Lua tosi a Samuele 20 - Tosi Tapu

Mate o Sepa ; tamate o Amasa e Soape

¹ Na nofo i lena se tagata agaveli, na igoa ko Sepa, vosa o Pikili, ko se tagata o Pesamino. Na pupusi loa e ia le fakatagi pupusi, o pati : E leaise motou kau loa kia Tavite, e leaise nea fua leia e motou fakatasi ai mo le vosa o Isaia ! Ke kotou tasi ano ki lona falela, kakai o Iselaele !

² Ti na fakamamao loa a tagata fuli o Iselaele meia Tavite, o muli loa ia Sepa, vosa o Pikili. Kae na agatonu loa a tagata o Suta ki lolatou sau ti na lotou aumai loa a ia mei le Solotane o kaku ki Selusalemi.

³ Na ulu loa Tavite ki lona fale sau i Selusalemi. Na too loa e le sau ana fafine tinifu e tino agafulu ala na tuku e ia ke leoleo ia le fale sau, ti na tuku loa e ia latou ki se ganea leia na leo ; na tokaga loa a ia ki nea ala na aoga kia latou, kae na leaise toe ano loa a ia kia latou. Ti na fakamau loa e ia latou i ai o kaku ki lolatou mamate, ti na lotou mauli loa ofaipe ni lokonui.

⁴ Na pati loa le sau kia Amasa : Fakatasii mai kiate au i leinei a tagata o Suta ; e kau tuku atu a aso e tolu kiate koe, ti ko koe, ke ke au mo latou.

⁵ Na ano loa Amasa, o tanaki mai a tagata o Suta, kae na fakalaka loa a ia i le temi leia na fakatotonu ki ai e le sau.

⁶ Na pati loa Tavite kia Apisai : E lasi ake loa i le veli leia na fai e Apesalone le veli leia ka fai loa kia tatou e Sepa, vosa o Pikili. Too e koe totonu a tagata fakasausau a lou pule, ti ke tuli a ia, talie na maua e ia ni kolo tau, ti ke sao loa a ia ia tatou.

⁷ Ti na ano loa Apisai mo tagata a Soape, mo le kau Keleti, mo le kau Peleti, ti mo tagata toa fuli ; na lotou mavae loa mei Selusalemi o tuli a Sepa, vosa o Pikili.

⁸ I le temi leia na lotou ofi ai loa ki le fa fatu lasi i Kapaone, na kaku mai loa Amasa kia latou. Na piki le seleta a Soape i ona teu ; na tuii le seleta i lona tuiaga o sai i lona vakavaka, ti na saele loa Soape o fakafelavei kia Amasa.

⁹ Na pati loa Soape kia Amasa : Pe ke malie fai, ei loku taina ? Ti na fa loa lona lima atamai ki le kaukava o Amasa ke sogi kiate ia.

¹⁰ Na leaise tokaga loa Amasa ki le seleta leia na too e le lima o Soape ; ti na sukii loa a ia e Soape i lona manava, ti na maluku ai loa ona vava ki le kele, ti na leaise toe sukii tua lua loa e ia. Ti na mate ai loa Amasa. Na ano loa Soape mo lona taina ko Apisai, o tuli a Sepa, vosa o Pikili.

¹¹ Na nofo loa se tagata i le solia a Soape i tafa o Amasa, ti na pati a ia : Ko ai e kau kia Soape ti ko ai e kau kia Tavite ? Ke muli a ia ia Soape !

¹² Na moe Amasa i lona toto i loto malie o le ala ; i le tio a le tagata lena kua tutuu le kakai katoa, na tulei loa e ia Amasa ki tafa o le ala ki se faisaga, ti na uufi loa e ia a ia ki se taupulupulu.

¹³ I le oki o le too o Amasa mei le ala, na muli loa le solia katoa ia Soape o tuli a Sepa, vosa o Pikili.

¹⁴ Na fakalaka loa Soape i faasiga fuli o Iselaele, o fakaaga ki Apele-Pete-Maaka, ti na fakatasi loa tagata toa fuli o muli iate ia.

¹⁵ Na lotou ano loa, o takatakai le kolo leia na nofo ai a Sepa ke lotou taui ; na lotou fai loa ni palepale o kaku ki aluga o le paa. Na tege loa e le kakai katoa leia na nofo mo Soape le paa o le kolo ke solo.

¹⁶ Ti na kalaga loa se fafine poto mei le kolo : Kotou fakalogo mai, kotou fakalogo mai ! E kau kole atu kia koutou ke kotou pati kia Soape : Fakafeofi mai ki leinei, e kau fia masau mo koe !

¹⁷ Na fakafeofi ake loa Soape kiate ia, ti na pati loa le fafine : Ko Soape a koe ? Na tali loa a ia : Ko au. Ti na pati loa le fafine kia Soape : Fakalogo mai ki masau a lau fafine fakasausau. Na tali loa Soape : E kau fakalogo atu.

¹⁸ Ti na pati loa le fafine : I mago na pati masani : Ke afa kia Apele ! Ti na fakaoki fenaaki a nea fuli.

¹⁹ Ko le kolo leinei, ko se kolo e kau ki kolo tokamalie mo agatonu o Iselaele ; ti e ke afa ke ke tamate se kolo leia ko se tinana i Iselaele ! Kolea ka ke maumaui ai loa le tofiga o le Eteleno ?

²⁰ Na tali loa Soape : E mamao ai, e mamao ai iate au le manatu ke maumaui mo tamate !

²¹ E leaise fenaaki laku manatu. Kae ko se tagata mei le mauga o Efalaimi, e igoa ko Sepa, vosa o Pikili, kua siki lona lima ke agatuu ki le sau ko Tavite ; ke kotou tuku mai a ia, a ia toka tasi, ti e kau fakamamao loa mei le kolo. Na pati loa le fafine kia Soape : Ko leinei, e ti atu loa kiate koe lona fa ulu i aluga o le kaua.

²² Na ano loa le fafine ki le kakai mo lana manatu poto, ti na lotou tuuti loa le ua o Sepa, vosa o Pikili. Na lotou ti loa a ia kia Soape. Ti na pupusi loa e Soape le fakatagi pupusi ; ti na mavete loa o mamao mei le kolo, o tasi ano loa le tagata ki lona falela. Ti na toe liliu loa Soape ki Selusalemi, ki le sau.

²³ Na pule Soape ki le solia katoa a Iselaele ; na pule Penasa, vosa o Seosata, ki le kau Keleti mo le kau Peleti ;

²⁴ Na pule Atolame ki tukusau ; na pule Sosafate, vosa o Asilute, ki tosi o le puleaga ;

²⁵ Na sekalaipe a Sesa ; na tagata faisakilifisio a Satoke mo Apiatale ;

²⁶ ti na uluaki minisi a Ila mei Saili kia Tavite