Lua tosi a Samuele 24 - Tosi Tapu

Tosi o le kakai ; taumasaki i aso e tolu

¹ Na toe mu le sausau o le Eteleno ki Iselaele, ti na fakavelii loa e ia Tavite kia latou, o pati : Ano, ti ke lau pe toka fia Iselaele mo Suta.

² Ti na pati loa le sau kia Soape, leia na pule ki le solia ti na nofo i ona tafa : Ano i faasiga fuli o Iselaele, mei Tane o kaku ki Peele-Sepa ; lau le kakai, talie ke kau iloa pe toka fia lona lasi.

³ Na pati loa Soape ki le sau : Ke liuliuga e le Eteleno, lou Atua, le kakai o tua kau lelau, ti ke tio ki ai a mata o le sau, loku aliki ! Kae kolea kua loto ai le sau, loku aliki, ke fai le nea lena ?

⁴ Kae na tuu makeke loa le sau i le fakatotonu leia na soli e ia kia Soape mo pule o le solia ; ti na mavae loa Soape mo pule solia mei le sau, o fai le lau o le kakai o Iselaele.

⁵ Na lotou fakalaka loa i le Solotane, ti na lotou nonofo loa i Aloele, i le fetuu atamai o le kolo leia e tuu i loto malie o le vaivailiua o Kate, ofi ki Saesele.

⁶ Na lotou ano loa ki Kalaate mo le fenua o Tasetimi-Otesi. Na lotou ano loa ki Tane-Saane, mo tafatafa o Sitone.

⁷ Na lotou ano loa ki le kolo tau o Tile, mo kolo fuli o le kau Evi mo le kau Kanaane. Na lotou fakaoki loa ki le potu saute o Suta, i Peele-Sepa.

⁸ Na lotou folii fenaaki loa le fenua katoa, ti na lotou kaku mai loa ki Selusalemi i le sili o masina e iva mo aso e kau lua.

⁹ Na tuku loa e Soape ki le sau le lasi o le kakai : Na maua loa i Iselaele ni kau tagata tau e tino lelau afe valu, na too seleta ; ti mo kau tagata e tino lelau afe lima i Suta.

¹⁰ Na logoi loa e Tavite le ta o lona mafu i le oki o le lau o le kakai. Ti na pati loa a ia ki le Eteleno : Kua kau fai se agasala lasi i le nea leinei kua fai ! Ti ko leinei, ei Eteleno, ke ke alofa o fakamolemole le agasala a lau tagata fakasausau, talie kua kau fai se nea fakavale !

¹¹ I leia ake a aso, i le ala ake a Tavite, na tuku loa le folafola a le Eteleno kia Kate, le polofeta, tagata tokoi a Tavite :

¹² Ano o pati kia Tavite : Ko leinei le masau a le Eteleno : E kau tuku atu kiate koe a tautea e tolu ; ke ke filifili loa se tautea e tasi, ti e kau taai loa a koe ki ai.

¹³ Na ano loa Kate kia Tavite, ti na fakasa loa e ia kiate ia le nea lena, o pati : Pe ke loto ki ni fetuu oge e fitu i lou fenua, pe ko ni masina e tolu e ke sola ai loa i mua o ou fili ala e tuli ia loa a koe, pe ko ni aso taumasaki veli e tolu i lou fenua ? I le lakaga nei ke ke filifili, ti ke ke tio pe kolea le nea e tonu ke kau tali loa ki leia na kakau ia mai au.

¹⁴ Na tali loa Tavite kia Kate : E kau nofo i se i lasi ai ! Oi ! Ke tou vilo ki lima o le Eteleno, talie e lasi ai lona manava alofa ; kae ke aua na kau vilo ki lima o tagata !

¹⁵ Na tuku loa e le Eteleno ki Iselaele le taumasaki, mei le usu o kaku ki le temi leia na fakatuutuu ki ai ; mei Tane ki Peele-Sepa, na mamate loa le tino fitu afe tagata i le kakai.

¹⁶ I le mafao o le lima o le aselo ke maumaui a Selusalemi, na fakasemala loa le Eteleno ki le veli lena, ti na pati loa a ia ki le aselo leia na tamate ia le kakai : Kua feauga, taofi lou lima i le lakaga nei. Na ofi le aselo o le Eteleno ki le sasaaga fulumeto a Alavana, tagata Sepusi.

¹⁷ I le tio a Tavite ki le tamate e le aselo o le kakai, na pati loa a ia ki le Eteleno : Ko leinei, kua kau agasala ! Ko au leia e sala ; kae ko ovi ana, kolea le nea na lotou fai ? Ke vilo lou lima kiate au mo le fale o loku tamana !

Sakilifisio a Tavite

¹⁸ I le aso lena, na au loa a Kate kia Tavite, o pati kiate ia : Pale, ti ke fakatuu se aletale ki le Eteleno, i le faisaga a Alavana, tagata Sepusi.

¹⁹ Na pale loa Tavite, o mulimuli ki le masau a Kate, o mulimuli ki le nea leia na fakatotonu e le Eteleno.

²⁰ Na siki ake loa a mata o Alavana, ti na tio loa a ia ki le au o le sau mo ana tagata fakasausau kiate ia ; ti na ulu loa Alavana ki fafo, o punou ki le kele i mua o le sau.

²¹ Na pati loa Alavana : Kolea kua au ai loku aliki le sau ki lana tagata fakasausau ? Ti na tali loa Tavite : Ke totogi lau faisaga ke fakatuu ai se aletale ki le Eteleno, o tupu ke taofi le malaia i le kakai.

²² Na pati loa Alavana kia Tavite : Ke too e le sau loku aliki le faisaga, ti ke momoli e ia i ai le sakilifisio leia e loto ki ai ; tio, ko nei aku pipi kua fakalogo atu loa ki le failaulau, ti kua fakalogo atu loa a saliote ki le fafie.

²³ Na soli loa e Alavana a nea fuli ki le sau. Ti na pati loa Alavana ki le sau : Ke tali malie lau failaulau e le Eteleno, lou Atua !

²⁴ Kae na pati loa le sau kia Alavana : Leai ! e kau loto ke totogi paaga latou kiate koe, ti e leaise kau momoli loa ki le Eteleno, loku Atua, se failaulau leia e leaise kau totogi ki se nea. Ti na totogi loa e Tavite le faisaga mo pipi ki fa sikele paaga e kau lima.

²⁵ Na fakatuu loa e Tavite se aletale ki le Eteleno i le ganea lena, ti na momoli loa e ia ni failaulau mo ni sakilifisio fakafetai. Ti na fimalie loa le Eteleno ki le fenua, ti mavae loa le malaia i Iselaele.