Lua tosi a Samuele 23 - Tosi Tapu

Masau fakamuli a Tavite

¹ Ko nei a masau fakamuli a Tavite. Folafola a Tavite, vosa o Isaia, Folafola a le tagata leia na siki ki se tuulaga taualuga, A le filifiliia a le Atua o Sakopo, A le tagata sua malie o Iselaele.

² E masau le Laumalie o le Eteleno iate au, Ti e teki lana folafola i loku alelo.

³ Na masau le Atua o Iselaele, Na pati mai kiate au le utu o Iselaele : Ko leia e pule ki le kakai i le faitotonu, Ko leia e pule i le fakaapaapa ki le Atua,

⁴ E tatau a ia mo le malama o le usu, mo ka sopo ake le laa, Ti e leaise aoaoa le lagi i le pogipogi usu ; E fakasosomo ake e lona malama le vao mei le kele, i le oki o le ua.

⁵ Pe leaise fenaaki loku fale i mua o le Atua, Talie kua fai e ia mo au se sai lee gato, Leia kua fakatuutuu ona lekula fuli ke taupau ia a ia ? Pe leaise fakasomo loa e ia loku fakamauli katoa mo oku oli fuli ?

⁶ Kae e tatau le kau agaveli fuli mo ni laakau talatala ala e tiaki, Ti e leaise too ki le lima ;

⁷ Ko leia e fafa kia latou e tonu ke too e ia se ukamea pe ko se laakau loa, Ti e tutu e ia latou ki le afi i le ganea lena.

Tagata toa a Tavite

⁸ Ko nei a igoa o tagata toa ala na tausi kia Tavite. Ko Sosepe-Pasepete, mei Akemoni, ko se tasi o le kau pule lalasi. Na oso a ia mo lana tao ki ni kau tagata e tino lelau valu, ti na tamate e ia latou i se temi e tasi.

⁹ Na soa kiate ia Eleasale, vosa o Toto, vosa o Akoki. Ko se tasi a ia o le toka tolu leia na kau mo Tavite, o taui le kau Filisitini, ala na fakatasi ki le tau, kae kua solomuli a tagata o Iselaele ki le mauga.

¹⁰ Na tuu makeke loa a ia i aluga, o tamate le kau Filisitini, o kaku ki le mate noa o lona lima leia na pipiki mau aifai ki lana seleta. Na fai loa e le Eteleno se saofaki lasi ki Iselaele i le aso lena. Na toe liliu mai loa le kakai i muli o Eleasale, o tae fua a koloa.

¹¹ Na soa kiate ia a Sama, vosa o Ake, mei Alale. Na fakatasi le kau Filisitini i Lesi. Na tuu i le ganea lena se potu faisaga na apele i le lenitili ; ti na sosola le kakai i mua o le kau Filisitini.

¹² Na tuu loa a Sama i loto malie o le faisaga, o malui a ia, ti na tamate loa e ia le kau Filisitini. Ti na fai loa e le Eteleno se saofaki lasi.

¹³ Na ifo loa se toka tolu o le kau pule lalasi e tino tolu i le temi tuuti o le fulumeto kia Tavite i le ana o Atulami, kae na nofo se solia Filisitini i le vaivailiua o le kau Lefaimi.

¹⁴ Ti na nofo Tavite i lona kolo tau, kae na i ai se koga o le solia Filisitini i Peteleemi.

¹⁵ Na maua loa e Tavite se oli, ti na pati loa a ia : Ko ai leia ka fakainu ia loa au ki le vai o le fa tane leia e tuu i le matapa o Peteleemi ?

¹⁶ Ti na fakalaka loa a tagata toa ana e toka tolu i le nofolaga o le kau Filisitini, o asu se vai mei le fa tane leia na tuu i le matapa o Peteleemi. Na lotou aumai loa a ia o soli kia Tavite ; kae na leaise loto Tavite ke inu a ia, ti na liligi loa e ia a ia i mua o le Eteleno.

¹⁷ Na pati loa a ia : Ke mamao iate au, ei Eteleno, le inu o le vai leinei ! Pe kau inu loa le toto o tagata anei na ano o soli olatou mauli ? Ti na leaise loto a ia ke inu a ia. Ko lena le nea na fai e tagata toa ana e toka tolu.

¹⁸ Ko Apisai, taina o Soape, vosa o Teselusa, ko le pule a ia o le toka tolu lena. Na oso loa a ia mo lana tao ki tagata e tino lelau tolu, ti na tamate loa e ia latou ; ti na logologona a ia i le toka tolu lena.

¹⁹ Na tuu mua loa a ia ia latou toka tolu, ti na pule loa a ia kia latou ; kae na leaise tatau loa a ia mo le uluaki toka tolu.

²⁰ Ko Penasa, vosa o Seosata, vosa o se tagata mei Kapiteseele, na mauiga mo logologona i ana nea lalasi. Na tamate loa e ia a laione e lua o Moape. Na ifo loa a ia ki loto o se fa tane, ti na tamate loa e ia i ai se laione, i se aso nive.

²¹ Na tamate loa e ia se tagata Esipito, leia na mata fakaii, ti na too ia se tao i lona lima ; na ifo loa a ia ki le tagata lena mo se laakau, ti na tatai loa e ia le tao mei le lima o le tagata Esipito, o tamate a ia ki ai.

²² Ko lena le nea leia na fai e Penasa, vosa o Seosata ; ti na logologona a ia i le tino tolu.

²³ Na mauiga lasi a ia i le tino tolu. Kae na leaise tatau a ia mo le uluaki toka tolu. Na too loa a ia e Tavite ke kau i lana kau fono.

²⁴ Ko Asaele, taina o Soape, na kau i le tino tolu. Ko Elesanane, vosa o Toto, mei Peteleemi.

²⁵ Ko Sama, mei Alote. Ko Elika, mei Alote.

²⁶ Ko Eletesi, mei Peleti. Ko Ila, vosa o Ikese, mei Tekoa.

²⁷ Ko Apiesele, mei Anatote. Ko Mepunai, mei Usa.

²⁸ Ko Tesalome, mei Akoasi. Ko Maalai, mei Netofa.

²⁹ Ko Elepe, vosa o Paana, mei Netofa. Ko Itai, vosa o Lipai, mei Kipea o vosa o Pesamino.

³⁰ Ko Penasa, mei Pilatoni. Ko Itai, mei Nasale-Kase.

³¹ Ko Api-Alepone, mei Alapa. Ko Asemavete, mei Palesume.

³² Ko Eliasapa, mei Salepone. Ko Pene-Sasene. Ko Sonatane.

³³ Ko Sama, mei Alale. Ko Asiame, vosa o Salale, mei Alale.

³⁴ Ko Elifeleti, vosa o Akasepai, vosa o se tagata Maaka. Ko Eliame, vosa o Asitofele, mei Kilo.

³⁵ Ko Etelai, mei Kalemelo. Ko Paalai, mei Alape.

³⁶ Ko Sikeale, vosa o Natane, mei Tesopa. Ko Pani, mei Kate.

³⁷ Ko Teseleke, tagata Amone. Ko Natalai, mei Peeloti, leia na amo ia a masafu a Soape, vosa o Teselusa.

³⁸ Ko Ila, mei Setele. Ko Kalepe, mei Setele.

³⁹ Ko Uli, tagata Eti. Na lotou fakatasi fuli ko le tino tolu tupu fitu.