Lua tosi a Samuele 9 - Tosi Tapu

Agamalie o Tavite kia Mefiposete

¹ Na pati loa Tavite : Pe koi toe se tasi i le fale o Saulo, ke kau fai kiate ia se nea malie o tupu ko Sonatane ?

² Na i ai se tagata fakasausau mei le fale o Saulo, na igoa ko Tesipa, leia na aumai loa kia Tavite. Na pati loa le sau kiate ia : Pe ko Tesipa a koe ? Ti na tali loa a ia : Ko au totonu ko lau tagata fakasausau !

³ Na pati loa le sau : Pe leaise koi toe se tasi i le fale o Saulo, o tupu ke kau fakasa kiate ia le agamalie o le Atua kiate au ? Ti na tali loa Tesipa ki le sau : Koi toe le vosa o Sonatane, kae e maimoa ona vae.

⁴ Na pati loa le sau kiate ia : Kofea a ia ? Ti na tali loa Tesipa ki le sau : E nofo a ia i le fale o Makile, vosa o Amiele, i Lotepale.

⁵ Na kakau loa a ia e le sau ko Tavite ke ano o aumai le vosa o Sonatane mei le fale o Makile, vosa o Amiele, i Lotepale.

⁶ Ti na au loa Mefiposete, vosa o Sonatane, vosa o Saulo, kia Tavite, o tulolo ona mata ki le kele, o fakaapaapa. Na pati loa Tavite : Mefiposete ! Ti na tali loa a ia : Ko leinei lau tagata fakasausau.

⁷ Na pati loa Tavite kiate ia : Aua na ke i, talie e kau loto ke kau fakasa kiate koe le nea e malie, o tupu ko Sonatane, lou tamana. E kau liufaki loa kiate koe a kele fuli o Saulo, lou tupuna, ti e ke kai tuumau loa i loku laupapa.

⁸ Na punou loa Mefiposete, o pati : Kolea lau tagata fakasausau ke ke tokaga ai ki se kuli mate ko au ?

⁹ Na kalagai loa e le sau a Tesipa, tagata fakasausau a Saulo, o pati kiate ia : Kua kau soli ki le vosa o lou pule a nea fuli a Saulo mo nea fuli o lona fale katoa.

¹⁰ E ke gaoi loa ona kele fuli, e koe, mo ou vosa, mo au tagata fakasausau, ti e ke tanaki loa a fua, o tupu ke maua e le vosa o lou pule se pane ke kai ; ti ko Mefiposete, vosa o lou pule, e kai tuumau loa a ia i loku laupapa. Ti ko leinei, na maua e Tesipa ni vosa e tino agafulu tupu lima mo ni tagata fakasausau e tino lua.

¹¹ Na pati loa a ia ki le sau : E fai loa e lau tagata fakasausau a nea fuli ala e fakatotonu e le sau loku aliki ki lana tagata fakasausau. Ti na kai loa Mefiposete i le laupapa o Tavite, ofaipe se tasi o vosa o le sau.

¹² Ti na maua foki e Mefiposete se vosa ikiiki, na igoa ko Mika, ti ko latou fuli na nonofo i le fale o Tesipa ko tagata fakasausau a Mefiposete.

¹³ Koia na nofo ai Mefiposete i Selusalemi, talie na kai tuumau a ia i le laupapa o le sau. Na kito ona vae lualua.