Lua tosi a Samuele 8 - Tosi Tapu

Tau mo malo o Tavite

¹ I le sili o le nea lena, na toe taui loa e Tavite le kau Filisitini, o fakagaegae, ti na too loa e ia mei le lima o le kau Filisitini le pule ki lolatou kolo mua.

² Na taai foki e ia le kau Moape, ti na fakamomoe loa e ia latou ki le kele, kae fuafua loa e ia latou ki se maea ; ti na fuafua loa e ia ki le maea o tua lua ke tamate, kae na fuafua loa e ia ki le maea o tua tasi ke fakamauli. Ti na popula loa le kau Moape kia Tavite, o lotou totogi loa kiate ia se tukusau.

³ Na taai loa foki e Tavite a Atatesele, vosa o Leopi, sau o Tesopa, i le temi na ano ai loa a ia o toe fakatuu lana pule i le fenua o le vaitafe ko le Eufalate.

⁴ Na too loa e Tavite meiate ia a tagata ekeosi e tino afe tino lelau fitu, mo tagata solia saele lalo e tino lua afe ; na tuuti loa e ia a ua o vae o osi o saliote gaoi fuli, kae na tuku loa e ia a osi o saliote tau e kau lelau.

⁵ Na au loa le kau Silia o Tamaso o tokoi kia Atatesele, sau o Tesopa, ti na taai loa e Tavite a tagata Silia e tino lua tupu lua afe.

⁶ Na tuku loa e Tavite ni kau solia ke leo i Silia o Tamaso. Ti na popula loa le kau Silia kia Tavite, ti na lotou totogi loa kiate ia se tukusau. Na puipui e le Eteleno a Tavite i ganea fuli ala na ano a ia ki ai.

⁷ Ti na too loa e Tavite a paletau aulo ala na maua e le kau tagata fakasausau a Atatesele, ti na ave loa e ia latou ki Selusalemi.

⁸ Na toe too foki e le sau ko Tavite se sila o lasi ai i Petaki mo Pelotai, ko kolo o Atatesele.

⁹ Na logo loa a Toi, sau o Amate, ki le taai e Tavite o le solia katoa a Atatesele,

¹⁰ ti na kakau loa e ia Solame, lona vosa, ke felavei mo le sau ko Tavite, o fakamalo kiate ia, i lana taui Atatesele ti mo lana taai a ia. Talie na tau foki a Toi mo Atatesele i le temi lena. Na ave loa e Solame ni ipu siliva, mo ni ipu aulo, ti mo ni ipu sila.

¹¹ Na fakatapui loa latou e le sau ko Tavite ki le Eteleno, ofaipe lana fakatapui le aulo, mo le siliva ala na too e ia mei puleaga fuli ala na malo ai,

¹² mei Silia, mei Moape, mei vosa o Amone, mei le kau Filisitini, meia Amaleke, mei le koloa o Atatesele, sau o Tesopa, vosa o Leopi.

¹³ I lana toe liliu mai mei lana malo i le kau Silia, na toe logologona loa le igoa o Tavite, i lana toe taai, i le vaivailiua o le patai, a tagata Etome e tino agafulu tupu valu afe.

¹⁴ Na tuku loa e ia ni kau solia i Etome, na tuku loa e ia ni kau solia i Etome katoa. Ti na popula loa Etome katoa kia Tavite. Na puipui e le Eteleno a Tavite i ganea fuli ala na ano a ia ki ai.

¹⁵ Na pule loa Tavite i Iselaele, ti na fakamaaui e ia lona kakai i le faitotonu.

¹⁶ Ko Soape, vosa o Teselusa, na taki ia le solia ; ko Sosafate, vosa o Asilute, na tokaga ki tosi fakapuleaga ;

¹⁷ Ko Satoke, vosa o Asitupe, mo Asimeleke, vosa o Apiatale, na faisakilifisio ; Ko Selasa na sekalaipe ;

¹⁸ Ko Penasa, vosa o Seosata, na pule ki le kau Keleti mo le kau Peleti ; ti na minisi a vosa o Tavite i le puleaga.