Lua tosi a Samuele 22 - Tosi Tapu

Katiko o le saofaki a Tavite

¹ Na fai loa e Tavite ki le Eteleno le katiko leinei i le oki o le aga a le Eteleno o saofaki a ia mei ona fili fuli mo Saulo.

² Na pati loa ia : Ko le Eteleno ko loku utu, loku kolo tau, loku fakamauli.

³ Ko le Atua ko loku utu, leia e kau maua ai se fakamalumaluaga, Ko loku paletau mo le makeke leia e saofaki ia au, Ko loku maloloaga taualuga mo loku kolo ulufaga. Ei loku Fakamauli ! e ke puipui au mei le fakamakeke.

⁴ E kau kalaga : Ke fakavikiviki ki le Eteleno ! Ti e saofaki au mei oku fili.

⁵ Talie na takatakai au e galu o le mate, Na fakaii mai kiate au a vaitafe o le maumau ;

⁶ Na fui au e maea o le nofoaga o le kau mate, Na mautoka au e kupega o le mate.

⁷ I loku mamae, na kau kalaga ki le Eteleno, Na kau kalaga ki loku Atua ; Mei lona fale sau, na logo a ia ki loku leo, Ti na fia logo ona taliga ki laku kalaga.

⁸ Na gatuu loa le kele mo galulu, Na taugaoi loa a fakatafito o le lagi, Ti na lotou galulu loa, talie na ita a ia.

⁹ Na malaga loa se afu mei ona pogoisu, Ti na ulu loa se afi kaka mei lona gutu : Na mapuna loa mei ai ni malala ulaula.

¹⁰ Na tuku loa e ia le lagi ki lalo, ti na ifo loa a ia : Na i ai se kokofu matotolu i ona vae.

¹¹ Na eke a ia i se selupino, ti na lele a ia, Na sa a ia i aluga o kapakau o le matagi.

¹² Na fai e ia ki le fakapouli se falela ke tuu takatakai iate ia, Na takatakai a ia e ni vai mo ni ao matotolu.

¹³ Mei le malama gigila leia na ano i ona mua, na mafitifiti ni malala ulaula.

¹⁴ Na fakagugulu loa e le Eteleno lana mana mei le lagi, Na fakagugulu loa e le Taualuga lona leo ;

¹⁵ Na fana loa e ia ni gasau, o fakamavete oku fili, Na fakato loa e ia le fatuliki, o lotou fesolaki ai.

¹⁶ Na sa loa le takele o le moana, Na sa loa a fakatafito o le malama nei, I le valoki a le Eteleno, I le logoa o le tukumanava o ona pogoisu.

¹⁷ Na falo mai loa e ia lona lima mei aluga, o too au, Ti na too loa e ia au mei galu lalasi ;

¹⁸ Na saofaki loa e ia au mei oku fili makeke, Mei oku fili ala na makeke ake iate au.

¹⁹ Na lotou fakamauatoka au i le aso o loku mamae, Kae na liliu loa le Eteleno ko loku tokoi.

²⁰ Na tuku loa e ia au ki le lauatea, Na saofaki loa e ia au, talie e alofa a ia kiate au.

²¹ Na totogi au e le Eteleno o mulimuli ki loku agatonu, Na totogi e ia au o mulimuli ki le mea o oku lima ;

²² Talie na kau tausi a ala o le Eteleno, Ti na leaise kau agasala ki loku Atua.

²³ Na tuu ana fakatotonu fuli i oku mua, Ti na leaise kau maliu kese fua mei ana lao.

²⁴ Na leaise kau sala fua kiate ia, Ti na kau nofo tokaga ki laku agaveli.

²⁵ Koia na totogi ai au e le Eteleno o mulimuli ki loku agatonu, O mulimuli ki loku mea i ona mua.

²⁶ Eteleno, e ke agamalie ki leia e agamalie, Ti e ke agatonu ki leia e agatonu,

²⁷ Ki leia e mea, e ke fakasa kiate ia e ke mea, Ti ki leia e aga fakapikopiko, e ke gaoi o mulimuli ki lona aga pikopiko.

²⁸ E ke saofaki le kakai leia e fakamamae, Ti e tuku ki lalo e ou mata latou ala e fia nealasi.

²⁹ Io, ko koe ko loku malama, ei Eteleno ! E fakamalamai e le Eteleno oku fakapouli.

³⁰ Fakatasi mo koe e kau osoi se solia kua teu ki masafu, Fakatasi mo loku Atua, e kau kava ki aluga o se kaua.

³¹ E saosaoa a ala o le Atua, Kua asiasii le folafola a le Eteleno ; Ko se paletau a ia kia latou fuli ala e fanaki kiate ia.

³² Talie ko le toka tasi e Atua, ko le Eteleno ! Ti ko le toka tasi ko se utu, ko lotatou Atua !

³³ Ko le Atua leia ko loku kolo tau, Ti e fakalauatea ia le ala i oku mua.

³⁴ E fakaliliu e ia oku vae o tatau mo vae o le tia, Ti e fakaeke e ia au ki oku ganea taualuga.

³⁵ E ako e ia oku lima ki le tau, Ti e fafao e oku lima le kalolo kapa.

³⁶ E ke soli mai kiate au le paletau o lau fakamauli, Ti e kau liliu o lasi i lou agamalie.

³⁷ E ke fakalaulasi le ala i oku lakaaga, Koia e leaise siga ai oku vae.

³⁸ E kau tuli oku fili, ti e kau maumaui latou ; E leaise kau toe liliu mai kae e leikiaise kau malo ia latou.

³⁹ E kau taai latou, e kau fatifatii latou, ti e leaise lotou toe tutuu ki aluga ; E lotou sisiga i oku vae.

⁴⁰ E ke tuku mai kiate au le makeke ki le tau, E ke peluki i oku lalo oku fili.

⁴¹ E ke fakasosola oku fili i oku mua, Ti e kau tamate latou ala e vesia kiate au.

⁴² E lotou tio saele ki olatou tafatafa, ti e leaise tasi leia ke saofaki ia latou ! E lotou kalaga ki le Eteleno, ti e leaise tali a ia kia latou !

⁴³ E kau gugu latou ofaipe le efu o le kele, E kau takatakafi latou ofaipe le pela o ala.

⁴⁴ E ke saofaki au mei le fetauaki o loku kakai ; E ke taupau au ko le pule o atu puleaga ; E tausi kiate au se kakai leia na leaise kau iloa.

⁴⁵ E viki au e vosa o le matapule, E lotou fakalogo kiate au i le uluaki fakatotonu.

⁴⁶ E nofo i le i a vosa o le matapule, E lotou lulu i fafo o olatou kolo tau.

⁴⁷ E mauli le Eteleno, ti ke manuia loku utu ! Ke siki le Atua, le utu o loku fakamauli,

⁴⁸ Le Atua leia e totogi ia kiate au, Leia e fakapopula ia a kakai kiate au,

⁴⁹ Ti e fakasao ia au mei oku fili ! E ke siki au ki aluga o oku fili, E ke saofaki au mei le tagata itaita.

⁵⁰ Koia e kau fakavikiviki loa kiate koe i lotolotoga o atu puleaga, ei Eteleno ! Ti e kau sua loa ki le kololia o lou suafa.

⁵¹ E soli e ia ni saofaki lalasi ki lona sau, Ti e fakasa e ia lona manava alofa ki lona filifiliia, Kia Tavite, mo lona sakoga, o lee gato.