Lua tosi a Samuele 21 - Tosi Tapu

Taui o le kau Kapaone

¹ I le temi o Tavite, na i ai loa se oge leia na fetuu tolu lona fualoa. Na afa loa e Tavite a mata o le Eteleno, ti na pati loa le Eteleno kiate ia : Kua soko le nea a ia, o tupu ko le tukipo a Saulo mo lona famili, i le tamate e Saulo le kau Kapaone.

² Na kalagai loa e le sau le kau Kapaone ke masau kia latou. - Na leaise kau le kau Kapaone ki fanau a Iselaele, kae ko se toetoega latou a le kau Amole ; na sai kia latou a fanau a Iselaele e se fakapapau, kae na loto Saulo ke tamate latou i lona fia tausi malie ki fanau a Iselaele mo Suta. -

³ Na pati loa Tavite ki le kau Kapaone : Kolea le nea e feala ke kau fai kia koutou, ti e kau fai loa kilea le fakamolemole, o tupu ke kotou tapuaki loa ki le kakai a le Eteleno ?

⁴ Na tali loa le kau Kapaone kiate ia : E leaise tupu ko se aulo pe ko se paaga e motou tokaveli ai mo Saulo ti mo lona famili ; ti e leaise tupu ko matou e mate ai se tasi o Iselaele. Ti na pati loa le sau : Kolea loa le nea e kotou loto ke kau fai loa kia koutou ?

⁵ Na lotou tali loa ki le sau : Talie na maumaui matou e le tagata lena ti na fakatuutuu e ia ke fakapuli lomatou kakai mei le fenua katoa o Iselaele,

⁶ ke tuku mai kia matou ni tagata e toka fitu i lona sokoga ti e motou tautau loa latou i mua o le Eteleno i Kipea o Saulo, le filifiliia a le Eteleno. Ti na pati loa le sau : E kau tuku atu loa latou.

⁷ Na fakamauli loa e le sau a Mefiposete, vosa o Sonatane, vosa o Saulo, o tupu ko le fakapapau leia na fai i mua o le Eteleno e Tavite mo Sonatane, vosa o Saulo.

⁸ Kae na too loa e le sau a vosa e lua ala na fanaui kia Saulo e Litesipa, taine o Asa, ko Alemoni mo Mefiposete, mo vosa e toka lima o Melape, taine o Saulo, kia Ateliele, vosa o Palesilai mei Meola ;

⁹ ti na tuku loa e ia latou ki lima o le kau Kapaone, ala na tautau ia loa latou i aluga o le mauga i mua o le Eteleno. Na lotou mamate fakatasi fuli toka fitu ; na tamate latou i uluaki aso o le tuuti o le fulumeto, i le kamataaga o le tuuti o le olese.

¹⁰ Na too loa e Litesipa, taine o Asa, se taga o folasi i aluga o le fatu ti na nofo loa a ia i ai, mei le kamataaga o le tuuti o le fulumeto o kaku ki le to o ua ki tino o latou ala na tautau ; ti na leaise tuku loa e ia ke fakafeofi a manu lele o le lagi ki tino mate i le ao, ti na kapu loa e ia a manu o le vao i le pouli.

¹¹ Na fakamatala loa kia Tavite le nea leia na fai e Litesipa, taine o Asa, avaga o Saulo.

¹² Ti na ano loa Tavite o aumai a ivi o Saulo mo ivi o Sonatane lona vosa, mei le kakai o Sapesi i Kalaate, ala na too ia latou mei le ganea ko Pete-Sani, leia na tautau ai laua e le kau Filisitini, i le aso leia na lotou taai ai Saulo i le tau i Kilipoa.

¹³ Na aumai loa e Tavite mei Sapesi i Kalaate a ivi o Saulo mo ivi o Sonatane ; ti na toe aumai foki e ia mo ivi o latou ala na tautau.

¹⁴ Na tanu loa a ivi o Saulo mo lona vosa i le fenua o Pesamino, i Tesela, i le tanuma o Kise, tamana o Saulo. Ti na fai loa a nea fuli ala na fakatotonu e le sau. I le oki o le nea lena, na fimalie loa le Atua ki le fenua.

Tau fakaoki ki le kau Filisitini

¹⁵ Na toe taui loa e le kau Filisitini a Iselaele. Na ifo loa Tavite mo ana tagata fakasausau, o lotou taui loa le kau Filisitini. Ti na fakaano loa ke gaegae Tavite.

¹⁶ Ti na manatu loa Sisepi-Penope, ko se tasi o fanau o Lafa, ke tamate Tavite ; na nofo a ia mo se tao sila na kilo tolu lona mamafa, ti na tau i lona fetuu se seleta foou.

¹⁷ Kae na au loa Apisai, vosa o Teselusa, o tokoi kia Tavite, ti na taai loa e ia le Filisitini o mate. Ti na fakapapau loa le kakai a Tavite, o pati kiate ia : E leaise ke toe ano loa mo matou o tau, ti e leaise tamate loa le malama tutu o Iselaele.

¹⁸ Na toe soko foki, i le oki o le nea lena, se tasi a tau i Kope mo le kau Filisitini. Ti na tamate loa e Sipekai, tagata Usatite, a Safo leia ko se tasi o fanau a Lafa.

¹⁹ Na toe soko foki se tasi a tau i Kope mo le kau Filisitini. Ti na tamate loa e Elesanane, vosa o Saale-Olekimi, mei Peteleemi, a Koliate mei Kate, leia na nofo mo se tao na tatau mo se laakau a le tagata lalaga kie.

²⁰ Na toe fai foki se tasi ake a tau i Kate. Na kau loa i ai se tagata taualuga, leia na maikao ono ona lima taki tasi mo ona vae taki tasi, ti na au foki a ia mei Lafa.

²¹ Na vesilii loa e ia Iselaele ; ti na tamate loa a ia e Sonatane, vosa o Simea, taina o Tavite.

²² Ko tagata ana e toka fa ko ni fanau a Lafa i Kate. Na lotou mamate loa i le lima o Tavite mo le lima o ana tagata fakasausau.