Lua tosi a Samuele 7 - Tosi Tapu

Manatu a Tavite ke fakatuu se fale ki le Eteleno

¹ Na soko loa i le kua nofo a Tavite i lona fale fakasau, ti kua soli e le Eteleno kiate ia le malolo, i le oki o lana saofaki a ia mei ona fili ala na takatakai ia lona puleaga ;

² na pati loa Tavite ki le polofeta ko Natane : Tio ! E kau nofo nei i se fale kua fau ki le laakau ko le sete, kae e nofo nei le aleka o le Atua i se falela.

³ Na tali loa Natane ki le sau : Ano, ti ke fai a nea fuli ala e ke maua i lou loto, talie e nofo le Eteleno mo koe.

Le sai mo Tavite

⁴ I leia ake a po, na fakasa loa le folafola a le Eteleno kia Natane :

⁵ Ano o pati ki laku tagata fakasausau ko Tavite : Ko leinei le folafola a le Eteleno : Pe ko koe leia e lagai ia loa kiate au se fale ke kau nofo ai ?

⁶ Kae na leaise kau nofo i se fale talu mei le aso na kau fakamavae ai a fanau a Iselaele mei Esipito o kaku mai ki le aso nei ; na kau fanoga i se falela mo se tapenakulo.

⁷ I ganea fuli na kau saele ai mo fanau a Iselaele, pe na kau pati se kupu e tasi ki se tasi o pule o Iselaele ala na kau fakatotonu ke tausi ki loku kakai ko Iselaele, pe na kau pati : Kolea na leaise kotou fakatuu ai soku fale ki le sete ?

⁸ I le lakaga nei, e ke pati loa ki laku tagata fakasausau ko Tavite : Ko leinei le folafola a le Eteleno o kau tau : Na kau too a koe mei le lotoa manu i muli o kau ovi, o tupu ke ke liliu ko le pule o loku kakai, ko Iselaele ;

⁹ na kau nofo mo koe i ganea fuli na ke saele ai, na kau tamate ou fili fuli i ou mua, ti na kau fakaliliu lou igoa o lasi ofaipe igoa o tagata lalasi e nonofo i le kele ;

¹⁰ na kau soli se nofoaga ki loku kakai, ki Iselaele, ti na kau to a ia ke tuumau ti ke aua na toe galulu, ti ke aua na toe fakavelivelii a ia e le kau agaveli ofaipe mua,

¹¹ pe le temi leia na kau fakanofo ai ni tui fakamaau ki loku kakai ko Iselaele. Na kau soli kiate koe le malolo o saofaki a koe mei ou fili fuli. Ti e fakasa e le Eteleno kiate koe e fakatupu loa e ia se fale kiate koe.

¹² Ka oki loa ou aso, ti e ke moe loa mo ou tamana, e kau lagai loa lou sakoga i ou muli, leia e ulu loa mei ou tootooga, ti e kau fakamakeke loa lana pule.

¹³ Ko ia leia ka fakatuu ia loa se fale ki loku suafa, ti e kau fakamakeke loa le ekeekeaga fakasau o lona puleaga, o lee gato.

¹⁴ E kau liliu loa kiate ia ko se tamana, ti e liliu loa a ia kiate au ko se vosa. Kapau e fai loa e ia le nea e veli, e kau tautea loa a ia ofaipe se tamana leia e tautea ia lona vosa ;

¹⁵ kae e leaise toe mavae loa loku alofa meiate ia, ofaipe laku too a ia meia Saulo, leia na tiaki i ou mua.

¹⁶ E tuu loa lou fale mo lou puleaga o lee gato, ti e tuu makeke loa lou ekeekeaga fakasau o lee gato.

Kole a Tavite

¹⁷ Na fakamatala loa e Natane kia Tavite a masau fuli ana mo le tio katoa lena.

¹⁸ Ti na ano loa le sau ko Tavite o nofo i mua o le Eteleno, o pati : Ko ai au, ei Aliki Eteleno ? ti kolea loku fale, kua ke fakakaku mai ai au ki le tuulaga e kau nofo ai nei ?

¹⁹ Ti e leikiaise feauga aifai le nea lena ki ou mata, ei Aliki Eteleno ; talie kua ke toe masau foki ki le fale o lau tagata fakasausau ki temi ki muli. Ti kua ke finegalo ke fakasa a nea ana ki se tagata, ei Aliki Eteleno !

²⁰ Kolea se tasi ake masau ke fai e Tavite kiate koe ? Talie e ke iloa lau tagata fakasausau ei Aliki Eteleno !

²¹ Kua ke fai a nea lalasi fuli ana, ti kua ke fakasa latou ki lau tagata fakasausau, o tupu ko lau folafola, mo mulimuli ki lou finegalo.

²² Koia e ke lasi ai, ei Eteleno Atua ! Talie e leaise tasi e tatau mo koe, ti e leaise tasi ake Atua kese iate koe, o mulimuli ki nea fuli kua logo ki ai omatou taliga.

²³ Pe ia se tasi ake puleaga i le malama nei e tatau mo lou kakai, ke faipe Iselaele, leia na au le Atua o totogi ke liliu ko lona kakai, ti ke logologona, ti ke fai kiate ia ni milakulo mo ni nea fakamanamana i lou fenua, o kapu ni puleaga mo olatou atua, i mua o lou kakai, leia na ke totogi mei Esipito ?

²⁴ Na ke fakamakeke lou kakai ko Iselaele, o tupu ke liliu a ia ko lou kakai o lee gato ; ti ko koe, ei Eteleno, kua ke liliu ko lona Atua.

²⁵ I le lakaga nei, ei Eteleno Atua, ke ke fakatuu ke tuu mau o kaku ki le lee gato le folafola leia kua ke fakasa ki lau tagata fakasausau mo lona fale, ti ke fai o mulimuli ki lau folafola.

²⁶ Ke fakakololia lou suafa o lee gato, ti ke pati : Ko le Eteleno o kau tau ko le Atua o Iselaele ! Ti ke makeke le fale o lau tagata fakasausau ko Tavite i ou mua !

²⁷ Talie ko koe totonu, ei Eteleno o kau tau, ko le Atua o Iselaele, kua ke fakasa ki lau tagata fakasausau, o pati : E kau lagai loa kiate koe se fale ! Koia kua loto makeke ai lau tagata fakasausau o fai kiate koe le kole lena.

²⁸ I le lakaga nei, ei Aliki Eteleno, ko le Atua a koe, ti e maoki au folafola, ti kua ke fakasa le kalasia lena ki lau tagata fakasausau.

²⁹ Koia ke ke alofa o tapuaki ki le fale o lau tagata fakasausau, o tupu ke tuu mau a ia i ou mua o lee gato ! Talie ko koe, ei Aliki Eteleno, kua ke masau, ti e tapuakina loa le fale o lau tagata fakasausau o lee gato, o tupu ko lau tapuaki.