Lua tosi a Samuele 5 - Tosi Tapu

Sau o Tavite ki Iselaele katoa ; lana nofo i Sione

¹ Na au loa a faasiga fuli o Iselaele kia Tavite i Epelone, o pati : Ko leinei, ko ou ivi mo lou kanofi matou.

² I le temi kua sili, le temi leia na sau ai Saulo kia matou, ko koe leia na taki ia mo aumai ia Iselaele. Na pati le Eteleno kiate koe : E ke fagai loa loku kakai ko Iselaele, ti e ke liliu loa ko le pule o Iselaele.

³ Koia na au loa le kau matua fuli o Iselaele kia Tavite i Epelone, ti na fai loa e le sau ko Tavite se sai mo latou i mua o le Eteleno. Na lotou pani lolo loa Tavite ko le sau o Iselaele.

⁴ Na fetuu kau tolu Tavite i le temi leia na fakanofo ke sau, ti na sau loa a ia i fetuu e kau fa.

⁵ Na sau loa a ia i Epelone ki Suta i fetuu e fitu mo masina e ono, ti na sau loa a ia i Selusalemi i fetuu e kau tolu ki Iselaele katoa mo Suta.

Selusalemi, kolo mua o le puleaga

⁶ Na saele loa le sau mo lana solia ki Selusalemi ki le kau Sepusi, le kakai o le fenua. Na lotou pati loa kia Tavite : E leaise ke ulu loa ki leinei, talie e kapu loa a koe e le kau kivi mo le kau kito ! Ko lona uiga : E leaise ulu loa Tavite ki leinei.

⁷ Kae na too loa e Tavite le kolo tau o Sione : ko le kolo o Tavite.

⁸ Na pati Tavite i le aso lena : Kapau e loto se tagata ke tamate le kau Sepusi, e tonu loa ke pale a ia kia latou i le kanale leia e ulu i le kele, o taai le kau kivi mo le kau kito ala ko fili o Tavite… Koia leia e pati ai : E leaise ulu loa le kivi mo le kito ki le fale o le Eteleno.

⁹ Na nofo loa Tavite i le kolo tau, leia na fakaigoa loa e ia ko le kolo o Tavite. Na toe laga foki e ia ni iki kolo tau i le takatakai o le kolo, i le vasa o Milo mo lona nofoaga.

¹⁰ Na liliu Tavite o asilisili makeke, ti na nofo mo ia le Eteleno, le Atua o kau tau.

Sai o Tavite mo Ilame

¹¹ Na kakau loa e Ilame, sau o Tile, ni tagata avelogo kia Tavite, mo ni laakau ko le sete, mo ni kau tufuga papa, mo ni kau tufuga fatu, ala na fakatuu ia loa se fale kia Tavite.

¹² Na iloa loa e Tavite kua fakamaoki a ia e le Eteleno ko le sau o Iselaele, ti kua lagai e ia lona puleaga o tupu ko lona kakai ko Iselaele.

Vosa o Tavite na tupu i Selusalemi

¹³ Na toe too foki e Tavite ni tinifu mo ni avaga i Selusalemi, i le oki o lana mavae mei Epelone, ti na toe tupu loa kiate ia ni vosa mo ni taineliki.

¹⁴ Ko nei a igoa o latou ala na tupu loa kiate ia i Selusalemi : Ko Samua, mo Sopape, mo Natane, mo Salomone,

¹⁵ mo Sipeale, mo Elisua, mo Nefeke, mo Safia,

¹⁶ mo Elisama, mo Eliata, mo Elifeleti.

Malo o Tavite i le kau Filisitini

¹⁷ Na logo loa le kau Filisitini kua fakanofo Tavite ko le sau o Iselaele, ti na lotou pale fuli loa ke taui a ia. Na iloa loa e Tavite le nea lena, ti na ifo loa a ia ki le kolo tau.

¹⁸ Na kaku mai loa le kau Filisitini, ti na lotou fakatuutuu tau loa i le vaivailiua o le kau Lefaimi.

¹⁹ Na afa loa e Tavite le finegalo o le Atua, o pati : Pe kau pale loa o taui le kau Filisitini ? Pe ke tuku mai loa latou ki oku lima ? Ti na pati loa le Eteleno kia Tavite : Pale, talie e kau tuku atu loa le kau Filisitini ki ou lima.

²⁰ Na au loa Tavite ki Paale-Pelatesimi, leia na taai loa latou e ia i ai, ti na pati loa a ia : Kua fakamavete e le Eteleno oku fili i oku mua, ofaipe ni vai e sali. Koia leia na soli ai ki le ganea lena le igoa ko Paale-Pelatesimi.

²¹ Na lotou tuku loa i ai olatou taulaatua, ti na ave loa latou e Tavite mo lana kau tau.

²² Na toe pale ake foki le kau Filisitini, ti na lotou fakatuutuu tau loa i le vaivailiua o Lefaimi.

²³ Na afa loa e Tavite le finegalo o le Eteleno. Ti na pati loa le Eteleno : E leaise ke pale loa ; au kia latou mei muli, ti e ke kaku mai loa kia latou o tautonu mo mulie.

²⁴ Ka ke logo loa ki le pakaka o se saele i tumutumu o mulie, ti ke fakatavili loa talie kua saele le Eteleno i ou mua o taui le solia a le kau Filisitini.

²⁵ Na fai loa e Tavite le nea leia na fakatotonu e le Eteleno kiate ia, ti na tamate loa e ia le kau Filisitini mei Kepa o kaku ki Kesele.