le maoki,

² o tupu ko le maoki leia e nofo ia tatou, ti e nofo loa mo tatou o lee gato.

³ Ko le kalasia, mo le manavaalofa, ti mo le tokamalie ke tuku atu kia koutou e le Atua ko le Tamana ti mo Sesu-Kilisito ko le Alo o le Tamana, i le maoki mo le alofa !

Ko le maoki mo le alofa

⁴ Na kau fiafia lasi ai i le maua o ni iki o au fanau ala e saele i le maoki, o mulimuli ki le fakatotonu leia na tou maua mei le Tamana.

⁵ Ti ko leinei le nea leia e kau kole atu kiate koe, Kilia, o leaise kau tosi atu se fakatotonu foou, kae ko le nea leia na tou maua talu mei le kamataaga, ke tou fealofaaki ia tatou.

⁶ Ti ko le alofa ko le saele o mulimuli ki ana fakatotonu. Ko lena le fakatotonu leia e tonu ke kotou saele ai, ofaipe lakoutou ako a ia talu mei le kamataaga.

Toketa loi o le Lao

⁷ Talie kua ulu mai ki le malama nei ni tagata toka api, ti e leaise lotou fakasa ia kua au Sesu-Kilisito i se tino fakatagata ; ko leia e felaaki ko le tagata a ia, ti ko le atekilisito.

⁸ Kotou tokaga fua kia koutou totonu, o tupu ke aua na puli le fua o lakotou gaoi, kae ke kotou maua se fakapale lasi.

⁹ Ko leia e leaise nofo i le akonaki a Kilisito, kae fanatu mamao, e leaise maua e ia le Atua. Ko leia e nofo i le akonaki lena e maua e ia le Tamana mo le Alo.

¹⁰ Kapau e au se tasi kia koutou, kae e leaise aumai e ia le akonaki lena, aua na kotou tali a ia i lokoutou fale, ti aua na kotou pati kiate ia : Malo !

¹¹ Talie ko leia e pati kiate ia : Malo ! e kau a ia ki ana gaoi veveli.

¹² E lasi a nea ala e kau fia masau atu kia koutou, kae e leaise kau loto ke tosi atu latou kia koutou i le pepa mo le vaitosi ; kae e kau amanaki malie ke kau natu kia koutou, ti ke kau masau gutu atu kia koutou, o tupu ke tou apele i le fiafia.

¹³ E fakaalofa atu kiate koe a fanau o lou taina, le filifiliia.