Lua tosi a Samuele 2 - Tosi Tapu

Tavite, sau o Suta

¹ I le oki o le nea lena, na afa loa e Tavite le finegalo o le Atua, o pati : Pe kau pale loa ki se kolo i kolo o Suta ? Na tali loa le Eteleno kiate ia : Pale. Na pati loa Tavite : E kau pale loa kifea ? Ti na tali loa le Eteleno : Ki Epelone.

² Na pale loa Tavite ki ai, mo ana avaga e lua ko Asinoame mei Siseleele, mo Apikaile mei Kalemelo, avaga o Napale.

³ Ti na pale foki mo Tavite a kau tagata ala na nonofo mo ia, mo olatou famili taki tasi ; ti na lotou nonofo loa i kolo o Epelone.

⁴ Na au loa a kau tagata o Suta, o fakanofo Tavite ke sau ki le fale o Suta i Epelone. Na fakasa loa kia Tavite ko le kakai o Sapesi i Kalaate leia na tanu ia Saulo.

⁵ Ti na kakau loa e Tavite ni tagata avelogo ki le kakai o Sapesi i Kalaate, ke pati kia latou : Ke tapuaki le Eteleno kia koutou, talie na kotou fakasa lokoutou agamalie kia Saulo, lokoutou pule, ti na kotou tanu a ia.

⁶ Koia ke alofa le Eteleno o fakasa lona agamalie mo lona agatonu kia koutou, i le aso nei. Ko au foki, e kau fai loa kia koutou le nea e malie, talie kua kotou fai le nea e malie.

⁷ Ke fakamakeke loa okoutou lima, ti ke kotou loto toa ; kua mate lokoutou pule ko Saulo, ti ko au leia kua fakanofo foki e le fale o Suta ke sau kia latou.

Iseposete, sau o Iselaele

⁸ Kae na too loa e Apenele, vosa o Nele, pule o le solia a Saulo, a Iseposete, vosa o Saulo, o ave ki Maanaimi.

⁹ Ti na fakanofo loa e ia a ia ke sau ki Kalaate, mo Asele, mo Siseleele, mo Efalaimi, mo Pesamino, mo Selusalemi katoa.

¹⁰ Na fetuu kau fa Iseposete, vosa o Saulo, i le temi leia na fakanofo ai ko le sau o Iselaele, ti na sau a ia i fetuu e lua. Na gato fai ki le fale o Suta na nofo loa o pipiki kia Tavite.

¹¹ Ko le fualoa o le temi na sau ai Tavite i Epelone ki le fale o Suta ko fetuu e fitu mo masina e ono.

Tau a Suta mo Iselaele

¹² Na ano loa Apenele, vosa o Nele, mo le kakai a Iseposete, vosa o Saulo, mei Maanaimi, ke saele ki Kapaone.

¹³ Ti na saele foki Soape, vosa o Teselusa, mo le kakai a Tavite. Na lotou felavei loa o ofi ki le vai o Kapaone, ti na lotou nonofo loa, ko iki i le tasi fetuu o le vai, ti ko la i leia ake fetuu o le vai.

¹⁴ Na pati loa Apenele kia Soape : Ke tutuu ki aluga a kau tupulaga, ti ke lotou tau i ota mua ! Na tali loa Soape : Ke lotou tutuu ki aluga !

¹⁵ Na lotou tutuu ake loa ki aluga, o soso ki loto i se api tatau, ko le tino agafulu tupu lua o Pesamino mo Iseposete, vosa o Saulo, ti mo le tino agafulu tupu lua o le kakai a Tavite.

¹⁶ Na lotou tasi too loa lona soa i le fa ulu, o sukii lona vakavaka ki le seleta, ti na lotou vivilo fakatasi fuli loa ki le kele. Ti na fakaigoa loa le ganea lena na ofi ki Kapaone ko Elekati-Atesulimi.

¹⁷ Na soko loa i le aso lena se tau veli ai, leia na lava ai loa Apenele mo tagata o Iselaele i le kakai a Tavite.

¹⁸ Na kau i ai a vosa e toka tolu o Teselusa : ko Soape, mo Apisai ti mo Asaele. Na vae maamaa a Asaele pe le tia vao :

¹⁹ Na tuli loa e ia a Apenele, o leaise toe maliu meiate ia ke ano ki le fetuu atamai pe ko le fetuu sema.

²⁰ Na tagaki loa Apenele ki ona muli, o pati : Pe ko Asaele a koe ? Ti na tali loa a ia : Ko au.

²¹ Na pati loa Apenele kiate ia : Soka ki le fetuu atamai pe ko le fetuu sema ; tamate se tasi o tupulaga ana, ti ke too ona teu. Kae na leaise loto Asaele ke maliu meiate ia.

²² Ti na toe pati loa Apenele kia Asaele : Ke ke maliu kese iate au ! Kolea e kau tamate ai loa a koe ? E fefeaki loa le toe tio o oku mata ki lou taina ko Soape ?

²³ Kae na leaise maliu kese Asaele meia Apenele. Ti na tooi loa a ia e Apenele i lona manava ki le muli o lana tao, ti na sa loa le tao i lona tua. Na vilo loa Asaele ki le kele, o mate i le ganea lena. Ko latou fuli ala na kaku mai ki le ganea leia na vilo ai Asaele o mate, na tutuu loa i ai.

²⁴ Na tuli loa e Soape mo Apisai a Apenele, ti na lotou kaku loa i le galo o le laa ki Ama, leia i tuu i mua o Kiase, i le ala o le toafa o Kapaone.

²⁵ Na fakatasi loa a vosa o Pesamino ke kau ki le solia a Apenele, o fai se fa solia e tasi, ti na lotou tutuu loa i aluga o se ga mauga.

²⁶ Na kalaga loa Apenele kia Soape, o pati : Pe tuku le seleta pe soko atu aifai lana maumau ? Pe leaise ke iloa e sikuga veli loa le nea leinei ? Ko afea e ke talitali ki ai, ke ke pati ai ki le kakai ke fakagato lalatou tuli olatou fetaina ?

²⁷ Na tali loa Soape : E mauli le Atua ! Kanapau na leaise ke masau loa, e leaise taofi loa e le kakai lalatou tuli olatou fetaina i mua o le usu.

²⁸ Ti na pupusi loa e Soape le fakatagi pupusi ti na tuu loa le kakai katoa ; na leaise toe soko atu lalatou tuli a Iselaele, ti na leaise toe soko atu lalatou tau.

²⁹ Na saele loa Apenele mo lana kakai i le po katoa i le toafa ; na lotou fakalaka loa i le solotane, ti na lotou saele i le fenua katoa o Piteloni, o lotou kaku loa ki Maanaimi.

³⁰ Na toe liliu loa Soape mei le tuli o Apenele, ti na fakatasii loa e ia le kakai katoa, na puli loa ni tagata a Tavite e tino agafulu tupu iva mo Asaele.

³¹ Kae na tamate e kau tagata a Tavite a tagata o Pesamino mo Apenele e tino lelau tolu mo le tino ono.

³² Na lotou ave loa Asaele o tanu i le tanuma o lona tamana i Peteleemi. Na saele loa Soape mo lana kakai i le po katoa, o lotou tau loa ki Epelone i le mafoa mai o le ao.