Lua tosi a Samuele 3 - Tosi Tapu

Le makeke o Tavite

¹ Na fai fualoa ai le tau i le fale o Saulo mo le fale o Tavite. Na fakaano ke makeke lasi Tavite, ti na fakaano ke gaegae le fale o Saulo.

² Na tupu loa kia Tavite ni vosa i Epelone. Ko lona uluaki ko Amone, kia Asinoame mei Siseleele ;

³ ko le lua ko Kileape, kia Apikaile mei Kalemelo, avaga a Napale ; ko le tolu ko Apesalone, kia Maaka, taine o Talemai, sau o Kesuli ;

⁴ ko le fa ko Atonisa, kia Akite ; ko le lima ko Sefatia, kia Apitale ;

⁵ ti ko le ono ko Siteleame, kia Ekela, avaga a Tavite. Ko latou ana na tupu kia Tavite i Epelone.

Fakatasi o Apenele mo Tavite ; lona tukipooi e Soape

⁶ I le lolotoga o le tau i le fale o Saulo mo le fale o Tavite, na tuu makeke loa Apenele ki le fale o Saulo.

⁷ Ti na i ai loa se fafine tinifu a Saulo, na igoa ko Lisepa, taine o Asa. Ti na pati loa Iseposete kia Apenele : Kolea na ke ano ai ki le avaga o loku tamana ?

⁸ Na ita veli loa Apenele i masau a Iseposete, ti na tali loa a ia : Pe ko se fa ulu au o se kuli, leia e gaoi totogi kia Suta ? Kua kau fakasa loku agamalie ki le fale o Saulo, lou tamana, o kaku mai ki le aso nei, ki ona fetaina mo ona kaiga, na leaise kau tuku a koe ki lima o Tavite, ti kua ke valoki au i le aso leinei, o tupu ko se sala mo le fafine lena ?

⁹ Ke tautea e le Atua a Apenele i lona makeke katoa, mo kapau e leaise kau fai kia Tavite o mulimuli ki le fakapapau a le Eteleno kia Tavite,

¹⁰ o pati : E siki loa e ia le puleaga mei le fale o Saulo ki le fale o Tavite, ti e fakatuu loa e ia le ekeekeaga fakasau o Tavite ki Iselaele mo Suta, mei Tane o kaku ki Peele-Sepa.

¹¹ Na leaise mafai loa ke tali Iseposete kia Apenele, talie na i a ia kiate ia.

¹² Na kakau loa e Apenele ni tagata avelogo kia Tavite, o pati kiate ia : Pe a ai le fenua ? Ke ke fai se sai mo au, ti ko leinei, e tokoi loa loku lima kiate koe, o fakamaliu kiate koe a Iselaele katoa.

¹³ Na tali loa Tavite : E malie ! E kau fai loa se sai mo koe ; kae e kau kole atu kiate koe le nea e tasi ke ke fai : E leaise ke tio loa ki oku mata mo kapau e leaise ke aumai kiate au i mua a Mikale, taine o Saulo.

¹⁴ Ti na kakau loa e Tavite ni tagata avelogo kia Iseposete, vosa o Saulo, ke pati kiate ia : Soli mai laku avaga ko Mikale, leia na kau totogi ki mui kilikili e kau lelau o le kau Filisitini.

¹⁵ Na kakau loa e Iseposete ke too Mikale mei lona avaga ko Paletiele, vosa o Laise.

¹⁶ Ti na mulimuli loa lona avaga iate ia, o tagi, o kaku ki Pasulimi. Ti na pati loa Apenele kiate ia : Ano, toe liliu ki lou kaiga ! Ti na toe liliu loa a ia.

¹⁷ Na fono loa Apenele mo le kau matua o Iselaele, ti na pati loa a ia kia latou : I le temi kua sili na kotou loto ke sau Tavite kia koutou ;

¹⁸ i le aso nei, kotou fakanofo la a ia ko le sau, talie kua folafola le Eteleno o uiga mo ia : I le lima o laku tagata fakasausau ko Tavite, e kau saofaki loa loku kakai mei le lima o le kau Filisitini mo le lima o ona fili fuli.

¹⁹ Na toe masau foki Apenele ki le kakai o Pesamino, ti na ano loa a ia o fakasa ki taliga o Tavite i Epelone le nea kua loto malie ki ai a Iselaele mo le fale katoa o Pesamino.

²⁰ Na kaku loa a ia kia Tavite i Epelone, mo se tino lua tagata ala na au mo ia, ti na fai loa e Tavite se kai lasi kia Apenele mo latou ala na au mo ia.

²¹ Na pati loa Apenele kia Tavite : E kau tuu loa ki aluga, ti e kau ano loa o fakatasii a Iselaele katoa ki loku aliki le sau ; e lotou fai loa se sai mo koe, ti e ke pule faifaitalisa loa ki le kakai katoa o mulimuli ki lou loto. Na kakau loa e Tavite a Apenele, leia na ano loa i le tokamalie.

²² Na leaise fualoa, ti na toe liliu mai loa Soape mo le kakai a Tavite mei se taka tau, o lotou nake loa mo se koloa tau lasi ai. Na leaise koi nofo loa Apenele mo Tavite i Epelone, talie kua kakau a ia e Tavite, ti kua ano a ia i le tokamalie.

²³ I le kaku mai a Soape mo lana solia katoa, na fakasa loa kiate ia le nea leinei : Na au Apenele, vosa o Nele, ki le sau, ti kua kakau a ia e le sau ke ano i le tokamalie.

²⁴ Na ano loa Soape ki le sau, o pati : Kolea le nea leinei kua ke aga o fai ? Ko leinei kua au Apenele kiate koe ; kolea kua ke tuku ai a ia ke ano ?

²⁵ E ke iloa malie Apenele, vosa o Nele ! Na au a ia o kakai a koe, mo lamalama au feanoaki, ti mo iloa a nea fuli e ke fai.

²⁶ Ti na mavae loa Soape meia Tavite, o kakau ni tagata avelogo i muli o Apenele, ti na lotou maua loa a ia ki le fa tane o Sila, o lotou toe fakaliliu loa a ia mei ai : Na leaise iloa fua e Tavite se nea.

²⁷ I le kaku mai a Apenele ki Epelone, na ave loa a ia e Soape ki se ganea kese i loto o le matapa o le kolo, ke masau fakafufu a ia kiate ia, ti na sukii loa e ia a Apenele ki se seleta i lona manava o mate ai, ke totogi ai le mate o Asaele, lona taina.

²⁸ Na logo loa Tavite ki le nea lena, ti na pati loa a ia : E kau mea malie mo loku puleaga i mua o le Eteleno, o lee gato, mei le toto o Apenele, vosa o Nele.

²⁹ Ke vilo le toto lena kia Soape mo le fale katoa o lona tamana ! Ke i ai tuumau se tasi i le fale o Soape, e masaki, pe liligi toto, pe kilia, pe saele mo se toko, pe mate i le seleta, pe mate pakupaku !

³⁰ Na tamate loa i ai e Soape mo lona taina ko Apisai a Apenele, o tupu na tamate e ia Asaele, lola taina, i le tau i Kapaone.

³¹ Na pati loa Tavite kia Soape mo le kakai katoa leia na nofo mo ia : Kotou sae okoutou kofu, kotou tui ni taga ti kotou tagi i mua o Apenele ! Ti na saele loa le sau ko Tavite i muli o le pusa o le mate.

³² Na tanu loa Apenele i Epelone. Na tagi leo lasi loa le sau i le tanuma o Apenele, ti na tagi loa le kakai katoa.

³³ Na fai loa e le sau se tagi laulau kia Apenele, o pati : Apenele, pe na tonu ke ke mate ofaipe se tagata tukipo ?

³⁴ Na leaise sai ou lima, ti na leaise piki ni tini i ou vae ! Kua ke vilo ofaipe le vilo i mua o ni tagata agaveli.

³⁵ Ti na toe fetagisi loa le kakai katoa kia Apenele. Na fakafeofi ake loa le kakai katoa kia Tavite o fakakolekole kiate ia ke kai e ia se nea kai koi ao ; kae na fakapapau loa Tavite, o pati : Ke tautea au e le Atua i lona makeke katoa, mo kapau e kau kai se pane pe ko se nea fua i mua o le galo o le laa !

³⁶ Na iloa loa le nea lena e le kakai katoa ti na lotou fakamaoki loa kiate ia, talie na lotou malie ia a nea fuli ala na fai e le sau.

³⁷ Na matala loa le kakai katoa mo Iselaele katoa i le aso lena na leaise fakatotonu e le sau ke tamate Apenele, vosa o Nele.

³⁸ Na pati loa le sau ki ana tagata fakasausau : Pe leaise kotou iloa kua puli i le aso nei i Iselaele se pule, se tagata lasi ?

³⁹ Koi kau gaegae i le aso nei, logo ai kua fakanofo au ko le sau ; ti e koi makeke ake iate au a fenua ana, ko vosa o Teselusa. Ke totogi e le Eteleno ki leia e fai ia le veli, o mulimuli ki lana agaveli !